ESTA 9 - Bukuit Ne Tilil

Kobarei `Yahudik puunikwak

¹ Ki eng' arawetap taman ak aeng', nooto ko arawetap Adar, eng' peetuutap taman ak somok, ye kingo riik koyaak ng'olyootap laitoryat ak ng'atuutyennyi. Eng' peetuut ne ki imang'u puunigap Yahudik kole pou icheek ko kiwalak anyun ng'olyoondonooto ak kiboi Yahudik piik che kiwechei icheek.

² Ki iyumgei Yahudik eng' nganasookwak eng' emotinwek tugul che po Laitoryat Aasuerus si konam icheeget che ki cheeng'ei konyaliil icheek. Ma piit chii ne ki imuuch kogirinda icheek; amu kiga koityi pororyosyek tugul kaiyweisyet ne ki iywei Yahudik.

³ Ak ki ityi toreteet Yahudik kobun kiptainik tugul che po emotinwek, ak kandoik, ak pounik, ak icheek che kiyaei poisyetap laitoryat, amu kiga koityi icheek kaiyweisyet ne ki iywei Mordekai.

⁴ Ki oo Mordekai eng' kootap laitoryat, ak kiyom etunatennyi emotinwek tugul, ak kieet Mordekai kotesak ak kotesak.

⁵ Ak ki par `Yahudik puunikwak tugul eng' rotwetap chok, kobarei ak kong'emei icheek, ak koyachi pichooto kiwechei icheek ko uu ye kimachei.

⁶ Eng' Susa nganaseet ne oo, ko ki par kong'em `Yahudik murenik pogol muut.

⁷ Ki par kora Parsandata, Dalpon, Aspata,

⁸ Porata, Adalia, Aritata,

⁹ Parmasta, Arisai, Aritai, ak Baisata,

¹⁰ weeriichooto taman ki po Haman weeriitap Hamedata, puunyootap Yahudik. Ago ma twa icheek tuguukwak.

¹¹ Ki kiipchi ng'aleek laitoryat eng' peetuunooto agobo koitetap piik che ki kibar eng' Susa, nganaseet ne oo.

¹² Ak ki leenji `laitoryat Esta osotyonnyi, “Kogobar Yahudik ak kong'em murenik pogol muut kobooto weeriichooto taman po Haman eng' Susa, nganaseet ne oo. Kogoyai anyun ne tai eng' emotinwek tugul che po laitoryat! Nee soomeng'ung' anyun? Si kegoonin nooto. Nee kiit neta isoome? Si keyai.”

¹³ Kole anyun Esta, “Ngot koboiboi laitoryat, ingigoochi Yahudik che miitei Susa koyai mutai agine ng'atuutyet ko uu ne kabo rani, ak ingigartaat weeriichooto taman po Haman eng' keetit ne kigartate piik.”

¹⁴ Ki ng'at anyun laitoryat koyaak ko uu nooto. Ki kigon ng'atuutyet eng' Susa, ak ki kigartaat weeriichooto taman po Haman.

¹⁵ Ak ki iyumgei Yahudik kogeny che ki mi Susa eng' peetuutap taman ak ang'wan eng' arawanooto po Adar, ak kobar murenik pogol somok eng' Susa. Ago ma twa tuguukwak.

¹⁶ Ki iyumgei kora Yahudik alage che ki ng'et che ki mi emotinwegap laitoryat si kosargei ak konyoor kamuung'et eng' puunikwak. Ki par piik eliphuusyek tamanwogik tisap ak muut; ago ma twa tuguukwak.

¹⁷ Ki yaak ng'olyoondonooto eng' peetuutap taman ak somok eng' arawetap Adar, ak ki imuuny eng' peetuutap taman ak ang'wan ne po arawanooto ak ki yai koek peetuutap igoorto ak kagasetapkei.

