AMOS 3 - Bukuit Ne Tilil

¹ Ogas ng'olyoondoni kagomwa Kamuktaindet ne Toroor agobo okweek, ee piigap Israel, agobo koot komugul ne po Israel ne ki amutu kotogos eng' emetap Misiri:

² Okweegei kityo che angen eng' ortinwek tugul che po ng'wony. Nooto anyun aiitwok pireet amu tengekwogikwok tugul.

Poisyetap Amos

³ Tos pendat piik aeng'u ngot koma kasyindos?

⁴ Tos pooriseni ng'etundo eng' timiin ngo ma par tyondo? Tos pooriseni ng'etundo ne neran eng' kebenennyi ngot koma am kiy?

⁵ Tos ibutyin toriityon mesteet ne mi ng'wony eng' ole ma mi mesteet ne namei ineendet? Tos iwir mesteet ama twa kiy?

⁶ Tos kiguutei iryageet eng' nganaseet, ama iyweis piik? Tos nyoonjin yaityet nganaseet, ama iyookyi Kamuktaindet ne Toroor?

⁷ Iman ma yaei kiy Kiptaiyat Kamuktaindet ne Toroor kotom kong'aang'ji ung'ootyennyi otwogikyik maotik.

⁸ Kagoborisen ng'etundo, ng'oo ne ma iyweisyei? Kagong'alaal Kiptaiyat Kamuktaindet ne Toroor, ko ng'oo anyun ne ma maoteni?

Ng'emisyetap Samaria

⁹ Omwaite eng' kooriigap laitoryat eng' Ashdod, ak eng' kooriigap laitoryat che mi emetap Misiri, ole, oyumjige tuloonoogap Samaria, ak ogeer ole tee wasetapkei ne oo ne mi olooto, ak ole tee sastaosyek che mi kwenunnyi.

¹⁰ Mwaei Kamuktaindet ne Toroor kole, ma ingen icheek koyai ne myee, che konori koroomnateet ak rebisyet eng' kooriikwak che po laitoryat.

¹¹ Mwaei anyun Kiptaiyat Kamuktaindet ne Toroor kole: “Piitu puunyoot ne mi komoswek tugul eng' emet, ak korebenen kimnateng'ung', ak keng'em kooriguk che po laitoryat.”

¹² Mwaei anyun Kiptaiyat Kamuktaindet ne Toroor kole: Ko uu ye saru mestowot keelyek aeng' anan motwet ne po itit eng' kutitap ng'etundo; kisaru anyun ko uu nooto piigap Israel che tebee Samaria eng' luuitap kiit ne kilyeldoe, ak eng' kiplusinik che po aririt che po itoogut.

¹³ Ogas okweek, ak obaoryanji kootap Jakobo, mwaei Kiptaiyat Kamuktaindet ne Toroor, Kamuktaindet ne po lugoosyek.

¹⁴ Eng' peetuut ne tuun aiityini pireet Israel amu pistaosyekyik, aiityini kogeny pireet kapkorosusyegap Bethel, ak keisto kuinoigap kapkorosuut, ak kobutyi ng'wony.

¹⁵ Ak abut kootap peetuusyegap kaitityet kobooto ne po peetuusyegap lalang'indo; ak keng'em kooriik che ki kiteege kelegap peeleek, ak kogeskei kooriik che eecheen, mwaei Kamuktaindet ne Toroor.