DANIEL 6 - Bukuit Ne Tilil

Chaamset agobo Daniel

¹ Ki cham Darius konde pounik pogol agenge ak tiptem koboi pounateet komugul.

² Ki inde poisyek somok che kandoik koboi icheek, ne ki Daniel age eng' icheek; si koibei pounik ng'aleek koipchin icheek, si ma pet kiy ne po laitoryat.

³ Ki kigonyit anyun Daniel kosiir poisyechooto ak pounik, amu ki tinyei tamirmiryet ne myee miising'; ak ki ibwaat laitoryat kole konde ineendet koboi pororyet komugul.

⁴ Ki cheeng' anyun poisyechooto kobooto pounik kochaam Daniel agobo pounateet. Ma imuuch konyoorchi ineendet ng'olyoo anan ko leluut, amu ki po iman ineendet, ama ki nyoorchi kiy ne ma litit anan ko leluut.

⁵ Kole anyun pichooto, “Ma kinyoorchini Danielini kiy ne ki kikyine kobatee eng' ng'atuutyetap Kamuktaindennyi.”

⁶ Ki iyumgei anyun eng' kayanjinet poisyechooto kobooto pounik, koyumjigei laitoryat, ak komwachi ineendet kole, ee Laitorya Darius, iwe keny!

⁷ Kogo ng'alaaljigei poisyek tugul che po pounateet, kiptainik, pounik, piigap kapkirwook ak kirwoogik, kole kogimiit ng'atuutyet ne po kaplaitoryat, ak kong'at ng'atuutyet ne kiim, kole, age tugul ne soomei kiy kamuktain age tugul anan ko chii eng' peetuusyek sosom, kobatenen inyee, ee laitoryat, kewiirchin keriingetap ng'etuunyik.

⁸ Igimiit anyun ng'atuutyet, ee laitoryat, ak isir kaineng'ung' eng' siruutichooto, si ma kiwal, ko uu ng'atuutyetap Medik ak Persik, ne ma walaksei.

⁹ Ki sir anyun Laitoryat Darius kainennyi eng' siruutichooto, kobooto ng'atuutyet.

¹⁰ Nganda ki nai Daniel kole kagosir laitoryat kainet ko uu nooto eng' siruutichooto, ko ki testai kwo koonnyi ne po parak, ne ki tinye tirisyok che ki yaatatin kotokyingei Jerusalem, ak kogutuny konyil somok eng' peetuut, ak kosa, komwachi kongoi Kamuktaindennyi, ko uu ye kocham koyaei.

¹¹ Ki iyumgei anyun pichooto eng' kayanjinet, ak konyoor Daniel kosaaei ak koriirchin Kamuktaindennyi.

¹² Ki riik anyun pichooto, ak kong'alaal eng' taitap laitoryat agobo ng'atuutyetap laitoryat koleenji, “Ee Laitoryat! Tos ki ma isir ng'atuutyet ak inde kaineng'ung' ing'at ile eng' peetuusyek sosom, age tugul ne saaei kiy, ngo kamuktain age anan ko chii, kobatenen inyee, ee laitoryat, kewiirchin keriingetap ng'etuunyik?” Kowol laitoryat kole, “Po iman kiito, ko uu ng'atuutyetap Medik ak Persik, ne ma walaksei.”

¹³ Ki wol anyun pichooto eng' taitap laitoryat kole, “Ma iitin Daniel-inooto ne po lagogap piik che ki kiluul che po Judah, ee laitoryat, anan koiit ng'atuutyet ne ki isir ak inde kaineng'ung', ago saaei konyil somok eng' peetuut.”

¹⁴ Kingo kas anyun laitoryat ng'aleechuuto, koaragen, ak komach kotyach Daniel. Ki tyem kole kosar ineendet agoi kororokto asiis.

¹⁵ Ki iyumgei anyun pichooto eng' kayanjinet koyumjigei laitoryat ak koleenji ineendet, “Ee laitoryat, nai ile ng'atuutyetap Medik ak Persik koma kiwalei, ng'atuutyet anan etanutik che igimiiti laitoryat.”

Daniel ak ng'etuunyik

¹⁶ Ki ng'atiis anyun laitoryat, ak ki kimut Daniel ak kewiirchi keriingetap ng'etuunyik. Ki ng'alaalji `laitoryat Daniel koleenji, “Saruun Kamuktaindeng'ung' ne iote kotugul.”

¹⁷ Ki kiip koita ak kegeree kurgeetap keriinget. Ki ng'ooch laitoryat eng' ng'ooksennyi, kobooto ng'ooksetap kiptainikyik, si ma kiwal kiy agobo Daniel.

¹⁸ Ki wo anyun laitoryat oldanyi ne po laitornatet, ak korugutkei kemounooto; ama kiip tuguugap tyenwogik koba tainnyi, ak ma inuuch.

Kesaru Daniel

¹⁹ Ki ng'eet anyun laitoryat karon miising', ak kwo kochaakta ole mi keriingetap ng'etuunyik.

²⁰ Kingo riikta anyun keriinget ole mi Daniel, kowaach laitoryat eng' arageneet kole “Ee Daniel, otwogindetap Kamuktaindet ne sabei, tos imuuchi Kamuktaindeng'ung' ne iote kotugul kosarun eng' ng'etuunyik?”

²¹ Koleenji anyun `Daniel laitoryat, “Ee laitoryat, iwe keny.

²² Koiyok Kamuktaindennyu malaikaiyandennyi koger kutusweegap ng'etuunyik, ama ita kiy, amu ma kinyoorcha kiy ne ya eng' tainnyi; ak kogeny, ee laitoryat, tomo ayai kiy ne ya eng' taing'ung'.”

²³ Ki paibait anyun laitoryat miising', ak kong'at kole kegonop Daniel eng' keriinget. Ki kigonop anyun Daniel eng' keriinget, ama kinyoor ole koam kiy eng' poortanyi, amu ki imang'u Kamuktaindennyi.

²⁴ Ki ng'at laitoryat ng'atuutyet, ak ki kimut pichooto ki itaami Daniel, ak kewiirchi icheek keriingetap ng'etuunyik, icheeget kobooto lagokwak ak osotikwak. Ak kotom koit keriinget oriit ko kital ng'etuunyik icheek ak kotonaton kawekwak.

²⁵ Ki sirchi anyun `Laitoryat Darius piik ak pororyosyek tugul ak che po kutusweek tugul che menyei ng'wony komugul; koleenji, “Ingotesak kaalyeet eng' okweek!

²⁶ Ang'ate ng'atuutyet ale ingobotanso piik che mi pounatetap laitornatennyu ak koiyweis eng' taitap Kamuktaindetap Daniel: Amu ineendet ko Kamuktaindet ne sabei, ak kotebyei koigeny. Laitornatennyi koma king'emei, ak pounatennyi koma mi ole igeesunegei.

²⁷ Ityachi ak kosaru, yaei kaboorunoik ak kwang'utik eng' kipsengwet ak ng'wony; ineendet ne kogosar Daniel eng' kimnateetap ng'etuunyik.”

²⁸ Ki nyoor anyun Daniel poroteet eng' laitornatetap Darius ak eng' laitornatetap Cyrus Persiaindet.