¹⁸ Ago ki iyumgei Yahudik che ki mi Susa eng' peetuutap taman ak somok ak eng' peetuutap taman ak ang'wan agine; ki imuuny eng' peetuutap taman ak muut ne po arawanooto ak ki yai koek peetuutap igoorto ak kagasetapkei.

¹⁹ Amu nooto anyun, yaei Yahudik che po nganasook che mengeechen, che menyei nganasook che ma king'ot peetuutap taman ak ang'wan ne po arawetap Adar koek peetuutap kagasetapkei ak igoorto, ak koek peetuut ne myee ak peetuut ne kiyooktochingei kagoochinoik.

Igoortap Pur

²⁰ Ki sir Mordekai tuguuchooto. Ak ki iyooktoochi paronok Yahudik tugul che ki mi emotinwek tugul che po Laitoryat Aasuerus, che neegit ak che looen,

²¹ kong'at icheek kole, koriip eng' kenyiit age tugul peetuutap taman ak ang'wan ak peetuutap taman ak muut ne po arawetap Adar,

²² koek peetuusyek che imuunyi Yahudik, che ma paregei ak puunikwak, ak koek arawet ne ki kiwale arageneet koek kagasetapkei, ak riirek koek peetuut ne myee. Ki le koyachigei koek peetuusyegap igoorto ak kagasetapkei ak koek ne kiyooktochingei konunoik ak kiyookyi kibananook kagoochinoik.

²³ Ak ki iyan Yahudik koyai ko uu ye kiga kotoi, ak ko uu ye kiga kosirchi `Mordekai icheek.

²⁴ Amu kiga kobwaat Haman weeriitap Hamedata, Agagindet, puunyootap Yahudik tugul, kole kong'em Yahudik ak koser Pur, nooto ko parbareek, kole kobar icheek kogees ak kong'em.

²⁵ Ago ye kingo it ng'olyoondonooto taitap laitoryat, kong'at eng' paronok kole koweekyigei metinnyi sogornatennyi ne kiga kochop agobo Yahudik, ak kole kigartati ineendet ak weeriikyik eng' keetit ne kigartate piik.

²⁶ Kiguure anyun icheek peetuusyechooto Purim, keguurtoe kainetap Pur. Eng' nooto anyun, amu ng'aleek tugul che po parwaaniito, ak tuguuk che kiga kogeer agobo ng'olyoondoniito ak tuguuk che kiga kobwonji icheek,

²⁷ kong'at Yahudik kole koriip icheek kobooto iyotennywa ak tugul che ki namgei ak icheeget, peetuusyechooto aeng' ko uu ng'olyoonnywa ne ki kisir, si ma kibagaakta ak ko uu peetuusyek che ki king'at, eng' kenyiit age tugul.

²⁸ Keele kibwaat ak keriip peetuusyechooto eng' ibinda age tugul: eng' kapchii age tugul, eng' emet age tugul, ak eng' nganaseet age tugul. Keele si ma petyo peetuusyegap Purim eng' Yahudik, anan kobet kabwaatennywa eng' iyotennywa.

²⁹ Ki sir anyun Esta osotyotap laitoryat, cheptap Abiail ak Mordekai Yahudyot, eng' kimnateet tugul ne po pounateet kogimiit parwaaniito po aeng' po Purim.

³⁰ Ak ki iyookyi paronok Yahudik tugul, che ki mi emotinwek pogol ak tiptem ak tisap che po laitornatetap Aasuerus, kobooto ng'aleegap kaalyeet ak che po iman,

³¹ si kogiimit peetuusyechuuto po Purim eng' peetuusyekwak che ki king'at, ko uu ye kiga ng'at icheek `Mordekai Yahudyot ak Esta osotyotap laitoryat, ak ko uu ye kiga kong'atyigei ak iyotennywa eng' ng'olyootap karugutetapkei ak riirekwak.

³² Ki igimiit anyun ng'atuutyetap Esta ng'aleechu po Purim, ak ki kisirchi bukuit.