AMDOINDET 1 - Bukuit Ne Tilil

Puch tuguuk tugul

¹ Chu ng'aleegap Amdoindet, nooto weeriitap Daudi, ne ki laitoryat eng' Jerusalem.

² Mwaei Amdoindet kole, “Puch, ma tilei kiy, puch, ma tilei kiy, puch tugul.”

³ Nee keljinet ne nyooru chiito, eng' poisyonikyik tugul che yaei eng' kurereetap asiista?

⁴ Siirtoi ibinda age ak nyoonei age, ago tebyei ng'wony koigeny.

⁵ Charu asiista ak kororokto; ak choktoi kowendi ole charunee.

⁶ Usyin usoonet murot tai, ak koweek kwo murot kaataam, weechegei kotugul eng' ole punooti, ak koweeksei kogeny eng' ole pooch yiemutikyik.

⁷ Rootyin `ainoosyek tugul nyanja, ago manyiei nyanjet; ole rootyin ainoosyek, ko olooto ole weekyingei kogeny.

⁸ Koonu ng'etatet tuguuk tugul; ng'etatet ne ma imuuchi chii komwa. Ma piyonyi konda che keerei, amanyie itit, che kasei.

⁹ Nooto ne ki kobiit, ko nooto neta kobiitu; ak nooto ne ki keyai, ko nooto neta keyaei; ama mi kiy ne taugei eng' kurereetap asiista.

¹⁰ Tos mi kiy ne mwaei piik kole, “Keer, tos ma taugei ni?” Ki mi nooto kobooch keny, kotom kepiitu.

¹¹ Ma mi kabwaato agobo ibinwek che po tai; ama ibwaati ibinwek che po let che ta kobwanei, eng' chooto che ta kobiitu.

Asenetap utaatyet

¹² Ki aa laitoryatap Israel eng' Jerusalem anee Amdoindet.

¹³ Ki agiil muguleldanyu kocheeng' ak kosyach eng' utaatyet agobo tuguuk tugul che kiyaei eng' kurereetap kipsengwet. Ki igoochi Kamuktaindet weeriigap piik poisyet ne po nyalilda kotigone.

¹⁴ Ki ageer poisyonik tugul che kiyaei eng' kurereetap asiista; ak ogeero, puch tugul: Uu oneetap koristo.

¹⁵ Ma kimuuchi kilitit kiit ne kunuur; ama kimuuchi kiit ne ma mi.

¹⁶ Ki amwachi muguleldanyu aleenji, “Keero, koanyooru utaatyet ne oo kosiir tugul che ki indounena eng' Jerusalem: ee, ki kogeer miising' muguleldanyu utaatyet ak naet.”

¹⁷ Ak ki agiil muguleldanyu konai ak koobeesyo utaatyet; konai iywek ak perberyo. Ago ki ageer kogeny ale kaimetapkei puch niito.

¹⁸ Amu mi arageneet ne oo utaatyet ne oo: ak tesei arageneet ineendet ne tesei ng'omnateet.