AMDOINDET 12 - Bukuit Ne Tilil

¹ Ibwaat kogeny Yaindeng'ung' eng' peetuusyegap ming'inateng'ung', kotom koit peetuusyek che yaach ak koriik kenyiisyek che imwae ile, “Ma paibaitune chuuto,”

² kotom koimenit asiista anan lapkeiyet anan arawet, anan kecheik ak koweek poolik ye kagorobon;

³ eng' peetuut ye tuun potanso riibiigap koot ak kong'uruugis che kiimeen ak kosiisyo che ng'aisei amu ng'ering' ak koimenitu che ititoi eng' tirisyok.

⁴ Ye kageger kurgotik eng' ooreet, ye ma kegasei ng'aiset ak kong'eet chiito eng' kateetap toriityon ak koming'in tiibiik tugul che po tyenwogik.

⁵ Ye iywei chii kobun toroorinwek ak kobiit kamuiset eng' ooreet, ak koiyesyo taaptogap keetit ne kiguure almond ak konyigiisit talamwet ak kobet mageet. Amu wendi chiito koonnyi ne po koigeny ak kobendat che riiryoti eng' ortinwek;

⁶ kotom kitaach porowetap fedha anan kotom ketui tereetap thahabu anan kotom koiye tereet eng' kondametut anan kotom koil tireet eng' ole kisiile peek,

⁷ ak koweekyigei ng'ung'unyek ng'wony ko uu ye kinye, ak koweekyigei saboondo Kamuktaindet ne ki koonu.

⁸ Mwaei anyun Amdoindet kole: Puch tugul, ma tilei kiy! Puch tugul.

Ng'aleek che kigeesune

⁹ Ago, amu ki utaat Amdoindet, kita koneeti piik naet; ko ki ibwaat, kocheeng' ak kotet kalewenaik che chaang'.

¹⁰ Ki cheeng' Amdoindet ng'aleek che taachaksei ak chooto che ki kisir eng' lititindo ng'aleek che po iman.

¹¹ Uu kiplitok ng'aleegap piik che utaatiin ak uu kipchumarisyek che ki kigiich komyee, ng'aleegap kaneetigap tuiyosyek, che ki kigon kobun mestowot agenge.

¹² Kas anyun weeriinnyu kateunet. Ma mi ole igeesunegei sireetap bukuisyek che chaang'. Ak ng'etei poorto eng' somanutik che chaang'.

¹³ Ara nguno ko kagogasak tugul, ni anyun ko kagesunetap tuguuchu: Iywei Kamuktaindet ak iriip ng'atuutikyik, amu nyoljin chiito poisyoniito tugul.

¹⁴ Amu ipchin Kamuktaindet poisyet age tugul kapkirwooget, kobooto kiit age tugul ne ung'aat, ngo kiy ne myee anan ngo ne ya.