DANIEL 5 - Bukuit Ne Tilil

Igoortap Belshazzar

¹ Ki yachi laitoryat Belshazzar igoorto ne oo kiptainikyik eliphuut, ak koei divaik eng' taitap pichooto eliphuut.

² Ye kita koei Belshazzar divaik, kong'at keip tereenik che po thahabu ak che po fedha che ki ibu Nebukadnezar kwandanyi eng' Hekaluut ne ki mi Jerusalem, si kobiit koeise laitoryat ak kiptainikyik, osotikyik ak chebaigeinikyik.

³ Ki kiip anyun tereenigap thahabu ak fedha che ki kiibune hekaluut eng' Jerusalem, kootap Kamuktaindet; ak ki eisee laitoryat ak kiptainikyik, osotikyik ak chebaigeinikyik.

⁴ Ki ee divaik ak kolas kanamonigap thahabu ak che po fedha, che po sugunwet, che po kariik, che po keetiik ak che po koik.

Siruutik che mi inaat

⁵ Ki took eng' sainooto mooriigap eutap chiito, ak ki sir inaatutap kootap laitoryat kotokyigei tait. Ki keer laitoryat eunooto ki sirisyei.

⁶ Kowalak anyun togeetap laitoryat, ak koim ineendet kabwaatutikyik. Ki irigisiis ole tuiyechin kawegap suennyi ak kobirgei kutung'oikyik.

⁷ Ki kuurso anyun laitoryat eng' kutit ne oo kimut ng'amotigap kecheik, Kaldeik ak chepsogeinik. Ki ng'alaalji `laitoryat piik che ng'oomen che po Babilon koleenji, “Chii age tugul ne somani siruutichu ak koboorwo kaarorennyi, kilaakyin ngoryeet ne arus ne piriir ak kilaakyi kaatinnyi sirimdap thahabu, ak koek pounindet ne po somok eng' pounateet.”

⁸ Ki pwa anyun piik tugul che ng'oomen che po laitoryat, ago ma imuuch kosoman siruutichooto, anan koboorchi laitoryat kaaroret.

⁹ Ki iimak miising' anyun laitoryat Belshazzar ak ki walak togeennyi, ak ki imogis kiptainikyik.

¹⁰ Ki nyo anyun chebyosetap kaplaitoryat kootap igoorto amu ng'aleegap laitoryat ak kiptainikyik. Ki ng'alaal chebyosanooto kole, ee laitoryat, iwe keny! Amat ingoiimin kabwaatutiguk anan kowalak togeng'ung'.

¹¹ Miitei chiito eng' pounateng'ung' ne menyei tamirmiryetap kamuktaik che tiliileen. Ki kinyoorchi chiichooto eng' peetuusyegap kwandang'ung' lapkeiyet ak naet ak utaatyet, ne uu utaatyetap kamuktaik. Ki inde `kwandang'ung', Laitoryat Nebukadnezar ineendet koek kiptaiyatap piik che ng'oomen che ng'oorsei, ng'amotigap kecheik, Kaldeik ak chepsogeinik;

¹² amu ki kinyoorchi Daniel tamirmiryet ne myee kot, naet, kaguiyet, kaaroretap karwotitaosyek, ak ng'ang'eetap ng'aleek che ung'ootiin, ak kaboorunetap tuguuk che iimi piich, ne kiguure laitoryat Belteshazzar. Iyookte anyun keguur Daniel, si koboor ineendet kaaroret.

Kaaroretap siruutik

¹³ Ki kimut anyun Daniel konyo taitap laitoryat. Ki ng'alaal laitoryat koleenji Daniel, “Tos ii Daniel, ne ii po lagogap piik che ki kiluul che po Judah, che ki imutu laitoryat kwandanyu eng' Judah?

¹⁴ Koagas agobo inyee keele menyin tamirmiryetap kamuktaik, ak keele itinye lapkeiyet ak naet ak utaatyet ne siirtoot.

