DANIEL 11 - Bukuit Ne Tilil

¹ Ago ki atonon anee, eng' kenyiit ne po tai ne po Darius Medindet, agiil ak agimiit ineendet.

² Aboorun anyun ne po iman. Keero, ta kobiitu laitorinik somogu eng' Persia; ak egu mogoryot miising' ne po ang'wan kosiir chuun tugul. Ak ye kagogimiit amu mogornatosyekyik, kong'eet piik tugul kobargei ak pounatetap Greece.

³ Ak kobiit laitoryat ne kiim miising', ne tuun pounisyei eng' pounateet ne oo ak koyai ko uu ye machei.

⁴ Ak ye kagobiit, keng'emei laitornatennyi, ak kopcheigei kotokyigei usoonaik ang'wan che po kipsengwet; ago ma tuun punjin iyotennyi, ama isubi ko uu pounatennyi ne ki pou; amu kitutu laitornatennyi kobunji alak che ma pooto chuuto.

⁵ Tuun kimitu laitoryat ne po murot tai, ago age eng' pounikyik ko tuun kimitu kosiir ineendet ak konyoor pounateet; egu pounatennyi pounateet ne oo.

⁶ Ye igeskei kenyiisyo, konamgei; ak konyo cheptap laitoryatap murot tai ole mi laitoryatap murot kaataam kochamyogei. Ago mang'etyin chebooto kimnateetap eunnyi; ama tononi laitoryandanooto anan eunnyi. Kigoitoi chebooto, piik che ki imutu ineendet ak lakweennyi, ak chiito ne ki kimiti ineendet eng' peetuusyechooto.

⁷ Ago mong'u age ne punu temetap tigitikyik ne igeeri ineendet, ne nyoonei ole mi lugeet, ak kochut irimeetap laitoryat ne po murot kaataam, ak kobargei ak pichooto ak koterteer;

⁸ ak koip kogeny kanamonikwak kobooto che ki kitanyi, ak tereenikwak che myachen che po fedha ak che po thahabu; koluul koba Misiri. Ak kotebi kenyiisyek alak, ama ibookyi laitoryat ne po murot kaataam.

⁹ Kasarta age ko tuun ibookyin pounatetap laitoryat ne po murot tai, ak koweekyigei emennyi.

¹⁰ Tuun yaei lugeet weeriikyik ak koyum tuiyet ne oo ne po lugoosyek, che tuun pwoonei, ak kochwalda koyom emet ak kobun olooto, koyai lugeet agoi irimennyi.

¹¹ Ak konereech laitoryatap murot tai ak komong' kobargei ak laitoryatap murot kaataam, ak kochop tuiyet ne oo, ne nganda uu nooto, kindo tuiyonooto eunegap puunikyik.

¹² Ak ye kagimut tuiyet, koeetkei eng' muguleldanyi, ak kobar tamanusyegap eliphuusyek, ago ma koi iterteeris.

¹³ Ak koweigei laitoryatap murot kaataam kochop lugeet ne oo kosiir ni kabo tai; ak konyo ko kagobata peetuusyek, chooto ko kenyiisyek alak, kobooto lugeet ne oo ak tuguuk che chaang'.

¹⁴ Tuun ng'eetos che chaang' eng' peetuusyechooto kogirinda laitoryatap murot tai. Tuun ieetkei lagogap piik che koroomen eng' piiguk kole si kogimiit ng'ang'utyet; ago ibutos.

¹⁵ Konyo anyun laitoryatap murot kaataam, ak kowasyi ng'ung'unyek, ak konam nganaseet ne ng'ootaat komyee. Ak ma kirindoi lugosyegap murot tai, anan agot piikyik che ki kilewen, ama tuun piitu kimnateet age tugul ne kirindoisye.

¹⁶ Ago ineendet ne nyoonei kobaregei ak chiichooto koyaei ko uu ne machei, ama piitu chii ne imuuchi kotonon eng' tainnyi. Ak kotonon ineendet eng' emet ne karaaran miising', ak mi yooto tugul eunnyi.

¹⁷ Igiilegei konyo kobooto kimnateetap laitornatennyi komugul, ak koyai kasyinet ak ineendet; ak koyai ko uu ye machei. Ak kogoochi ineendet kwony kotun yeityo koboisye kong'em pounateet; ago ma tononi, ama punjin.

¹⁸ Ak ye ibata niito, kotokyigei ngeguusyek, ak konam che chaang'. Ago igeesu pounindet chotisyet ne ki igoitoi ineendet; ee, weekyin ineendet chotisyennyi.

¹⁹ Yeityo koweek kotokyi togeennyi irimoigap emennyi, ago kinachi ak kobut ak ma kenyooru.

²⁰ Ye ibata niito, kobiit ne igeeri ineendet ne igoochin taagindetap aisuruut kobun kwenutap toroornatet ne po pounateet; ago king'emei ineendet eng' peetuusyek che ng'ering', ma eng' nereegek anan eng' lugeet.

Laitoryat ne ya

²¹ Ak kogeer ineendet `chiito age ne kasasei, ne ki ma igoochi icheek teegistap pounateet, ago tuun nyoonei eng' peetuusyegap kaalyeet ak konam pounateet eng' mwaigutnateet.

²² Ak keisto lugeet ne oo ak keton eng' tainnyi; kobooto pounindetap kayomisutyet agine.

²³ Ak ye kagobata kasyinet, ko tuun togosu kobois eng' ng'aalset ak kogimiit kobooto piik che ng'ering'.

