AMOS 2 - Bukuit Ne Tilil

Moab

¹ Mwaei Kamuktaindet ne Toroor kole: Ma aweechi pireet ne abire Moab amu pistaosyekyik somok, ee agot ang'wan; amu ki peel kawegap laitoryatap Edom kot koek oreek.

² Ayookyini anyun maat Moab ak kobeel irimosyegap Keryot; ak kome Moab eng' wasetapkei, waagaat ak cheetap iryageet.

³ Aistoi kirwoogindet eng' kwenunnyi, ak abar pounikyik tugul kobooto ineendet, mwaei Kamuktaindet ne Toroor.

⁴ Mwaei Kamuktaindet ne Toroor ko uu ni: Amu pistaosyekyik somok, ee agot ang'wan, ko ma aweechi pireet ne abire Judah amu kogoesyo ng'atuutigap Kamuktaindet ne Toroor, ama riip kayomisutikyik. Kigogoochi icheek lembechek che ki isubi kong'etee kwanisyekwak komaasta.

⁵ Ara ayookyini maat Judah ak kobeel irimosyegap Jerusalem.

Kirwooget ne ityin Israel

⁶ Mwaei Kamuktaindet ne Toroor ko uu ni: Amu pistaosyekyik somok, ee agot ang'wan, ko ma aweechi pireet ne abire Israel amu kigoaldae che po iman fedha, ak koaldae che ma tinyei kiy kweonik.

⁷ Ityorchin metowegap kibananook temburyegap ng'wony, ak komaas ortinwegap che talaen, ak koba kwanda ak weeriinnyi koipkei ak chepto agenge, si kong'waniit kainennyu ne tiliil.

⁸ Eng' ole neegitee kapkorosuut age tugul, koruiye `icheek ngoroik che kiname pesendo, ak koe divaik eng' kootap kamuktaindennywa, che ki kiibe piik che ki kirwookyin.

⁹ Ago ki abar Amorindet eng' tainnywa, ne ki aechin koindonyi ak taragonik, ak ki kiim ko uu keetiik che uueen; ak ki ang'em logoekyik eng' ole po parak, ak tigitikyik eng' ole po ng'wony.

¹⁰ Ki amutwak kogeny otogosu eng' emetap Misiri, ak andoiywok kenyiisyek artam eng' surkwen, si kobiit onam emetap Amorik kobunjook.

¹¹ Ki ande alak eng' weeriikwok koek maotik, ak ande alak eng' murenikwok koek Nasiritik. Tos ma uu nooto, ee okweek piigap Israel? Mwaei Kamuktaindet ne Toroor.

¹² Ago koigoochi Nasiritik divaik koe; ak ong'at maotik oleenji, “Amat omaoten.”

¹³ Ogeero, agiichok eng' ole omi, ko uu ye chiilsei chepkichutit ne nyiitaat ratuutigap peek.

¹⁴ Ak kobetyi chepchebindo che mweei, ama igimiti che kiimeen kimnateennywa, ama sarugei ne nyigan.

¹⁵ Amaimuuchi kotonon ineendet ne namei kwanget, ma sarugei ineendet ne chepchep, ama sarugei ineendet ne laanyei paraisiit.

¹⁶ Ak komwei aach ngor eng' peetuunooto ineendet ne nyigan eng' che nyigoonen, mwaei Kamuktaindet ne Toroor.