ESTA 1 - Bukuit Ne Tilil

Keonei Basti, osotyotap laitoryat

¹ Ki yaak ko uu ni eng' peetuusyegap Aasuerus, nooto ne ki laitorani kobooch India agoi Kush nooto Ethiopia, kobou emotinwek pogol ak tiptem ak tisap

² eng' peetuusyechooto kitebee Laitoryat Aasuerus ng'echereetap laitornatet ne po pounatennyi eng' nganaseet ne oo ne po Susa,

³ eng' kenyiit ne po somok ne po laitornatennyi, ko ki yachi igoorto pounikyik tugul ak otwogikyik. Ki mi tainnyi piik che taagunotiin ak pounigap emotinwek, che ki kimnateetap Persia ak Media.

⁴ Ki ibarta anyun laitoryat mogornatosyegap laitornatennyi ne toroor ak teegistap etunatennyi ne siirtoot eng' peetuusyek pogol ak tamanwogik sisiit.

⁵ Ye kingo keskei peetuusyechuuto, koyachi laitoryat igoorto piik tugul che ki mi nganaseet ne oo ne po Susa, che eecheen kobooto che mengeechen eng' peetuusyek tisap eng' seremutap mbareetap kootap laitoryat.

⁶ Ki miitei angook che songinindos che ki leelach ak che ki nyalileen, ak che ki buluu, che ki kirate poroonik che po katanit ne karaaran ak ne arus ne piriir, keratyi tamoogok che po fedha eng' tolochigap koik che leelach. Ki po thahabu ak fedha itogusyek ak ki kinde ng'wony ole ki kimale koik che piriiren, che leelach, che sokyanen ak che tuuen.

⁷ Ki kiinaga icheek divaik koee eng' tuguuk che po thahabu, (kiteerchin tuguuchooto,) ak ki kiinaga divaik che chaang' che po laitoryat ko uu aiyebindap laitoryat.

⁸ Ko uu ng'atuutyetap Laitoryat, ko ki ee icheek ak ko ki ma kibirchi chii, amu kiga kong'at laitoryat kiptainigap divaik tugul che po koonnyi koyai ko uu ye machei chii tugul.

⁹ Ki yachi agine Basti, osotyotap laitoryat igoorto kwonyik tugul che ki mi kootap laitoryat Aasuerus.

¹⁰ Eng' peetuut ne po tisap ye kibaibai muguleldap laitoryat amu divaik, kong'at ineendet riibiichu tisap che kiboisyei eng' taitap Laitoryat Aasuerus: Meuman, Bista, Harbona, Bigta, Abagta, Setar ak Karkas,

¹¹ komut Basti osotyotap laitoryat konyo taitap laitoryat kolaaganu naaryeet ne po laitornatet, si koboorchi karaaranindanyi piik ak pounik amu ki tinyei itoon ne karaaran.

¹² Ago ki eesyo Basti, osotyotap laitoryat konyo ye kingo ng'at laitoryat ineendet eng' kutitap riibiik. Ki nereech anyun miising' laitoryat konereekyi ineendet kot.

¹³ Amu ki ateptap laitoryat koteepsee che ingen ng'atuutik ak kirwoogutik, koging'alaji anyun `laitoryat piik che ng'oomen che ki ingen peetuusyek,

¹⁴ ak che kineegite ineendet. Chooto ko ki: Karsena, Setar, Admata, Tarsis, Meres, Marsena ak Memukan, che ki pounik tisap che po Persia ak Media, che ki cham kogeerei togeetap laitoryat, che kisip kinde koek che eecheen eng' laitornatet.

¹⁵ Kiteep anyun laitoryat kole, “Ki itoi nee anyun Basti, osotyotap laitoryat ko uu ye mwaei ng'atuutik, amu ma yai kiit ne ki ng'at Laitoryat Aasuerus ne ki mwa eng' riibiik?”

¹⁶ Ak ki wol Memukan eng' taitap laitoryat ak pounik kole, “Ma yachi ne ya `Basti laitoryat ineegei, ago kayachi ne ya pounik tugul ak piik tugul che mi emotinwek tugul che po Laitoryat Aasuerus.

¹⁷ Amu tuun kasei kwonyik tugul poisyoniito po osotyondoniito ak koyai manong'otaikwak koek che kisasei eng' tainnywa, ye tuun kagimwaita keele, ‘Ki ng'at Laitoryat Aasuerus kimut Basti, osotyotap laitoryat konyo tainnyi, ago ma nyo.’

¹⁸ Ak imuuchi komwa ko uu nooto rani tiibiigap laitorinigap Persia ak Media che kagogas agobo poisyetap osotyotap laitoryat, komwachi pounik tugul che po laitoryat. Ak kobiit anyun sasisyet ne oo ak nereegek che chaang'.

¹⁹ Ngot kocham anyun laitoryat, ko myee komwa ineendet ng'atuutyet ne po laitornatet, ak ngesir kobooto ng'atuutigap Persik ak Medik si ma ki wal, ngesir keele ma konyonei kogeny Basti taitap Laitoryat Aasuerus. Ak ingogoochi laitoryat etunatennyi ne po laitornatet chiito age ne kaigai kosiir ineendet.

²⁰ Si ye tuun kagimwaita ng'atuutyetap laitoryat ne tuun yaei eng' laitornatennyi tugul, (amu oo,) kogoochi anyun `osotik tugul manong'otaikwak teegisto, kogoochi che eecheen ak che mengeechen.”

²¹ Ki ibaibai ng'olyoondonooto laitoryat ak pounik ak ki yai laitoryat ko uu ng'olyootap Memukan.

²² Ki iyookto paronok koba emotinwek tugul che po laitoryat, koba emet age tugul eng' sirennywa ak koba pororyet age tugul eng' kutinnywa, kole, koboi chii tugul koonnyi ak komwaita eng' kutitap piikyik.