AMOS 6 - Bukuit Ne Tilil

Kergong'yet agobo menoteet

¹ Pwo eng' icheek che mi kaalyeet eng' Zion, ak eng' icheek che kasei kole riibootin eng' tulweetap Samaria, piik che taagunotiin che po che eecheen eng' pororyosyek, che pwaanjin kootap Israel!

² Osiirte oba Kalne, ak ogeer; ak obe eng' olooto agoi Hamath ne oo; yeityo ochoorchigei Gath ne po Philistiik. Tos myachen icheek kosiir pounatosyechu? Anan tos oo kiwotennywa kosiir neng'wong'?

³ Okweek che oistoi kolooit peetuut ne ya, ak oibu ng'echereetap koroomnateet koriik.

⁴ Pwo eng' icheek che ruitos eng' itogusyek che po kelegap peeleek, ak koiitogei eng' tuguukwak che kilyeldoe, che amei aaregap keechiir che po akweet, ak moek che mi piusyek;

⁵ icheek che tyeni tyenwogik che po puch eng' cheetap kibugandet; che chopchingei tuguuk che po tyenwogik, ko uu Daudi;

⁶ che eei divaik eng' pagulisyek, ak koiilegei mwanik che korooron; ago ma aragendos agobo nyalildap Joseph.

⁷ Egu anyun icheek che tai kondoe che kiluulei, ak kogeskei polateet ne po poiboiyetap icheek che iitoigei.

⁸ Ki koyosyechigei Kiptaiyat Kamuktaindet ne Toroor, mwaei Kamuktaindet ne Toroor, ineendet Kamuktaindet ne po lugoosyek, kole: “Aweche menoteetap Jakobo, ak aweche kooriikyik che po laitoryat. Asaru anyun nganaseet kobooto tugul che mi oriit.”

⁹ Ak ngot kong'et piik tamanu eng' koot agenge, kobegu.

¹⁰ Ak ye sut chii `imamet, ne ineendet ne peelei muusto, si koip kawek komong' eng' ko, ak koleenji ineendet ne mi komoswek che po oriit che po koot, “Tos ta omi ak age?” Kowol anyun kole, “Achicha!” Kole anyun, “Siis! Amu ma ki chamwech kemwa kainetap Kamuktaindet ne Toroor.”

¹¹ Amu, ogeero, ng'atei Kamuktaindet ne Toroor, kebut koot ne oo kong'emak, ak kebut koot ne ming'in kong'asiagan.

¹² Tos rwaei paraisisyek eng' rwandet? Tos ibate `chii eik olooto? Ko owal kirwooget koek kiit ne ng'waan, ak owal logoek che po imanda koek ng'wonet.

¹³ Okweek che oboiboitune kiit ne po puch, che omwae ole, “Tos ma ki ip eng' kimnateennyo kuinoik kobunjech?”

¹⁴ Mwaei Kamuktaindet ne Toroor, Kamuktaindet ne po lugoosyek, kole, “Ee, kootap Israel, nai ni ile, ang'eeti pororyet si obargei, ak konyaliilak kobooch ole kibunei kebendi Lebo-hamath agoi kereruut ne po Arabah.”