DANIEL 3 - Bukuit Ne Tilil

Kanamwetap thahabu

¹ Ki itany Nebukadnezar laitoryat kanamwet ne po thahabu, ne kooindap tononennyi ko ki mitainik tamanwogik lo che po euut ak tebeesindanyi ko mitainik lo che po euut; ki lumda ineendet eng' warengetap Dura eng' emetap Babilon.

² Yeityo koyookto Laitoryat Nebukadnezar kiyum pounik, kandoik, kirwoogik che tilei ng'aleek, riibiigap tuguuk, piigap kapkirwook, ng'amotigap ng'atuutik ak tononjinik tugul che po emotinwek, kobwa katabaanetap kanamwet ne kiga lumda Laitoryat Nebukadnezar.

³ Koyumgei anyun pounik, kandoik, kirwoogik, tiligap ng'aleek, riibiigap tuguuk, piigap kapkirwook, ng'amotigap ng'atuutik ak tononjinik tugul che po emotinwek, koyumjigei katabaanetap kanamwet ne kiga lumda Laitoryat Nebukadnezar. Ye ki tonondos eng' taitap kanamwet ne kiga lumda Nebukadnezar,

⁴ komwa anyun ng'alaalindet ne mwaitoi ng'aleek eng' kutit ne oo kole kaging'atak, okweek piik, pororyosyek ak che oo po kutusweek che teer, keele,

⁵ eng' sait age tugul ne kogas cheetap igoondit, ndurerut, ketubet, chepkesemit, kibugandet, ndurerut ne oo ak tyenwogik alak tugul, obutyi ng'wony ak olasu kanamwetap thahabu ne ki lumda laitoryat Nebukadnezar.

⁶ Ak age tugul ne ma ibutyin ng'wony ak kolas, kewiirchin eng' sainooto maat ne oo ne lalei miising'.

⁷ Kingo kas anyun piik tugul cheetap igoondit, ndurerut, ketubet, chepkesemit, kibugandet ak tyenwogik alak tugul, kobutyi ng'wony piik tugul, pororyosyek, ak che po kutusweek che teer ak kolas kanamwetap thahabu ne kiga kolumda Laitoryat Nebukadnezar.

Kirwookyin choronogap Daniel

⁸ Ki riik anyun eng' sainooto Kaldeik alage koip kataamset ne kitaame Yahudik.

⁹ Komwachi `pichooto Laitoryat Nebukadnezar koleenji, ee laitoryat, iwe keny!

¹⁰ Ee laitoryat, koing'at inyee ile chii age tugul ne kasei cheetap igoondit, ndurerut, ketubet, chepkesemit, kibugandet, ak ndurerut ne oo kobooto tyenwogik alak tugul, kobutyi ng'wony ak kolas kanamwetap thahabu,

¹¹ ak age tugul ne ma ibutyin ng'wony ak kolas, kewiirchin maat ne oo ne lalei miising'.

¹² Miitei Yahudik alak che ki inde koboi ng'aleegap emetap Babilon, Shadrak, Meshak, ak Abed-nego; ma iitin pichuuto, ee laitoryat. Maotei kamuktaiguk, ama ilasu kanamwetap thahabu ne koilumde.

¹³ Ki ng'at anyun Nebukadnezar eng' koroomnatennyi ak nereegek che ng'woneen kole kimut Shadrak, Meshak, ak Abed-nego. Ki kimut anyun pichuuto kobwa taitap laitoryat.

¹⁴ Koteebe Nebukadnezar icheek koleenji, “Ee, Shadrak, Meshak ak Abed-nego, tos kootil iman ole moote kamuktaindennyu, anan olasu kanamwetap thahabu ne koalumde?

¹⁵ Ngot ochoboge anyun eng' sait ne kogas cheetap igoondit, ndurerut, ketubet, chepkesemit, kibugandet ak ndurerut ne oo, kobooto tyenwogik alak tugul, obutyi ng'wony ak olasu kanamwet ne koayai, komyeeitu. Ago ngot ko molasu, kewiirchinok maat ne oo ne lalei miising' eng' sainooto. Ng'oo kamuktain ne tos sarwok eng' eunnyu?”