¹⁵ Ak kagimut piik che ng'oomen, ng'amotigap kecheik, kobwa tainnyu, si kobiit kosoman siruutichuuto, ak koboorwo kaarorennywa, ago ma imuuch koboor kaaroretap kioto.

¹⁶ Ago koagas agobo inyee keele imuuchi iaror ak ibooru tugun che iimi piich. Ngot imuuchi anyun isoman siruutichuuto ak iboorwo kiit ne mwaei, kilaagun anyun ngoroik che aruseen ne piriir ak kilaakyi kaating'ung' sirimdap thahabu, ak iegu pounindet ne po somok eng' pounateet.”

¹⁷ Kowolji anyun `Daniel laitoryat koleenji, ingobunjin kagoochinoiguk, anan igoochi melekweguk chiito age! Ago asoomanjini laitoryat siruutichooto ak aboorchini ineendet kaaroret.

¹⁸ Ee laitoryat, ki igoochi Kamuktaindet Ne Toroor Miising' Nebukadnezar kwandang'ung' pounateet, ooindo, toroornatet ak etunateet.

¹⁹ Ki potanso ak koiyweis eng' tainnyi piik tugul, pororyosyek tugul, ak che po kutusweek tugul, amu ooindo ne ki igoochi ineendet. Kibarei ne ki machei kobar, kibagaaktoi kosap ne kimakyin kosap, ki ieeti ne kimachei koeet, ak ki iming'ini ne kimachei koming'in.

²⁰ Ago ye kingo eetkei eng' muguleldanyi ak kouiit tamirmiryennyi kot koboisye menoteet, kechoor eng' ng'echerennyi ne po laitornatet, ak kerebe toroornatennyi.

²¹ Ki kioon kwo eng' ole mi piik, ak ki kiyai naennyi koigei ne po tyong'ik. Ki meny kobooto sigirogap timiin, ak ki kibae susweek ko uu tuuga. Ki ibutyi rewoot poortanyi agoi konai kole pou Ne Toroor Miising' pounatetap piik, ak kogoochin age tugul ne makyin koboi.

²² Ak inyee Belshazzar, weeriinnyi, koma iming'inge eng' muguleldang'ung', nganda ki ingen tuguuchuuto tugul!

²³ Ago ki ietkei obelgei ak Kiptaiyat ne po kipsengwet; ak kogeip tereenigap koonnyi kobwa taing'ung', ak kooee divaik, inyee ak kiptainiguk, osotiguk ak chebaigeiniguk; ak koilasu kanamonigap fedha, ak che po thahabu, che po sugunwet, che po kariik, che po keetiik, ak che po koik, che ma keertoi, ama kastoi, amaingen kiy. Ama itoroor Kamuktaindet ne tinyei kabuseng'ung' eng' eunnyi, ak chechiik ortinweguk tugul.

²⁴ Ara kogiyok anyun euut ne punu tainnyi ak ko kisir siruutichu.

²⁵ Chu siruutik che ko kisir: MENE, MENE, TEKEL, UPHARSIN.

²⁶ Ni anyun ko kaaroretap kiito: MENE; kagoiit Kamuktaindet pounateng'ung' ak kogees.

²⁷ TEKEL; kagirogendoenen eng' kiit ne kirogendoisye ak kagegeer keele ma ko ii tya.

²⁸ PERES; kagepchei pounateng'ung' ak kagigoochi Medik ak Persik.

²⁹ Ki ng'at anyun Belshazzar ng'atuutyet, ak kolaakyi `piik Daniel ngoryeet ne arus ne piriir, ak kolaakyi kaatinnyi sirimdap thahabu, ak komwaita agobo ineendet kole egu pounindet ne po somok eng' pounateet.

³⁰ Ki kibar kemounooto Belshazzar, laitoryatap Kaldeik.

³¹ Ak ki nam Darius Medindet laitornatet, ko po olo po kenyiisyek tamanwogik lo ak aeng'.