AMOS 1 - Bukuit Ne Tilil

Maotyot Amos

¹ Ng'aleegap Amos, ne ki agenge eng' mestowegap Tekoa, ng'ang'uut ne ki keer agobo Israel eng' peetuusyegap Uzziah laitoryatap Judah, ak eng' peetuusyegap Jeroboam weeriitap Joash laitoryatap Israel, eng' kenyiisyek aeng' kotom kobotan emet.

² Ki mwa kole, Pooriseni Kamuktaindet ne Toroor eng' Zion, ak kotwegu eng' Jerusalem; ak koriiryo ole iyagisye mestoweek, ak koyaam walitap Karmel.

Kirwooget ne ityin pororyosyek che neegitee Israel Damasko

³ Mwaei Kamuktaindet ne Toroor kole: Ma aweechi pireet ne abire Damasko amu pistaosyekyik somok, ee agot ang'wan, amu kogobire Gilead tuguugap kariik che kibore peek.

⁴ Ara ayookyini maat kootap Hazael, ak kobeel irimosyegap laitoryat Ben-Hadad.

⁵ Ak airii temeleiywotap Damasko, ak abar ne menyei atebweetap Aben, kobooto ineendet ne namei kirokto ne po laitornatet ne punu kootap Eden. Ak keluul piigap Syria, koba Kir, mwaei Kamuktaindet ne Toroor.

Philistia

⁶ Mwaei Kamuktaindet ne Toroor kole: Ma aweechi pireet ne abire Gaza amu pistaosyekyik somok, ee agot ang'wan; amu ki imut piik tugul koek luulenik, si kogoito koba Edom.

⁷ Ara ayookyini maat irimeetap Gaza, ak kobeel irimosyekyik.

⁸ Aistoi ne menyei Ashdod, ak ineendet ne namei kirokto ne po Askelon; ak aweech eunnyu aborye Ekron, ak lustos che ki ng'et che po Philistiik, mwaei Kiptaiyat Kamuktaindet ne Toroor.

Tyro

⁹ Mwaei Kamuktaindet ne Toroor kole: Ma aweechi pireet ne abire Tyro amu pistaosyekyik somok, ee agot ang'wan; amu ki igoito piik tugul koba Edom, ama ibwaat kayomisutyet ne po che tupcho.

¹⁰ Ara ayookyini maat irimeetap Tyro, ak kobeel irimosyekyik.

Edom

¹¹ Mwaei Kamuktaindet ne Toroor kole: Ma aweechi pireet ne abire Edom, amu pistaosyekyik somok, ee agot ang'wan; amu ki onee tupchennyi rotwetap chok, ak ki isto rireenetapkei tugul. Ki nereechi miising' kotugul, ak kigonor nereegekyik koigeny.

¹² Ara ayookyini maat Teman, ak kobeel irimosyegap Bosra.

Ammon

¹³ Mwaei Kamuktaindet ne Toroor kole: Maawechi pireet ne abire lagogap Ammon amu pistaosyekyik somok, ee agot ang'wan; amu kogogereer kwonyiik che tamonosyek che po Gilead, kole si kobiit kotes kiwotennywa.

¹⁴ Ara anaami maat eng' irimeetap Rabbah, ak kobeel irimosyekyik che po laitoryat, kobooto waagaat eng' peetuutap pooryeet, kobooto usoonet ne oo eng' peetuutap kipchurchuryet.

¹⁵ Ak keluul laitoryannywa, ineendet kobooto pounikyik, mwaei Kamuktaindet ne Toroor.