ESTA 5 - Bukuit Ne Tilil

Soometap Esta ne ki soom laitoryat

¹ Eng' peetuut ne po somok, koolaach Esta ngoroikyik che po laitornatet yeityo kotoonon eng' seremut ne po oriit ne po kootap laitoryat, ne tokyingei kootap laitoryat. Ki tebee laitoryat ng'echerennyi ne po laitornatet eng' kootap laitornatet, kotokyigei ole kibunei kebendi ko.

² Ak kingo keer laitoryat osotyonnyi Esta kotononi eng' seremut, konyoor chameet eng' tainnyi, ak ki iyogoochi `laitoryat Esta kirokto ne po thahabu ne ki tinyei eng' eunnyi. Kiriikta anyun Esta ak konam walitap kirogooto.

³ Koteebe anyun laitoryat ineendet koleenji, “Imache nee Esta? Nee kiit ne isoome? Kigoonin agot ngo kebebertap laitornatet.”

⁴ Ak ki le Esta, ngot kogeer laitoryat kole myee, ingonyo laitoryat ak Haman rani igoorto ne oo ne kaachopchi ineendet.

⁵ Ara ki ng'at anyun laitoryat kole, “Omwachi Haman kochok si kobiit koyaak ko uu ye kagomwa Esta.” Ki nyo anyun laitoryat kobooto Haman igoorato kiga kochop Esta.

⁶ Ye kingo mi laitoryat igoortap divaik, koteebe kogeny Esta koleenji, “Nee soomeng'ung' si kegoonin? Ak nee kiit ne isoome? Agot ngo kebebertap laitornatet, keyaei.”

⁷ Ki wolji anyun Esta koleenji, “Soomennyu ak kiit ne asoome ko ni,

⁸ ngot ko kaanyooru chameet eng' taitap laitoryat, ak ngot koboiboi laitoryat soomennyu, koyaiywo anyun kiit ne asoome. Ingobwa laitoryat ak Haman igoorto ne oo ne achopchini icheek ak ayai mutai ko uu ye kagomwa laitoryat.”

Kochobei Haman Kebar Mordekai

⁹ Ki wo anyun Haman eng' peetuunooto kobaibai ak kogasegei eng' muguleldo. Ago ye kingo keer `Haman Mordekai eng' ormariichetap laitoryat, ak konai kole ma tonoon anan koistochigei ineendet, konereekyi Mordekai miising'.

¹⁰ Nga no, ko kimuita Haman ak kwo kaa. Ki iyookto keguur choronokyik ak Seres osotyonnyi.

¹¹ Yeityo komwachi Haman icheek toroornatetap mogornatosyekyik ak chaang'indap lagokyik, ak tuguuk tugul che ki ietee laitoryat ineendet kosiir pounik ak otwogik che po laitoryat.

¹² Ne siirei, ko ki mwa Haman kole, “Ma chamji `Esta osotyotap laitoryat chii age tugul koba ak laitoryat igoorto ne oo ne kiga kochop, kobatena. Ak kaguura kogeny ineendet keebe ak laitoryat mutai.

¹³ Ago ma iiti chuuto tugul kota ageere Mordekai Yahudyot kotebyei eng' ormariichetap laitoryat.”

¹⁴ Koleenji anyun `Seres osotyonnyi ak choronokyik tugul ineendet, “Myee kelumda keetit ne kigetisyee kotonoon ne po mitainik tiptem ak aeng', ak imwachi laitoryat mutai ileenji kigartatee kioto Mordekai. Ye ibata, iwe inyee igoorto eng' kagasetapkei kobooto laitoryat.” Ki ibaibai kioto Haman, ak ki ng'at keyai keetoto kigetisyee.