AMDOINDET 5 - Bukuit Ne Tilil

Kayweet, Kaming'inetapkei, ak yametapkei

¹ Riip keeldong'ung' ye iwendi kootap Kamuktaindet; amu kaigai keriikyi si kegas, kosiir koroseek che igoitoi piik che perber; amu ma naei icheek kole yaei yaityet.

² Amat kosartae kuting'ung' ak amat kosartae muguleldang'ung' komwa kiy age tugul eng' taitap Kamuktaindet, amu mi Kamuktaindet ne Toroor kipsengwet ak imi ng'wony. Ingong'ering'itu anyun ng'aleeguk.

³ Amu nyoonei karwotitoet eng' poisyonik che chaang'; ak mwaei ne perber ng'aleek che chaang'.

⁴ Ye iyasye, ko mat igaegei amu ma paibaitune ineendet che perberen. Igoite anyun ne keyasye.

⁵ Kaigai amearorte, kosiir iarorte amegoite.

⁶ Amengogoochi kuting'ung' poortang'ung' koyai tengek anan imwa eng' taitap malaikaiyat ile, “Ki lelutyet.” Amu nee anyun si konereekyi Kamuktaindet kuting'ung' ak kong'em poisyonigap euneguk?

⁷ Amu puch ng'aleek che chaang' ak chaang'indap karwotitaosyek, ago iywei inyee Kamuktaindet.

Puch sabeet

⁸ Ngot igeer kesastae kibananiat ak keistoi kirwooget ak imanda eng' koroomnateet eng' emet, ko mekwong'ee nooto. Amu keerei nooto ineendet ne toroor kosiir icheeget che torooreen, ak mi che torooreen kosiir icheek.

⁹ Po tugul keljinetap ng'wony. Poisyechin agine laitoryat tuguugap mbar.

¹⁰ Ma piyonyi robiinik ne chamei robiinik; ama piyonyi tuguuk che tesoksei ineendet ne chamei chaang'indap tuguuk. Puch niito agine.

¹¹ Ye tesak tuguuk, ko tesak ak icheek che amei. Tos tinyei keljinet nee anyun chiitap ko po, kobatee kogeer kityo?

¹² Anyiny rwondap chiito ne poisyei, ngo am che ng'ering' anan che chaang'. Ago ma inuuktos mogoreek amu piyendanywa.

¹³ Mi yaityet ne ng'waan ne ki ageer eng' kurereetap asiista, nooto ko mogornatosyek che riibei chiitap ko po yeityo kong'em ineendet.

¹⁴ Petos mogornatosyechooto eng' poisyet ne ya; ak ngot ko ki kosich weeriit, koma mi kiy eunnyi.

¹⁵ Ko uu ye ki kisichei, kowendi puch kogeny ko uu ye kinyonei, ama ibei kiy ne po poisyennyi ne imuuchi kotita eng' eunnyi.

¹⁶ Niito agine ko yaityet ne ng'waan, amu ko uu ye kinyonei, ko tuun wendi ko uu nooto. Ak nee keljinet ne nyooru ineendet ne pirtogei puch?

¹⁷ Amisyei kogeny eng' peetuusyekyik tugul eng' mesundeito ak tinyei arageneet ne ng'waan ak myando ak nereegek.

¹⁸ Ogeero, kiit ne myee ne ki ageer ak ko nyolu, ko koamis chii ak koe, ak kobaibaitune tuguuk che myach eng' poisyennyi tugul ne yaei eng' kurereetap asiista, eng' peetuusyek tugul che po sabeennyi che ki igoochi `Kamuktaindet ineendet. Amu kebebertanyi niito.

¹⁹ Ak chii age tugul agine ne ki igoochi Kamuktaindet mogornatosyek ak chaang'indap tuguuk, ak kogoochi kimnateet ne ame tuguuchooto, koip kebebertanyi, ak kobaibaitune poisyennyi; niito anyun ko konunetap Kamuktaindet.

²⁰ Amu ma kobwaati miising' peetuusyegap sabeennyi; amu woljin `Kamuktaindet ineendet eng' poiboindap muguleldanyi.