²⁴ Ipookyin komoswek che akwaen che po emet eng' peetuusyegap kaalyeet; ak koyai kiit ne ki ma yai kwanisyekyik, anan kwanisyegap kwanisyekyik; ak koseerchi kwenunnywa parunenik ak luulenik, ak tuguuk. Chobei chobutikyik agobo irimoik, ago po peetuusyo kityo.

²⁵ Ak kong'eet kimnateennyi ak nyiganatennyi kobargei ak laitoryatap murot tai kobooto lugeet ne oo; ak koyai lugeet laitoryatap murot tai kobooto lugeet ne oo miising' ak ko kiim. Ago ma tononi, amu chobei icheek chobutik agobo ineendet.

²⁶ Ee, ng'emei ineendet `che amei amitwogikyik. Ak kochwalda koyom lugeennyi emet ak kobutyo che chaang' ko kagebar.

²⁷ Ak che uu laitorinichuuto tuwai, ko tuun tokyingei mugulelwekwak koyai yaityet, tuun tebyei eng' meset agenge ak komwaei lembechek. Ago maborei; amu ta koitu kagesunet eng' peetuut ne ki king'at.

²⁸ Tuun weekyigei emennyi kobooto mogornateetap tuguuk che chaang'; ak kowech muguleldanyi kayomiset ne tiliil. Ak koyai ko uu ye machei, ak koweekyigei emennyi.

²⁹ Weeksei kogeny eng' peetuut ne ki king'at, ak konyo komostap murot tai; ago ma tuun piitu eng' peetuusyek che po let ko uu eng' peetuusyek che po tai.

³⁰ Amu tuun pwaanjin melisyegap Kitim kobargei ak ineendet; arageni anyun ak koweigei. Tuun nereechi ak kowech kayomiset ne tiliil, ak koyai ko uu ye machei. Ak koweigei kogeny ak kocham icheek che paraktoi kayomiset ne tiliil.

³¹ Ak kotononso lugoosyek eng' komostanyi ak komurwon ole-tiliil kobooto irimeet, ak koisto kagoochinet ne kibeelei ne po kotugul, ak konde kiit ne kiwechei ne ng'emisyei.

³² Imaas ineendet eng' mwaigutnateet che yaei yaityo kowechei kayomiset; ago piik che ingen Kamuktaindennywa ko kimegitu ak koyai poisyonik che kiimeen che kikwong'ee.

³³ Ak koneet `che utaatiin che mi kwenunnywa piik che chaang'; nga uu nooto, eng' peetuusyek che chaang', kibarei eng' rotwetap chok ak eng' maat, eng' luuleet ak eng' kamutet.

³⁴ Ye kagobutyo anyun, ketoreti eng' toreteet ne matya, ago namegei che chaang' ak icheek eng' mwaigutnateet.

³⁵ Ak kobutyo alak eng' che utaatiin, si kobiit kitiliil, ki anyiny, ak keyai koleelagitu, kot koit peetuut ne po let, amu ta koitu peetuut ne ki king'at.

³⁶ Ak koyai laitoryat ko uu ye machei. Itorooregei ak koeetegei kosiir kamuktain age tugul, ak komwa tuguuk che kikwong'ee agobo Kamuktaindet ne pou kamuktaik. Nyooru ineendet poroteet kot kosulda nereegek, amu agoi keyaei nooto ki keng'at.

³⁷ Ama iiti kamuktaigap kwanisyekyik anan ne chamat eng' kwonyik, ama iiti kamuktain age tugul ago ieetegei kosiir tugul.

³⁸ Ago konyiti kamuktaindetap irimoik eng' komostanyi; ak kogonyit kamuktain ne ki ma nai kwanisyekyik, kogoochi thahabu, ak fedha, kobooto koik che po kamanuutyet ne oo, ak konunoik che po alyet ne oo.

³⁹ Ak konam irimoik che kiimeen miising' eng' toretetap kamuktain ne teer. Tesyin toroornatet age tugul ne chamei ineendet ak kogoochin `ineendet icheek koboi che chaang', ak kopchei emet kobunji kagaigaet.

⁴⁰ Eng' peetuusyek che po let kobookyin ineendet `laitoryatap murot tai. Ago ibookyin ineendet `laitoryat ne po murot kaataam ko uu kipchurchuryet, kobooto kariisyegap lugeet, ak piik che ketei paraisisyek, ak melisyek che chaang'. Ak kwo kochwalda koyom emotinwek ak kobun olooto.

⁴¹ Wendi ineendet kogeny emet ne karaaran, ak kigabui emotinwek che chaang', ago kisaru Edom, Moab ak chu eecheen che po lagogap Ammon eng' eunnyi.

⁴² Tokyin eunnyi kogeny emotinwechooto, ama chilili emetap Misiri.

⁴³ Ago pou ineendet konoraik che po thahabu ak che po fedha ak tuguuk tugul che po kamanuutyet ne oo che po Misiri; ak koosup ineendet piigap Libya ak Ethiopik.

⁴⁴ Ago iimi ineendet ng'aleek che punu kong'asiis ak che punu murot kaataam; ak kwo eng' nereegek che ng'woneen che eecheen kwo kong'emis ak kobar che chaang'.

⁴⁵ Ak koteech emaisyegap koonnyi ne po laitornatet eng' kwenutap nyanjet ak tulweet ne tiliil ne karaaran; ago tuun meei, ama toreti chii ineendet.