AMDOINDET 6 - Bukuit Ne Tilil

Kaimetapkei agobo mogornatosyek

¹ Mi yaityet ne ki ageer eng' kurereetap asiista, ak nyigiis nooto eng' piik miising':

² chiito ne igoochin `Kamuktaindet mogornatosyek, chaang'indap tuguuk ak teegisto, kot ko marerchin kiy saboondanyi eng' tuguuk tugul che machei, ago ma igoochin Kamuktaindet kimnateet ne ame tuguuchooto, ago amei toondet. Puch niito ak ko myando ne ya.

³ Ngot kosich chiito lagok pogol ak kosap kenyiisyek che chaang', si kochang'a peetuusyegap kenyiisyekyik, ago ma piyonyi saboondanyi kiit ne myee, ama tinyei ole kitupchin. Amwae ale kaigai ne ki kioos, kosiir ineendet:

⁴ amu nyoonei puch ak kowendi eng' mesundeito, ak kituchei kainennyi eng' mesundeito,

⁵ ama keer asiista anan konai. Tinyei niito kamuung'et kosiir ni Kai.

⁶ Agot ngo sap kenyiisyek eliphuut konyil aeng', ama paibaitune kiy ne myee, tos ma pendi tugul oldo agenge?

⁷ Po poisyet tugul ne po chiito kutinnyi, ago ma piyonyi.

⁸ Amu tinyei keljinet nee chiito ne utaat kosiir ne perber? Anan tinyei nee chiito ne panan, ne ingen kowendot eng' taitap che saptos?

⁹ Kaigai keereetap konda kosiir mageet ne ombenoti. Puch niito agine ak ko kaimetapkei ne po puch.

¹⁰ Kiy age tugul ne mi, ko kiga ketoochi kainennyi keny, ak konaat ole uu ng'aleegap chii. Amaimuuchi kotiiyo kiy ak ineendet ne kiim kosiir ineendet.

¹¹ Ng'aleek che chaang' kotesei tangoita, ma tesei chii.

¹² Ng'oo anyun ne ingen kiit ne myee agobo chii eng' sabeennyi, eng' peetuusyek tugul che po sabeennyi ne po puch che poisye ko uu urwet? Ng'oo anyun ne imuuchi komwachi chiito tuguuk che piitu let eng' ineendet eng' kurereetap asiista?