DANIEL 4 - Bukuit Ne Tilil

Karwotitetap Nebukadnezar

¹ Kamwachi `Laitoryat Nebukadnezar piik tugul, pororyosyek tugul, ak che po kutusweek tugul che menyei ng'wony tugul koleenji: Ingotesak kaalyeet eng' okweek!

² Ki ageer ale myee abor kaboorunoik ak kwang'utik che ki yaiywo Kamuktaindet Ne Toroor Miising'.

³ Eechen ne tya kaboorunoikyik! Kiimeen ne tya kwang'utikyik! Laitornatennyi ko laitornatet ne po koigeny, ak ko po pounatennyi ibinwek tugul.

⁴ Ki amunyi anee Nebukadnezar eng' koonnyu, ak atalbisi eng' koonnyu ne po laitornatet.

⁵ Ki arwotyi karwotitoet ne ki imua; ak ki ima kabwaatutik ak ng'ang'utik che ki pwanjo ami itogunnyu.

⁶ Ki ang'at anyun ng'atuutyet ale kimut piik tugul che ng'oomen che po Babilon kobwa tainnyu si kobiit koboorwo kaaroretap karwotitoet.

⁷ Ki pwa anyun piik che ng'oomen che ng'oorsei, ng'amotigap kecheik, Kaldeik ak chepsogeinik. Ki amwachi icheek karwotitaonooto, ago ma imuuch koarorwo.

⁸ Ago eng' let, konyo Daniel tainnyu, ne ki kiguure Belteshazzar, ko uu kainetap kamuktaindennyu, ne menyei tamirmiryetap kamuktaik che tiliileen. Ki amwachi ineendet karwotitaonooto aleenji:

⁹ “Ee Belteshazzar, pounindetap piik che ng'oomen che ng'oorsei, amu angen ale menyin tamirmiryetap kamuktaik che tiliileen, ama mi ung'ootyet ne iimin. Mwaiwo anyun ng'ang'utigap karwotitoennyu che ki ageer ak kaarorennyi.

¹⁰ Ye ki ami itogunnyu; ko ki ageer keetit komi kwenutap ng'wony, ak ki oo kooindap tononennyi.

¹¹ Ki eet keetoto ak kogimiit, kiit kipsengwet walinnyi, ak ki took keetoto eng' ole poochin ng'wony tugul.

¹² Ki korooron sogekyik, ak ki chaang' logoekyik, ak ki tinyei amitwogik che yamei piik tugul. Ki uuree tyong'igap timiin, ak ki meny toriitigap parak mooriikyik, ak ki kibae keetoto piik tugul.

¹³ Ki atestai ageer, eng' ng'ang'utik che ki pwanjo ami itogunnyu, ak ogeero, ki choorgei riibindet ne tiliil kobunu kipsengwet.

¹⁴ Ki mwa eng' kutit ne oo kole oep keetoto ak oep mooriikyik, otumdum korara sogekyik ak oseer logoekyik. Ingoba tyong'ik eng' kelunnyi, ak koba toriitik eng' mooriikyik.

¹⁵ Ago omete musukyennyi ak tigitik eng' ng'wony, ko miroot eng' karnet ak sugunwet, eng' ole mi susweek che ng'orng'or. Ingobutyi ineendet rewootap kipsengwet, ak kotebi kobooto tyong'ik che agetoos, eng' susweegap ng'wony.

¹⁶ Ingowalak naennyi si ma igei ne po chii, ak ingigoochi ineendet naet ne po tyondo. Ak ingotep ko uu nooto kot kogeskei peetuusyek che ki king'at, konyil tisap.

¹⁷ Punu kirwoogoni ng'atuutyetap riibiik, ak punu ma ko nooto ng'olyootap icheeget che tiliileen, si kobiit konai che saptos kole pou Ne Toroor Miising' pounatetap piik, ak kogoochin age tugul ne makyin, ak koeeti piik che nyerootiin miising' koboi.

¹⁸ Ki ageer anee Laitoryat Nebukadnezar tuguuchuuto eng' karwotitoet. Ee inyee Belteshazzar, mwaa kaaroret, amu ma imuuchi piik tugul che ng'oomen che po pounatennyu koboorwo kaaroret; ago imuuchi inyee, amu menyin tamirmiryetap kamuktaik che tiliileen.”

Koaroru Daniel agobo karwotitoet

¹⁹ Ki toptoben anyun ne matya Daniel, ne ki kiguure Belteshazzar, ak kiim ineendet kabwaatutikyik. Ki mwachi `laitoryat ineendet koleenji, “Beltesasar, amat ingoiimin karwotitoet, anan ko kaarorennyi.” Kowol Belteshazzar kole, ingobunji karwotitoet icheek che wechin, ak ingobunji kaarorennyi puuniguk!

