ESTA 4 - Bukuit Ne Tilil

Kogaigai `Mordekai Esta kosoom rireenet

¹ Ye kingo nai Mordekai tuguuk tugul che kagoyaak, kogereer ngoroikyik ak kolaach kuniok ak koiilegei oreek, yeityo kwo kwenutap nganaseet ak koote eng' kutit ne oo ak riiregap ng'wanindo ne oo.

² Ago ki nyo ineegei agoi taitap ormariichetap laitoryat, amu ki ma kechamjin chii age tugul ne ilaachi kuniok kochut ormariichanooto.

³ Ki piit eng' Yahudik arageneet ne oo, karugutetapkei, riirek ak kateeiyet eng' emet age tugul ne ki it ng'olyootap laitoryat ak ng'atuutyennyi, ak kisyep che chaang' eng' icheek kuniok ak oreek.

⁴ Ye kingo pwa tiibiigap Esta ak riibiikyik ak komwachi Esta ng'olyoondonooto, ko ki aragen miising' ineendet. Ki iyookto ngoroik kilaakyi Mordekai ak kireegune kuniok, ago ma iyan kolaach ngoroichooto.

⁵ Kiguur anyun `Esta Hatak, agenge eng' riibiigap laitoryat ne kiga konde laitoryat koboisyechi ineendet ak kong'at ineendet kwo ole mi Mordekai si kobiit konai kole nee niito ak amu nee si koyaak ko uu nooto.

⁶ Ara ki wo anyun Hatak ole mi Mordekai eng' ole paraa eng' nganaseet ne ki mi taitap ormariichetap laitoryat.

⁷ Ki mwachi `Mordekai ineendet tuguuk tugul che kogoyaak agobo ineendet ak agobo fedhaisyek tugul che kiga koarorchi Haman kole konde ole kigonoree tuguugap laitoryat agobo Yahudik, kole si kebar icheek.

⁸ Ki igoochi kora ineendet ng'aleegap siruutik che po ng'atuutyet ne ki kimwaita eng' Susa keele kebar icheek, si koboorchi Esta ak koaroorchi ole teptoi, kong'at ineendet kwo ole mi laitoryat asi koriirchi ineendet ak kosoom eng' tainnyi agobo piikyik.

⁹ Ki wo Hatak ak komwachi Esta ng'aleegap Mordekai.

¹⁰ Ki ng'alaalji anyun `Esta Hatak ak kong'at ineendet koipchi ng'aleek Mordekai kwo koleenji,

¹¹ “Ingen otwogik tugul che po laitoryat ak piik che po emotinwegap laitoryat kole, age tugul ne ma kiguur ne nyoonei ole mi laitoryat eng' seremut ne mi oriit, ngo muren anan kwony, komi ng'atuutyet agenge agobo ineendet keele ki parei. Ma ng'etu kobatee icheeget che iyogoochin `laitoryat kirokto ne po thahabu si kosap. Tomo keguuro anee anyun awo ole mi laitoryat eng' peetuusyechu sosom kogosiirto.”

¹² Ye ki ngemwachi Mordekai ng'aleegap Esta,

¹³ kong'at anyun Mordekai keipchi Esta waluunet keleenji, “Amat ibwaat ile amu imi kootap laitoryat ichilili kosiir Yahudyo age tugul.

¹⁴ Amu ngot isiis kityo eng' peetuusyechuuto, konyooru Yahudik toreteet ak katyaget eng' komosta age, ago iluse inyee ak kootap kwandang'ung'. Ak ng'oo ne ingen ngo tos ki ma inyonji pounateet agobo peetuusyek che uu chuuto?”

¹⁵ Kong'at anyun Esta keipchi Mordekai waluunet keleenji

¹⁶ ui iyum Yahudik tugul che miitei Susa, ak orugutkei agobo anee amat oam kiy anan oeeise eng' peetuusyek somok, kemoi anan peet. Arugutigei agane ko uu nooto kobooto tiibiikyuk. Ye ibata, awe anyun ole mi laitoryat nganda ma chamdaat eng' ng'atuutyet; ngalus, alus.

¹⁷ Ki wo anyun Mordekai ak koyai ko uu tugul che kang'at `Esta ineendet.