ESTA 8 - Bukuit Ne Tilil

Kong'atei laitoryat kosargei Yahudik

¹ Ki igoochi anyun eng' peetuunooto `laitoryat Aasuerus Esta osotyonnyi kootap Haman puunyootap Yahudik. Ki nyo anyun Mordekai taitap laitoryat, amu kiga komwachi Esta kiit ne kiguregei ak ineendet.

² Ki inem laitoryat peteinnyi ne kiga rebe Haman, ak kogoochi Mordekai. Ak ki inde `Esta Mordekai koboi kootap Haman.

³ Ki ng'alaal Esta kogeny eng' taitap laitoryat ak kobutyi keelyekyik, kogaigai eng' peegap kong' kole koisto yaityetap Haman Agagindet ak ng'aleekyik che yaacheen che kimachei koyachi Yahudik.

⁴ Ki iyogoochi anyun `laitoryat Esta kirokto ne po thahabu. Kong'eet anyun Esta ak kotonon eng' taitap laitoryat.

⁵ Ak kole, “Ngot koboiboi niito laitoryat ak ngot ko kaanyooru chameet eng' tainnyi, ak ngot kogeer laitoryat kole myee ng'olyoondonooto ak aboiboi ineendet, ko ingesir kewal paronok che kichobei Haman weeriitap Hamedata Agagindet, che kisir kole keng'em Yahudik che mi emotinwek tugul che po laitoryat.

⁶ Amu amuktoi ano amuita ak ageere yaityet ne nyoonjin piikyuk? Anan amuktoi ano amuita ak ageere ng'emisyetap tilyonutikyuk?”

⁷ Ki leenji anyun `laitoryat Aasuerus Esta osotyonnyi ak Mordekai Yahudyot, “Ogeero, kaagoochi Esta kootap Haman ak ko kigartaat ineendet eng' keetit amu kimachei kobar Yahudik.

⁸ Osirchi ak okweek Yahudik ko uu ye omache, eng' kainetap laitoryat ak ong'och eng' peteitap laitoryat. Amu ma imuuchi kowal chii parweet ne kisirei eng' kainetap laitoryat ak keng'och eng' peteitap laitoryat.”

⁹ Ki kiguur anyun siriigap laitoryat peetuunooto, eng' peetuutap tiptem ak somok eng' arawetap somok, nooto ko arawetap Siban. Ki kisir ko uu tuguuk tugul che kiga ng'atyi Mordekai Yahudik, kandoik pounik ak kiptainigap emotinwek che ki mi kong'etee India agoi Kush, emotinwek pogol ak tiptem ak tisap. Ki kisirchi emet age tugul eng' siruutikyik ak pororyet age tugul eng' kutinnywa ak ki kisirchi Yahudik ko uu siruutikwak ak eng' kutinnywa.

¹⁰ Ki sir Mordekai eng' kainetap Laitoryat Aasuerus ak kong'ooch eng' peteitap laitoryat, yeityo koyooktoe paronochooto piik che kibunei paraisisyek, che ki laanyei paraisisyek che chepcheben che kiboisyei eng' poisyetap laitoryat, che ki kiichin piusyegap kaplaitoryat.

¹¹ Ki mwa paronochooto kole kagogoochi `laitoryat chamjinet Yahudik che mi nganaseet age tugul koyumgei ak kosargei, si kong'em, kobar ak kolus kimnateet tugul ne po piik ak ne po emet, ne imuuch kobookyi icheek kobooto kwonyikwak ak lagokwak, ak koluul tuguugap pichooto koek parunenik.

¹² Ak keyai eng' peetuut agenge eng' emotinwek tugul che po Laitoryat Aasuerus eng' peetuutap taman ak somok ne po arawetap taman ak aeng', nooto ko Adar.

¹³ Ki kimwachi pororyosyek tugul ng'aleegap siruutichooto che ki mwa kole kemwaita ng'atuutyet eng' emet age tugul, ak keele kochopkei Yahudik eng' peetuunooto koyaaktochigei mugetuut eng' puunikwak.

¹⁴ Ki pa anyun piik che kiga kiyookto kobun paraisisyek che chepchep che kiboisyei eng' poisyetap laitoryat, che ki kichirchir ak ki kigiil eng' ng'atuutyetap laitoryat. Ak ki kimwaita ng'atuutyet eng' Susa nganaseet ne oo.

¹⁵ Ki wo Mordekai eng' ole mi laitoryat kolaagoti ngoroigap laitornatet che buluu ak che leelach, kotinyei naaryeet ne oo ne po thahabu ak ngoryeet ne po katanit ne karaaran ne arus ne piriir. Ak kiwaach nganaseetap Susa kogaskei.

¹⁶ Ki tinyei Yahudik lapkeiyet ak kagasetapkei, ak poiboiyet ak teegisto.

¹⁷ Ak ki tinyei kagasetapkei ak poiboiyet, igoorto ak peetuut ne oo eng' emet age tugul ak eng' nganaseet age tugul, oldo tugul ole kiga it ng'olyootap laitoryat ak ng'atuutyennyi. Kiwalgei piik che chaang' che po emet koek Yahudik, amu kiga koityi icheek kaiyweisyet ne ki iywei Yahudik.