²⁰ Keetit ne koigeer ne kobiitei ak ko kiim, ne itei walinnyi kipsengwet, ak kotaagu eng' ng'wony tugul,

²¹ ne korooron sogekyik ak ko chaang' logoekyik, ak kotinyei amitwogik che yamei piik tugul, ne keet-kelinnyi komenyei tyong'igap timiin, ak eng' mooriikyik komenyei toriitigap parak.

²² Inyee nooto, ee laitoryat, ne koieetu ak igimiitu. Kogotesak etunateng'ung' ak koitei kipsengwet, ak koitei ole poochin ng'wony pounateng'ung'.

²³ Ak ko uu ye ki keer laitoryat `riibindet ne tiliil kochoorugei eng' kipsengwet ak kole, oep keetit ak oong'em, ago obagaakte tigitigap musukyennyi ak eng' ng'wony, ko miiroot eng' karnet ak sugunwet, eng' ole mi susweek che ng'orng'or. Ingobutyi ineendet rewootap kipsengwet, ak kotebi kobooto tyong'igap timiin, kot kogeskei peetuusyek che ki king'at, konyil tisap.

²⁴ Ni anyun kaarorennyi, ee laitoryat, nooto ng'atuutyetap Ineendet Ne Toroor Miising', ne kanyonji kiptaiyandennyu laitoryat:

²⁵ keele ki onin iwe eng' ole mi piik, ak imeny kobooto tyong'igap timiin, ak kegoonin iaget ko uu tuuga, ak kobutyin rewoot, kot kogeskei peetuusyek che ki king'at, konyil tisap; agoi inai ile pou Ineendet Ne Toroor Miising' pounatetap piik, ak kogoochin age tugul ne makyin.

²⁶ Ak ko uu ye ki ng'at icheek kebagaakta musukyet ak tigitik eng' ng'wony; inyooru kogeny pounateng'ung' ye kainai ile pounisyei kipsengwet.

²⁷ Nooto anyun, ee laitoryat, ingochamak kirwoogennyu eng' inyee, ak itabaanegei tengekwogiguk ye iyae imanda, ak itabaanegei yaitwogiguk ye iriiree kibananook; si kotesak kalyeng'ung'.

Kasuldaetap karwotitoet

²⁸ Ki pwanji Laitoryat Nebukadnezar tuguuchuuto tugul.

²⁹ Ye ki keskei arawek tamanu ak aeng', ye ki wendote ineendet paragutap kootap laitoryat ne po Babilon,

³⁰ kong'alaal laitoryat kole, “Tos ma Babilon ne oo ni, ne ki ateech koek ole menyei laitoryat, eng' kamugetap kimnateennyu ak agobo toroornatetap eutunatennyu?”

³¹ Kingo ta kong'alaali laitoryat, kotwek kutit ne punu kipsengwet, kole: “Ee Laitoryat Nebukadnezar, kagimwaun ng'olyoondoni: Keele, kaistoenengei pounateet!

³² Ki onin eng' ole mi piik, ak imeny kobooto tyong'igap timiin. Ki koonin iagete ko uu tuuga, agoi kogeskei peetuusyek che ki king'at, konyil tisap; agoi inai ile pou Ne Toroor Miising' pounatetap piik ak kogoochin age tugul ne makyin.”

³³ Ki isulda kioto sainooto eng' Nebukadnezar. Ki kioon eng' ole mi piik, ak koaget ko uu tuuga ak ki ibutyi rewoot poortanyi, kot koeegitu suumeekyik ko uu koroorigap kipsiichit ak koigei siyookyik che po toriitik.

Kotoroori `Nebukadnezar Kamuktaindet

³⁴ Kingo keskei peetuusyechooto, anyal anee Nebukadnezar kipsengwet, ak koweekyagei naennyu, aweekyini kongoi Ne Toroor Miising', alasu ak agoonyit ineendet ne sabei koigeny. Amu pounatennyi ko pounateet ne po koigeny, ak ko po laitornatennyi ibinwek tugul.

³⁵ Ki iti piik tugul che menyei ng'wony keele puch ak koyachin lugeetap kipsengwet ko uu ye machei, kobooto piik che menyei ng'wony. Ama mi chii ne imuuchi kogirinda eunnyi, anan koleenji ineendet, “Iyae nee?”

³⁶ Ki weekyagei eng' yooto naennyu; amu ki weekyagei etunatennyu ak karaaranindanyu amu toroornatetap pounatennyu. Ki pwa ole ami kirwoogikyuk ak kiptainikyuk; ak ki kigimiita eng' pounatennyu, ak ki kiteswa etunateet ne karaaran miising'.

³⁷ Alasu anyun anee Nebukadnezar, ak atoroori ak agonyiti Laitoryatap kipsengwet, amu po iman poisyonikyik tugul, ak ko po kirwooget ortinwekyik; ak imuuchi koming'in icheek che pendoti eng' menoteet.