DANIEL 8 - Bukuit Ne Tilil

Mengit ak kwesta

¹ Ki nyoonjo anee Daniel, ng'ang'utyet ne uu ne kiga ageer eng' tai eng' kenyiit ne po somok ne po laitoryat Belshazzar.

² Ak ki ageer ng'ang'utyet, ak kinga keere, ami Susa, nganaseet ne oo eng' emetap Elam; ki ageer ami ole neegitee aineet Ulai.

³ Ki ayot met ak ageer mengit kotononi eng' ngeguutap aineet. Ki tinyei kuinoik aeng' che ki kooen; ago kigoi age kosiir age, ak ki mong'u let nooto kooi.

⁴ Ki ageer mengoto kotoortaisyei kotokyigei cherongo ak murot kaataam ak murot tai. Ama imuuch tyong'ik kotononso eng' tainnyi, ama piit ne ki imuuch kosar eng' eunnyi; ki yai ko uu ye machei ak koeetkei.

⁵ Ak ye kita abwaati, ogeero, komong' kwesta eng' cherongo ne ki yom ng'wony komugul ak ki ma kotiinyei ng'wony. Ki tinyei kweata kuinet ne tagunoot eng' kwenutap togeennyi.

⁶ Ak ki nyo ole mi mengit ne ki tinyei kuinoik aeng', ne ki ageer kotonone ngeguutap aineet, ak ki labat kweata kwo koryep mengit eng' nereegekyik che ng'woneen che po kimnateennyi.

⁷ Ki ageer ineendet koriikyi mengit, ak konereekyi miising', ak kokwer mengoto, ak koiri kuinoikyik tuwai. Ki mata kosich anyun mengoto kimnateet kotonon eng' tainnyi; ago ki wiirta kwo ng'wony ak kotyech; ama piit chii ne ki imuuch kosar mengit eng' eunnyi.

⁸ Ak ki eetkei kwesta miising'; ak ye kingo kagogimiit, koil kuinet ne oo. Ki mong' kuinoik ang'wanu che taagunotiin kotokyigei usoonaik ang'wan che po kipsengwet, kogeer ni kabo tai.

⁹ Ak eng' age eng' kuinoichooto ko ki mang'une kuinet ne ming'in age, ne ki eet miising' kotokyigei murot tai, ak kong'asiis, ak emet ne karaaran miising'.

¹⁰ Ki eet miising' kot koit ole mi lugeetap kipsengwet. Ki turur kuinonooto alak che po lugeet kobooto alak eng' kecheik, ak kotyechatyech.

¹¹ Ee ki ieetkei kot koit ole mi pounindetap lugeet; ak koistoe ineendet kagoochinet ne kibeelei ne po kotugul, ak ki kibut oldanyi ne tiliil.

¹² Ak ki kigoochi ineendet lugeet kobooto kagoochinet ne kibeelei ne po kotugul amu pistoet. Ki wiirchi ng'wony imanda, ak ki yai ko uu ye ki mach ak konyoor poroteet.

¹³ Ki agas anyun ineendet ne tiliil kong'alaali; ak ki teebe age ne tiliil nooto kang'alaali koleenji tebyei kot kotyanit ng'ang'utyet agobo kagoochinet ne kibeelei, ak pistoet ne ng'emisyei, si kigoito ole-tiliil kobooto lugeet ketyechatyech?

¹⁴ Ak ki wolji kole, “Kitiliili ole-tiliil ko kagogeskei koskoleng'usyek ak karonusyek eliphuusyek aeng' ak pogol somok.”

Kaarorunet agobo ng'ang'utyet

¹⁵ Kingo kaageer anee Daniel ng'ang'utyonooto, acheeng' anyun ale aguiyo; ak ogeero, ki tonon eng' tainnyu itonda ne uu ne po chii.

¹⁶ Ki agas kutitap chiito eng' kwenutap aineet ne ki kuuree Ulai, ne ki kuurso kole, “Gabriel, iboorchi chiichi koguiyo ng'ang'utyet.”

¹⁷ Ki riik anyun ye ki atonone; ak kingo it ole ami, aiyweisye, ak abut kot kotiiny togeet ng'wony. Ago ki leenjo, “Ee, weeriitap chii, iguiye anyun; amu po ng'ang'utyoniito peetuusyek che po let.”

¹⁸ Kingo ta kong'alaalwo, anuuch miising', asyep moo, ago ki twaa ak kong'eeta.

¹⁹ Ak ki le, keero, aboorun inai tuguuk che tuun piitu let che po nereegek; amu po ng'ang'utyonooto peetuut ne ki king'at ne po let.

²⁰ Mengit ne kaigeer ne tinyei kuinoik aeng' ko laitorinigap Media ak Persia.

²¹ Ak kwesta ko laitoryatap Greece, ak kuinet ne oo ne mi kwenutap togeennyi ko laitoryat ne po tai.

²² Ak kuinonooto ki il, eng' ole ki tononie chooto ang'wanu, ko tuun pitunee yooto pounatosyek ang'wanu che mang'une pororyet, ago ma eng' kimnateennyi.

²³ Ak eng' peetuusyek che po let che po pounatennywa, ye kagoyam pistoetap pistoik, kobiit laitoryat ne tong'oony togoch, ne iguitos ng'aleek che ung'ootiin.

²⁴ Ak tesaksei kimnateennyi, ago ma eng' kimnateennyi; ak kong'emis ne kikwong'ee, ak konyoor poroteet ak koyai ko uu ye machei. Ak kong'em ineendet che nyigoonen ak piik che tiliileen.

²⁵ Eng' ng'aalsennyi, kogoochi `ineendet kaberberisyet konyoor poroteet, ak koeetkei eng' muguleldanyi. Ak kong'em che chaang' komi kalyennywa, ak koborye pounindetap pounik, ak ilei ineegei ama twa chii.

²⁶ Po iman ng'ang'utyetap koskoleng'usyek ak karonusyek ne kagemwa. Ago tuch inyee ng'ang'utyonooto, amu po peetuusyek che chaang' che pwoonei.

²⁷ Ara ki atanui anee Daniel, amyan peetuusyo; ye ibata, ang'eet ak ayai poisyetap laitoryat. Ago ki akwong'ee ng'ang'utyonooto ak ma piit chii ne ki iguiyo.