DANIEL 1 - Bukuit Ne Tilil

Daniel ak choronokyik eng' Babilon

¹ Eng' kenyiitap somok ne po laitornatetap Jehoiakim laitoryatap Judah, ko ki nyo Nebukadnezar laitoryatap Babilon Jerusalem, ak koyiem nganaseet.

² Ki igoochi `Kiptaiyat kimnateet Nebukadnezar koterteer Jehoiakim laitoryatap Judah. Ki kimut inee kobooto tuguuk alak che po kootap Kamuktaindet. Ki ip tuguuchooto koba emetap Sinar, ak konde kootap konoraik che po kamuktaikyik.

³ Ki ng'alaalji `Laitoryat Nebudkanezzar Aspenas pounindetap kiptainikyik, si komut alak eng' piigap Israel, che po iyoteetap laitoryat ak piik che taagunotiin.

⁴ Ki imut neranik che ki ma kotinyei peruut, ak ko korooron, che utaatiin eng' ng'omnateet tugul, che ingen tugun ak koguitos tugun, ak che tinyei kamuget kobois eng' kootap laitoryat. Ki magaat kineet icheek ng'omnateet ak kutitap Kaldeik.

⁵ Ki ng'at laitoryat kigoochi icheek amitwogigap laitoryat che yamei peetuut age tugul kobooto che po divaik che ki eei ineendet. Ki ng'at kole kineet icheek kenyiisyek somok, si ye ibata kenyisyechooto kigoochi koyai poisyet eng' taitap laitoryat.

⁶ Eng' neranichooto ko ki mi Daniel, Hananiah, Mishael, ak Azariah, kobun ooreetap Judah.

⁷ Ki toochi `pounindetap kiptainik icheek kainaik: Daniel ko ki kuuree Belteshazzar, Hananiah koguure Shadrak, Mishael koguure Meshak, ak Azariah ko ki kuure Abed-nego.

⁸ Ago ki til Daniel eng' muguleldanyi kole ma ing'wanitegei amitwogigap laitoryat ak divaik. Ara ki soom inee anyun pounindetap kiptainik kole si ma ing'wanitkei.

⁹ Ki igoochi anyun `Kamuktaindet Daniel konyoor chameet ak rireenet eng' taitap pounindetap kiptainik.

¹⁰ Ki leenji `pounindetap kiptainik Daniel, “Aiywei kiptayandennyu laitoryat ne ki ng'at amitwogikwok ak che oee, si ma keer ineendet kole yaach togoochikwok kosiir che po neranik che oaechine. Kosupkei ak nooto, ondoi sabeennyu ole ng'ooi eng' taitap laitoryat.”

¹¹ Koteebe `Daniel riibindet ne ki ng'at pounindetap kiptainik koriip inee, Hananiah, Mishael, ak Azariah

¹² koleenji, “Asoomin ale tyem otwogiguk eng' peetuusyek taman, ak ingogoonech sogeegap ingweek keam ak peek che kiee,

¹³ si igeer anyun togoochikyok ak togoochigap neranik che amei amitwogigap laitoryat; ak iyachi otwogiguk ko uu ye kegeer.”

¹⁴ Ki kasyi pounindet ng'olyoondonooto ak kotyem icheek eng' peetuusyek taman.

¹⁵ Ak kingo keskei peetuusyechooto tamanu, kotook togoochikwak ko korooron ak ko neryootiin kosiir neranik tugul che ki amei amitwogigap laitoryat.

¹⁶ Ki isto anyun riibindet amitwogikwak ak divaik che kita eei, ak kogoochi ingweek kityo.

¹⁷ Ago ki igoochi Kamuktaindet naet ak utaatyet neranichuuto ang'wan eng' kaneetetapkei tugul ak ng'omnateet. Ki tinyei Daniel kaguiyet ne po ng'ang'utik tugul ak karwotitaosyek.

¹⁸ Kingo keskei peetuusyek che ki kang'at laitoryat kole si kimut icheek kobwa ko, komut `pounindetap kiptainik icheek kobwa taitap Nebukadnezar.

¹⁹ Ak kingo ng'alaalji `laitoryat icheek, koma piit agot agenge eng' icheek tugul ne uu Daniel, Hananiah, Mishael, ak Azariah; ko uu nooto ko ki tebi anyun icheek koyai poisyet eng' kaplaitoryat.

²⁰ Eng' kiit age tugul ne po utaatyet ak naet ne ki kateepse `laitoryat pichooto, ko ki keer anyun ineendet kole siirei `pichooto konyil taman piik tugul che ng'oomen, che ng'oorsei, ak ng'amotigap kecheik che ki mi pounatennyi tugul.

²¹ Ak ki tebi Daniel agoi kenyiitap tai ne po Laitoryat Cyrus.