AMOS 8 - Bukuit Ne Tilil

Ng'ang'utyet ne po ang'wan: Kitonget ne mi logoek

¹ Ki iboorwo Kiptaiyat Kamuktaindet ne Toroor ko uu ni: Ki mi kitongetap logoek che po kemeut.

² Ak ki leenjo, “Amos, igeere nee?” Ak ki aleenji, “Ageere kitongetap logoek che po kemeut.” Ki leenjo anyun Kamuktaindet ne Toroor, kanyonji kagesunet piikyuk Israel; ma abune kogeny ole mi icheek.

³ Ak koek tyenwogik che po Hekaluut kateiyosyek eng' peetuunooto, mwaei Kiptaiyat Kamuktaindet ne Toroor; chaang'itu muuswek; eng' siiseet ko wiirtoi muuswechooto eng' komosta age tugul.

⁴ Ogas ng'olyoondoni, ee okweek che osaasei che ma tinyei kiy, ak ong'emei owoong'u kibananook che po emet,

⁵ oleen, “Meei au arawet ne kaleel, si kobiit kealde peek? Ak igeesugei au sabato, si kobiit kimarte peek? Si keyai epah koming'init ak keyai shekel koeet, si keyai kaberberisyet eng' tuguuk che kirogendoisye che po ng'aalseet;

⁶ kole si kobiit keale kibananook fedha, ak keale che ma tinyei kiy kweonik, ak kealde meteteegap peek.”

⁷ Kogoyosyo Kamuktaindet ne Toroor eng' telunatetap Jakobo, kole, ma koi autye iman poisyonikwak, agot agenge.

⁸ Tos ma potani emet amu niito, ak koriir age tugul ne menyei olooto? Ee, ng'eetei komugul ko uu aineet; ak koiimgei ak koteeny kogeny, ko uu aineet ne po Misiri.

⁹ Mwaei Kiptaiyat Kamuktaindet ne Toroor kole, “Eng' peetuunooto, agoochini kororokto asiista peet kween, ak agoochini emet koimenit eng' peetuut ne churat.

¹⁰ Awale igoorwekwok koek riirek, ak awal tyenwogikwok tugul koek kateiyet; agoochini piik tugul kogermenegei kuniok, ak koam poosto chii tugul; ayae nooto koek che kiriirchin weeriit ne ki kiii ineegei, ak ayae kagesunennyi koek peetuut ne ng'waan.”

Rubeet ne po ng'olyootap Kamuktaindet ne Toroor

¹¹ Mwaei Kiptaiyat Kamuktaindet ne Toroor kole, “Ogeero, pwoonei peetuusyek che ayookyini emet rubeet, ma ne po amitwogik, anan ne po meleldap peek, ago rubeet ne po kasetap ng'aleegap Kamuktaindet ne Toroor.

¹² Ak koombeniot kong'etee nyanjet age agoi nyanjet age, ak kong'etee murot kaataam agoi kong'asiis. Tuun rwaati kobendi komosi ak komosi kocheeng'oti ng'olyootap Kamuktaindet ne Toroor, ama tuun nyooru.

¹³ Eng' peetuunooto ko tuun tanuitos pergeinik che korooron ak murenik, amu melelda.

¹⁴ Icheeget che iyastos eng' tengektap Samaria, kole, ‘Ee Dan, ko uu ye sabei kamuktaindeng'ung'’; ak, ‘Ko uu ye sabei ooreetap Beer-sheba’; ibutos chooto ak icheek, amagoi ng'eetyo kogeny.”