AMDOINDET 9 - Bukuit Ne Tilil

Meng'isye eng' poiboiyet

¹ Ki abwaat chooto tugul eng' muguleldanyu ak kianai ale miitei eutap Kamuktaindet kobooto piik che po iman ak che utaatiin eng' poisyonikwak: ngo chamyet anan wegeet, koma naei chiito nooto; mi tugul tainnywa.

² Amu ityin piik tugul tuguuk tugul kogergeit. Ityin kiit agenge chii ne po iman ak kiptengekyot, ityin ne myee ak ne ya, chii ne tiliil ak ne ma tiliil, ityin ne igoitoi korosyot ak ne ma igoitoi korosyot. Ko uu kiit ne uu chiito ne myee, ko uu nooto kiptengekyot; uu ineendet ne iyastos, ineendet ne iywei kayasyoet.

³ Niito ko yaityet eng' tugul che kiyaei eng' kurereetap asiista, mi kiit agenge ne ityin tugul: ee, nyiitaat mugulelwegap weeriigap piik, yaitwogik, ak mi iywek mugulelwekwak kotee kosaptos, ye ibata, koba ole mi che ki kobek.

⁴ Amu tinyei kamang'unet ineendet ne namegei ak tugul che saptos. Amu kaigai seset ne sabei kosiir ng'etundo ne kagome.

⁵ Amu ingen che saptos kole pegu. Ago ma naei kiy age tugul che ki kobek, ama kotinyei melekto age tugul kogeny, amu kigeutye icheek.

⁶ Ki kobet chamyennywa, wechenywa ak ng'et kondanywa, ama kotinyei kebeberta koigeny eng' kiy age tugul ne kiyaei eng' kurereetap asiista.

⁷ Ui oldang'ung', am amitwogiguk eng' poiboiyet, ak iee divaiguk eng' muguleldo ne paibai, amu kagocham Kamuktaindet poisyoniguk.

⁸ Ingoleelagitu ngoroiguk kotugul; ameng' korerchi mwaita meting'ung'.

⁹ Otebi eng' poiboiyet ak osotyot ne ichame, peetuusyek tugul che po sabeeng'ung' ne po puch, che kigoonin ineendet eng' kurereetap asiista, peetuusyeguk tugul che po puch: amu kebebertang'ung' nooto kotee isabe ak eng' poisyeng'ung' ne iyaei eng' kurereetap asiista.

¹⁰ Kiit age tugul ne iyae eng' eung'ung', iyai eng' kimnateng'ung', amu ma mi poisyet anan chobutik anan naet anan utaatyet eng' kererit ne iwendi.

Yaityet ko cheei piich

¹¹ Ki aweege ak ageer eng' kurereetap asiista, ale, ma po kabeletapkei che chepchep, ama po lugeet che kiimeen, ama po amitwogik che utaatiin, ama po mogornatosyek piigap naet, ama chamaatiin piik che utaatiin; ago ityin icheek tugul sainnywa ak peetuunywa.

¹² Amu manai chiito agine peetuunnyi: uu njireenik che kinamei eng' regereiywot ne ya ak uu toriitik che kinamei eng' mesteet, kinamei ko uu nooto weeriigap piik eng' peetuut ne ya ne cheei icheek.

¹³ Ki ageer kogeny utaatyet eng' kurereetap asiista ko uu ni ak ki ageer ale, oo.

¹⁴ Ki mi nganaseet ne ming'in ak ki mi piik che ng'ering' oriit. Ki nyo laitoryat ne oo kobookyi, kiyiem ak koteech irimosyek che eecheen komuut nganasanooto.

¹⁵ Ki kinyoorchi nganasanooto kibananiat ne utaat ak ki sar nganaseet eng' utotyennyi; ago ma mi chii ne ki ibwaat kibananiandanooto.

¹⁶ Ki ale anyun, “Myee utaatyet kosiir kimnateet.” Nganda uu nooto, kesasei utaatyet kibananiat, ama kigasei ng'aleekyik.

¹⁷ Kigasei ng'aleegap piik che utaatiin che kimwaei mutyo kosiir waagetap ne pou piik che perber.

¹⁸ Myee utaatyet kosiir kariik che po lugeet. Ago ng'emei kiptengekyot agenge myeinwek che chaang'.