ESTA 2 - Bukuit Ne Tilil

Keyae Esta koek osotyotap laitoryat

¹ Kingo pata tuguuchuuto ko kagogeskei nereegegap Aasuerus, kobwaat `ineendet Basti, kiit ne kiga kayai kwonyooto ak kiit ne kiga king'at agobo ineendet.

² Yeityo komwa otwogigap laitoryat che kiboisyechin ineendet kole ingecheeng'ji laitoryat pergeinik che neranik ak ko tinyei itoon,

³ ak ingonde laitoryat kiptainik emotinwek tugul che po laitornatennyi, si kobiit koyum pergeinik tugul che neranik ak ko tinyei itoon kobwa Susa, nganaseet ne oo. Ngo pwa kootap kwonyik, konyo koriip Hegai riibindetap kaplaitoryat ne ki riibei kwonyik. Ingigoochi tuguukwak che ianyinyegei,

⁴ si koek osotyotap laitoryat chepto ne iboiboi laitoryat, ne kata Basti. Ki ibaibai `laitoryat ng'olyoondoni ak ki yai ko uu nooto.

⁵ Ki mi Yahudyot age nganasanooto oo po Susa ne ki kiguure Mordekai, weeriitap Jair, weeriitap Shimei, weeriitap Kish, Benjaminindet.

⁶ Kiga kimut ineendet eng' Jerusalem koba ak luulenik che kiga komut Nebukadnezar laitoryatap Babilon kobooto Jekoniah laitoryatap Judah.

⁷ Ki igui `Mordekai Hadasa, nooto ko Esta cheptap ne tupcho ak kwan, amu ki ma kotinyei kwanda ak kamet. Ki chepto ne ki tinyei itondo ne myee ak togeet ne karaaran ak ye kingo me kwandanyi ak kamennyi, konam Mordekai koek cheptonyi.

⁸ Ye ki ngegas ng'olyootap laitoryat ak ng'atuutyennyi ak kingi yum tiibiik che chaang' kobwa Susa nganaseet ne oo koriip Hegai, ko ki kimut Esta agine konyo kootap laitoryat koriip Hegai ne ki riibei kwonyik.

⁹ Ki ibaibai `chebooto ineendet. Ki nyoor chameet eng' ineendet ak kisip kogoochi tuguukyik che ianyinyegei kobooto kebeberwekyik che po amitwogik. Ki igoochi `ineendet tiibiik tisap che ki kileewenji eng' kootap laitoryat. Ki kiuu ineendet kobooto tiibiikyik koba komosta ne karaaran miising' ne po kootap kwonyik.

¹⁰ Ki ma iboor Esta ole salu piikyik anan tilyonutikyik amu kiga kong'at Mordekai ineendet si ma mwa.

¹¹ Ki cham kowendoti Mordekai peetuut age tugul eng' taitap seremut ne po kootap kwonyik, si kobiit konai ole teptoi Esta ak kiit ne kiyachin ineendet.

¹² Ki it peetuut ne wendi chepto age tugul ole mi Laitoryat Aasuerus, ko kageyachi ko uu ye mwaei ng'atuutik agobo kwonyik eng' arawek taman ak aeng': ki uu nooto kagesunetap peetuusyegap kaanyinyennywa pogei, ki po arawek lo mwanigap tuguuk che uu igomoik, ko po arawek lo nyamdutik ak tuguuk che po kaanyinyetap kwonyik.

¹³ Kinyonei ole mi laitoryat ko uu niito anyun chepto koga kigoochi kiit age tugul ne machei koip eng' kootap kwonyik kwo kootap laitoryat.

¹⁴ Kiwendi koskoleny ak koweek mutai kwo koot ne po aeng' ne po kwonyik sip koriip Saaskas, riibindet eng' kaplaitoryat ne kiriibei chebaigeinik. Ki ma komuuchi kwo kogeny chebooto ole mi laitoryat, kobatee ngo cham laitoryat chebooto ak keguur kainennyi.

¹⁵ Kingo it anyun peetuutap Esta, cheptap Abiail ne tupcho ak kwandap Mordekai ineendet ne kiga nam chebooto koek cheptonyi, ye wendi ole mi laitoryat, koma mach kiy age tugul kobatee kiit ne ki ng'at Hegai riibindet eng' kap laitoryat ne kiriibei kwonyik. Ak ki chamak Esta eng' taitap piik tugul che ki keer ineendet.

¹⁶ Ki kimut anyun Esta kwo ole mi Laitoryat Aasuerus eng' koonnyi ne po laitornatet eng' arawetap taman, nooto ko arawetap Tebet, eng' kenyiit ne po tisap ne po laitornatennyi.

¹⁷ Ak ki cham `Laitoryat Esta kosiir tiibiik tugul, ak kinyoor myeeindo ak chameet eng' tainnyi kosiir pergeinik tugul. Ara ki ilaakyi ineendet naaryeetap laitornatet ak koyai ineendet koek osotyotap laitoryat kogeere Basti.

¹⁸ Ki yachi anyun laitoryat igoorto ne oo pounikyik tugul ak otwogikyik igoortap Esta. Kigoochi kamuung'et emotinwek ak kogoito kagoochinoik ko uu aiyebindap laitoryat.

Komwau Mordekai chaamigap pareetap laitoryat

¹⁹ Ye kingo kagoyumgei pergeinik ne po aeng', kotep Mordekai eng' ormariichetap laitoryat.

²⁰ Kitom koboor Esta ole salu anan tilyonutikyik ak piikyik ko uu ye kiga ng'at Mordekai ineendet. Ma iboor amu ki kas iit Esta ng'atuutyetap Mordekai ko uu atkinyei koriibei ineendet.

²¹ Eng' peetuusyechooto, ye kitebyei Mordekai eng' ormariichetap laitoryat, konereekso riibiik aeng' che po kaplaitoryat che kiriibei kurgeet, Bigtan ak Teres, ak kocheeng' kobar Laitoryat Aasuerus.

²² Kinaak kioto eng' Mordekai ak ki mwachi Esta osotyotap laitoryat ak ki mwachi `Esta laitoryat ng'olyoondonooto, komwaitoochi Mordekai.

²³ Ye kingo kagegin ng'olyoondonooto ak kenai keele uu nooto, ko ki kigartaat pichooto tuwai eng' keetit ak ki kisirchi ng'olyoondonooto bukuitap ateptap peetuusyek eng' taitap laitoryat.