2 TIMOTEO 4 - Bukuit Ne Tilil

¹ Kang'atiin anyun eng' taitap Kamuktaindet, ak Kristo Jeso, ne tuun irwookyin che saptos ak che ki kobek, ak eng' tagunennyi ak eng' laitornatennyi;

² amde ng'olyoot; choboge eng' peetuut ne nyolu, ak eng' peetuut ne ma nyolu; itigon, kergong', igiil, eng' muitaet tugul ak kaneetisyet.

³ Amu nyoonei peetuut ne ma tuun epchin iit agot kitigin kaneetisyet ne po imanit; ago, tinyei iitiik che iututos, iyumjigei kaneetik che isubi maguutikwak;

⁴ ak koeesyo koepchi iit imanit, ak komasta koosup atindonik che po puch.

⁵ Ago riipkei inyee eng' tuguuk tugul, muite eng' nyalilda, yai poisyetap amdaetap logoiywek che myach, yai poisyeng'ung' kosulda.

⁶ Amu kigoitoa nguno, ak kagoit peetuusyek che awendi.

⁷ Ki ayai lugeet ne myee, kaagesu labatet, ki ariip kayaneet:

⁸ kobooch nguno ko kagegonorwo kuutweet ne po imanda, ne tuun koono Kiptaiyat, kirwoogindet ne po imanda, eng' peetuunooto: ago ma aneege, ago icheeget tugul ak icheek che ki kocham tagunennyi.

Katigonutik

⁹ Igiilgei ak inyonja ko neegit:

¹⁰ amu ki kobagakta Dema, ko kagocham ng'wonyuni po peetuusyechu, ak kwo Thessalonika; kwo Kreske Galatia, kwo Tito Dalmatia.

¹¹ Luka ineegei ne mi kobooto. Imutu Mariko, ak obwa tuwai: amu toreto eng' poisyet.

¹² Ago ki ayookte Tukiko kwo Epheso.

¹³ Ye inyoo iibu sumet ak bukuisyek, ago ne siirei ko magatok che kisirei che ki abagakyi Karpo eng' Traos.

¹⁴ Ki yaiywo ne ya miising' Aleksanda, kitong'oindet ne po sugunoik: tuun yaakyin Kiptaiyat ko uu poisyonikyik:

¹⁵ riibegei ineendet; amu ki kirinda ng'aleekyok miising' kot.

¹⁶ Ma piit chii ne kitoreta eng' waluunennyu ne po tai; ki pagaakta tugul: amat kiityi icheek ng'olyoondoniito.

¹⁷ Ago ki tonon Kiptaiyat kobooto, ak kogimita; si kobiit keamda eng' anee ng'aleek komyee, ak si kogas Pororyosyek tugul: ak ki kisarwo eng' kutitap ng'etundo.

¹⁸ Sarwo Kiptaiyat eng' poisyet age tugul ne ya, ak kosarwo agoi ait laitornatet ne po kipsengwet: nenyi toroornatet koigeny ak koigeny. Amen.

Kagatyosyek che po let

¹⁹ Igat Priska ak Aquila, ak piigap Onesiporo.

²⁰ Ki tebi Erasto eng' Korinto: ago ki abagaach Tropimo eng' Mileto komyani.

²¹ Igiilgei nyoo kotom koit peetuusyek che po kaitityet. Igatin Eubulo, ak Pude, ak Lino, ak Klaudia, ak tupchosyek tugul.

²² Ingotep Kiptaiyat kobooto saboondang'ung'. Ingotep myeeindo kobootok.