ESTA 3 - Bukuit Ne Tilil

Kochobei Haman Kebar Yahudik

¹ Kingo pata tuguuchuuto koeet `Laitoryat Aasuerus Haman weeriitap Hamedata Agagindet. Ki itoroor ineendet ak kogoochi kotebee ng'echereet ne toroor kosiir pounik tugul che ki mi kobooto ineendet.

² Ak ki ing'uruukjin ak kogonyiti Haman `otwogik tugul che po laitoryat che ki mi ormariichetap kaplaitoryat, amu kiga kong'at laitoryat ko uu nooto agobo ineendet. Ago ki ma ing'uruuk anan kogonyit `Mordekai ineendet.

³ Kotebee anyun otwogigap laitoryat che ki mi ormariichetap kaplaitoryat Mordekai koleenji, “Amu nee si ibistoe ng'atuutyetap laitoryat?”

⁴ Kingo ng'alaalji anyun `icheek Mordekai eng' peetuut age tugul ama kas, komwachi anyun Haman kogeer ngo myee kotebi ng'aleegap Mordekai ko uu nooto, amu kiga komwachi `icheek koleenji aa Yahudyot.

⁵ Ye kingo keer Haman kole ma ing'uruuk Mordekai anan kogonyit ineendet, konereech miising'.

⁶ Ki iro kole ma tilei kiy kobar Mordekai ineegei, amu kiga koboorchi `icheek ineendet ole salu piigap Mordekai, kocheeng' anyun Haman kobar Yahudik tugul che ki mi laitornatet tugul ne po Aasuerus; chooto ko piigap Mordekai.

⁷ Eng' arawet ne po tai, nooto ko arawetap Nisan, eng' kenyiitap taman ak aeng' ne po Laitoryat Aasuerus, ko ki kiseer parbareegap Pur eng' taitap Haman, kobooch peetuut agoi peetuut ak kobooch arawet agoi arawet. Ki ibutyi parbaryat peetuutap ang'wan ne po arawetap taman ak aeng', arawetap Adar.

⁸ Kingo yaak ko uu nooto, koleenji `Haman Laitoryat Aasuerus, mi piik alak che kiyom emet ak koiyestaat eng' kwenutap piik eng' emotinwek tugul che po laitornateng'ung' ak teerchiin ng'atuutikwak ak che po piik alak tugul, ama riibei icheek ng'atuutigap laitoryat; matoreti kiy anyun eng' laitoryat kobagaakta icheek.

⁹ Ngot kochamei laitoryat, ko ingesir keele kebar icheek, ak agoochini piik che tononjin poisyonooto keruutik eliphuusyek taman che po fedha koip kobwa ole kigonoree tuguugap laitoryat.

¹⁰ Ara ki inem anyun laitoryat peteiyot eng' eunnyi ak kogoochi Haman weeriitap Hamedata Agagindet ne ki puunyootap Yahudik.

¹¹ Ak ki leenji `laitoryat Haman, “Kagigoonin fedha kobooto piik agicheek si kobiit iyachi ko uu ole makte.”

¹² Ki kiguur anyun siriigap laitoryat kobwa eng' arawet ne po tai eng' peetuutap taman ak somok, ak ki kisir ko uu tugul che ki ng'at Haman kong'atyi kiptainigap che mi kaplaitoryat, pounik che ki pou emet age tugul ak kiptainigap pororyet age tugul. Ki kisirchi emet age tugul ko uu sirennyi ak pororyet age tugul ko uu kutinnywa. Ki kisir eng' kainetap Laitoryat Aasuerus ak ki king'ooch eng' peteitap laitoryat.

¹³ Ki kiyookto paronok, kiyooktoe piik koba emotinwek tugul che po laitoryat keleenji keng'em, kebar ak kiluus Yahudik tugul; neranik ak che oosen, lagok che mengeechen ak kwonyik, ak kenam tuguukwak koek parunenik. Oyai niito eng' peetuut agenge, eng' peetuutap taman ak somok ne po arawetap taman ak aeng', nooto ko arawetap Adar.

¹⁴ Ki kimwachi pororyosyek tugul ng'aleegap siruutichooto, si kobiit kigoito ng'atuutyet eng' emet age tugul, si kochobogis agobo peetuunooto.

¹⁵ Ki pa anyun piik che kiga kiyookto kochaakta eng' ng'atuutyetap laitoryat ak ki kigoon ng'atuutyonooto eng' Susa, nganaseet ne oo. Ki tep ng'wony laitoryat ak Haman koeeiso, ago ki iimgei nganaseetap Susa.