AMDOINDET 7 - Bukuit Ne Tilil

Katigonet agobo sabeet

¹ Kaigai kainet ne myee kosiir mwanik che po kamanuutyet ne oo. Ak kaigai peetuutap meet kosiir peetuut ne kisichei chii.

² Kaigai keba koot ne kiteiye, kosiir keba koot ne mi igoorta. Amu nooto kagesunetap piik tugul, ak konori nooto eng' muguleldanyi chiito ne sabei.

³ Kaigai arageneet kosiir roryot, amu kiboiboi muguleldo eng' arageneetap togeet.

⁴ Mi mugulelwegap che utaatiin koot ne kiteiye, ago mi mugulelwegap che perber koot ne po poiboiyet.

⁵ Kaigai kegas kereetap kong' ne po chiito ne utaat, kosiir kegas tyendap piik che perber.

⁶ Amu uu kateretap katook che mi maat ne mi tereet ne kotkotaat, roryotap chiito ne perber. Puch niito agine.

⁷ Igoochin iman sastaet chiito ne utaat koberberit; ak ng'emei `kiit ne kigoigoisye naet.

⁸ Kaigai kagesunetap kiy kosiir taunennyi; kaigai ne muitoi eng' muguleldonyi kosiir ne meenei.

⁹ Amesartae nereek eng' saboondang'ung', amu tebee nereegek tegetigap che perber.

¹⁰ Ameteep ile, kilyon si ko korooronitu peetuusyek che po tai kosiir peetuusyechu? Amu ma iteep agobo niito eng' utaatyet.

¹¹ Myee utaatyet ko uu ye myee poroteet. Ee, myee miising' eng' icheek che keerei asiista.

¹² Amu riibei piich utaatyet ko uu riibseetap fedhaisyek. Ago telunatetap naet ko ni, riibei ng'omnateet saboondap chiito ne tinyei.

¹³ Ibwaat poisyetap Kamuktaindet; tos ng'oo ne imuuchi kolitit kiit ne ki yai ineendet kogunuurit?

¹⁴ Paibaitu eng' peetuutap perurto, ak eng' peetuutap nyalilda ibwaat komyee. Ki iyai Kamuktaindet chooto kogergeit tuwai, si ma nai chiito kiit age tugul ne piitu let.

¹⁵ Ki ageer chooto tugul eng' peetuusyekyuk che po puch. Mi chiito ne po iman ne meitoi imandanyi ak mi chiito ne ya ne sabei keny ak koyaei yaityennyi.

¹⁶ Ameegu ne tinyei imanda ne siirtoot, anan isich utaatyet miising'; amu nee si ing'emge?

¹⁷ Ameegu ne ya miising' anan iegu ne perber. Amu nee si imee kotom koit peetuung'ung'?

¹⁸ Karaaran iguiye niito komyee, ameistoe eung'ung' ng'olyoondoni agine; amu ineendet ne iywei Kamuktaindet komang'une chooto tugul.

¹⁹ Utaatyet ko kimnateetap chiito ne utaat ne siirei pounik taman che mi nganaseet.

²⁰ Iman, ma mi chii ne po iman eng' ng'wony, ne yaei ne myee ama yaei tengekto.

²¹ Ameepchi iit kogeny ng'aleek tugul che kimwaei, si me kas kochubin otwogindeng'ung'.

²² Amu ingen agine muguleldang'ung' konyil che chaang' kole ki ichup aginye alak ko uu nooto.

Soometap naet

²³ Ki ageer chuuto tugul eng' ng'omnateet ak ki ale, “Ang'omitu”, ago kilooena utaatyet.

²⁴ Kiit ne mi, komi ye loo ak ki wo oriit miising'; ng'oo ne imuuchi konyoor?

²⁵ Ki aweege ak kimach muguleldanyu konai ak kosyach ak kocheeng', utaatyet ak ole teptoi tuguuk, ak konai kole yaityet ko perberyo, ak kole perberyo ko iywek.

²⁶ Ak anyooru kiit ne ng'waan kosiir meet, nooto kwony ne muguleldanyi ko mesteet ak regereywot ak ko uu eunekyik ratuut. Age tugul ne iboiboi Kamuktaindet kochililee kwonyooto, ago namei `kwonyooto kiptengekyot.

²⁷ Ogeero, ki anyooru niito, mwaei Amdoindet, ki atuiye kiit age ak age si kobiit anai kieuu.

²⁸ Ne ta kocheeng'ei saboondanyu, ago tomo anyooru. Ki anyooru chiito agenge eng' piik eliphuut, ago ma anyooru kwondo eng' chooto tugul.

²⁹ Ogeero, ki anyooru niito kityo, ale, ki yai Kamuktaindet chiito kobunji iman; ago kigocheeng' icheek tuguuk che chaang' che taunen.