EPESOEK 4 - Bukuit Ne Tilil

Yamdaet agenge eng' Poortap Kristo

¹ Nooto anyun, anee ne aa kimonjororyot eng' Kiptaiyat, asoomok miising' ale obendate ko uu ye nyoljin kuurseet ne kigeguurok,

² eng' kaming'inetapkei tugul ak mutyonet, kobooto muitaet, omuitochinigei eng' chamyet;

³ ogiiligei oriibe yamdaet ne po Kabuuset ne Tiliil eng' ratuutyetap kaalyeet.

⁴ Agenge poorto, ak agenge Kabuuset ne Tiliil, ko uu ye kigeguurok eng' kamang'unet agenge ne po kuurseng'wong';

⁵ Kiptaiyat agenge, kayaneet agenge, kabatisanet agenge,

⁶ Kamuktaindet agenge ne Kwandap tugul, ne pou tugul, ak koyamu tugul, ak komi eng' tugul.

⁷ Ago ki kigoochi age tugul eng' acheek myeeindo ko uu kakwaet ne po konunetap Kristo.

⁸ Mwaei eng' nooto anyun kole, Kingo togosta parak, komut luulenik che ki koluul, Ak kogoochi piik kagoochinoik.

⁹ (Nooto anyun, ng'olyoondoniito mwaei kole, “Ki togosta,” ko nee anyun kobatee keele ki choortagei agine kwo komoswegap ng'wony oriit miising'?

¹⁰ Ineendet ne ki choortagei ko ineendet ne ki togosta parak miising' kosiir kipsengwet tugul, si kobiit konyiit tuguuk tugul.)

¹¹ Ak ki igoochi alak koek che kiyooktoi: ak alak, maotik; ak alak, che mwaitooti logoiywek che myach; ak alak, mestoweek ak ko kaneetik;

¹² si koyai che tiliileen koek che ititaatiin, agobo poisyetap otisyet, agobo teekseetap poortap Kristo,

¹³ agoi keit acheek tugul yamdaetap kayaneet, ak naetap Weeriitap Kamuktaindet, agoi keegu chiito ne pekyinot, agoi kakwaet ne po etunatetap nyiietap Kristo:

¹⁴ si mata keegu lagok, che kitoortai koba komosi ak komosi ak keibooti eng' usoonet age tugul ne po kaneetisyet, eng' ng'aalsetap piik, ak eng' kaberberisyosyegap kiplembechoonik;

¹⁵ ago ki ng'alaali che po iman eng' chamyet, si keegitu eng' tuguuk tugul eng' ineendet, ineendet ne metit, nooto ko Kristo;

¹⁶ eng' ineendet keropchindos ak kituitos poorto tugul, eng' nooto ne koonu kebeberta age tugul, ko uu kakwautyetap poisyet ne po kebeberta age tugul, si kotes poorto eng' teekseet ne teechegei ineegei eng' chamyet.

Sabeet ne po keny ak ne leel

¹⁷ Amwae anyun ni, ak abaoryani eng' Kiptaiyat, ale si mata obendate ko uu ye pendoti Pororyosyek ak icheek, eng' kabwaatutikwak che po puch,

¹⁸ che imenen eng' nautikwak, che ki kiyai koek kipsagarek eng' saboondap Kamuktaindet, amu perberyo ne mi eng' icheek, amu uuindap mugulelwekwak;

¹⁹ che ki igoochigei mageet ne ya agobo tuguuk che yaacheen, amu ki kobek kosaptos, si koyai simdo tugul eng' keiyandit.

²⁰ Ago ki ma oneetkei Kristo ko uu nooto;

²¹ ngo ki ogas ineendet, ak ki kinetak eng' ineendet, ko uu ye mi imanit eng' Jeso:

²² ale oregu chiito ne po keny, nooto atebeeng'wong' ne po atkinye, ne ng'emaksei ko uu maguutik che yaach che po keniisyet;

²³ asi owalage oleelagitu eng' nautigap saboonwekwok,

²⁴ ak olaach chiito ne leel, ne ki kiyai eng' Kamuktaindet eng' imanda ak tiliilindo ne po iman.

Kaneetutik agobo sabeet ne leel

²⁵ Nooto anyun oiste lembeita, ong'alaaljinigei ne po iman chii tugul ak chiitap kokwennyi: amu ki kebeberwek age tugul ne po age.

²⁶ Onereech, amoyai tengek: amat kororokto asiis kota onereektosi:

²⁷ amat ogoochi poroindo chesawilyet.

²⁸ Ineendet ne kigochoorso ko matata kochoorso: ago kaigai kobois, koyai eng' eunekyik nooto myee, si kobiit kosich kiit ne igoochin ineendet ne panani.

²⁹ Amat komang'une ng'olyoo age tugul ne ya kutusweekwok, ago nooto ne myee ne imuuchi koteekso, ko uu ye nyolu, si kobiit kogoochi myeeindo icheeget che kasei.

³⁰ Ak amogoochi arageneet Kabuuset ne Tiliil ne po Kamuktaindet ne ki kindaenak ng'ookset agoi peetuutap katyaget.

³¹ Ingoistogei eng' okweek ng'wanindo tugul, ak nyitatet, ak nereegek, ak polateet, ak chubisyet, kobooto yaityet tugul:

³² ilak otebi eng' talasyet okweegei eng' okweegei, orireegei, ak onyochinigei kaat, ko uu ye kinyoiywok kaat Kamuktaindet agine eng' Kristo.