¹⁶ Kowolji anyun `Shadrak, Meshak ak Abed-nego laitoryat koleenji, “Ee Nebukadnezar, ma kimage kiy kewolun eng' ng'olyoondoni.

¹⁷ Ngot ko uu nooto, komuuchi Kamuktaindennyo ne keote kosarwech eng' maat ne oo ne lalei miising'; ak kosarwech ineendet eng' eung'ung', ee laitoryat.

¹⁸ Ago ngot koma uu nooto, ko kanyool inai inyee, ee laitoryat ile ma kiote kamuktaiguk anan kilasu kanamwetap thahabu ne koilumde.”

Maat ne lalei miising'

¹⁹ Konyi anyun nereegek che ng'woneen Nebukadnezar, ak kowalak togeennyi konereekyin Shadrak, Meshak ak Abed-nego. Kong'alaal anyun ak kong'at kole kilaal maat ne oo kotesak konyil tisap kosiir ye cham kilaali,

²⁰ ak kong'at piik alak che nyigoonen che ki po lugeennyi korat Shadrak, Meshak ak Abed-nego si kowiirchi maato oo lalei miising'.

²¹ Ki kiratita anyun pichooto ngoroikwak ak che taae metowekwak, ngoroikwak che kooen, kobooto ngoroikwak alak ak ki kiwiirchi maata oo kolalei miising'.

²² Ki par anyun liplibenetap maata pichooto ki namei Shadrak, Meshak ak Abed-nego, amu ki koroom ng'atuutyetap laitoryat ak ki lalei maata oo miising'.

²³ Ak pichuuto somogu, Shadrak, Meshak ak Abed-nego, ko ratotiin, ko ki ibutyi anyun maata oo lalei miising'.

²⁴ Ki kwong' anyun Laitoryat Nebukadnezar ak kong'eet kochokyi. Ki ng'alaalji piikyik che po kapkirwook koleenji, “Tos, kama ki wiirchi ma piik somok ko ratotiin?” Kowolji anyun `pichooto laitoryat koleenji, “Iman, ee laitoryat.”

²⁵ Kowolji `ineendet icheek koleenji, “Ogeero, ageere piik ang'wan che ityagotiin, kobendoti eng' ma, ama am kiy; ak kergei itondap ne po ang'wan ak weeriitap kamuktaik.”

²⁶ Koriikyi anyun Nebukadnezar ole kibunei kebendi maata oo ki lalei miising' ak komwa kole, “Shadrak, Meshak ak Abed-nego, okweek otwogigap Kamuktaindet Ne Toroor Miising', omong'u obwa oli.” Komong' anyun Shadrak, Meshak ak Abed-nego eng' ma.

²⁷ Ak kogeer pounik, kandoik ak kirwoogik, ak piigap kapkirwook che po laitoryat, ko kagoyumgei pichuuto, kole ma peel maat poorwekwak, ama imel maat suumeekwak, amawalogis ngoroikwak, ama ng'uu maat eng' icheek.

Tyendap murenjooto somok

²⁸ Kong'alaal anyun Nebukadnezar komwa kole iberuurot Kamuktaindetap Shadrak, Meshak ak Abed-nego, ne kagoyok malaikaiyandennyi ak kosar otwogikyik che koimang'u ineendet. Kogobistoe `icheek ng'olyootap laitoryat, ak kogoito poorwekwak si ma oot anan kolas kamuktain age tugul kobatee Kamuktaindennywa ineegei.

²⁹ Kang'at ng'atuutyet anyun ale kitonatoni piik alak tugul, pororyet age tugul, ak piigap kutit age tugul, che mwaei kiy age tugul ne ya agobo Kamuktaindetap Shadrak, Meshak ak Abed-nego, ak keyai kooriikwak koek kapng'atat; amu ma mi kamuktain ne imuuchi kosar chii ko uu ni.

³⁰ Koeet anyun `laitoryat Shadrak, Meshak, ak Abed-nego, eng' emetap Babilon.