2 TIMOTEO 2 - Bukuit Ne Tilil

Asigarindet ne myee ne po Jeso Kristo

¹ Kimitu anyun, lakweennyu, eng' myeeindo ne miitei eng' Kristo Jeso.

² Ak tuguuk che ki igasena eng' kwenutap paorinik che chaang', igoochi chooto piik che kiyani, che imuuchi koneet alak ak icheek.

³ Nam yamdaet ne po nyalilda, ko uu asigarindet ne myee ne po Kristo Jeso.

⁴ Ma mi asigarindet, ne ngo mi poisyet, koratyingei tuguuk che po ng'wony; si kobiit kobaibai ne kisirei ineendet koek asigarindet.

⁵ Ak ngot koyai chii agine kabeletapkei eng' ureryosyek, koma kigoochin kuutweet, ngo ma ibelis ko uu ye mwaei ng'atuutik.

⁶ Nyoljin kabatindet ne yaei poisyet ne uui, kosip kotongoi logoek.

⁷ Ruchi komyee kiit ne amwae; amu koonin Kiptaiyat kaguiyet eng' tuguuk tugul.

⁸ Ibwaat Jeso Kristo, ne king'eet eng' che ki kobek, ne po kesweegap Daudi, ko uu logoiywekyuk che myach:

⁹ ne anyoorunee nyalilda, agoi monjorornatosyek; ko uu chiito ne yaei yaityo; ago ma rataat ng'olyootap Kamuktaindet.

¹⁰ Nooto anyun amuitoi eng' tuguuk tugul amu che ki kilewen, si kobiit konyoor ak icheek yetunet ne miitei eng' Kristo Jeso kobooto toroornatetap koigeny.

¹¹ Po iman ng'olyoondoni: Amu ngo kigebegu kobooto ineendet, kesaptosi kobooto ineendet:

¹² ngemuite, ko tuun ki pou kobooto ineendet: ngot keeesye ineendet, ko tuun eesyoech agine:

¹³ ngo ma ki po iman, kotebyei ineendet eng' iman; amu ma imuuchi koeesyogei.

Kiboityot ne iyanaat eng' Kamuktaindet

¹⁴ Ibwaatyi icheek tuguuchuuto, ng'at icheek eng' taitap Kiptaiyat, si ma ibelgei agobo ng'aleek che ma kisige kiy, che ng'emei icheek che kasei.

¹⁵ Igiilgei ibartegei ile ki koyanun Kamuktaindet iegu kiboityot ne manyol kolilaan, ne poisyee komyee ng'olyootap imanit.

¹⁶ Istoegei ng'aleek che ma namegei ak ooreetap Kamuktaindet: amu tesoksei koyaagitu kosiir eng' yaityet,

¹⁷ ak amei ng'olyoonnywa ko uu chepsergechet: eng' icheek ko Humenayo ak Pileto;

¹⁸ piik che ki kochiliil eng' imanit, mwaei kole ki kosiirto ng'eetyeet, ak koweleli kayaneetap piik alak.

¹⁹ Ago tononi lumeiywot ne kiim ne po Kamuktaindet, kotinyei ng'ooksoni keele, Ingen Kiptaiyat icheek che chechiik; ak, Ingoistoegei yaityet age tugul ne mwaei kainetap Kiptaiyat.

²⁰ Ago eng' koot ne oo koma mi tereenigap thahabu ak fedha kityo, ago che po keetiik ak ng'ung'unyek ak icheek; ak po alage teegisto, koma po alage teegisto.

²¹ Ngo tiliilgei anyun chii eng' tuguuchuuto, koegu tereet ne po teegisto, ne itabaanat, ne nyoljin koboisyee kiptaiyat, ne ki kichopchi poisyet age tugul ne myee.

²² Ago mwee maguutik che po neranik, ak isup imanda, chamyet, kayaneet, kaalyeet, kobooto icheeget che kuurei Kiptaiyat eng' mugulelwek che tiliileen.

²³ Ago eesye teebutik che perberen che ma punu kaneetisyet, ingen ile yiei pooryosyek.

²⁴ Ama nyoljin otwogindetap Kiptaiyat koyai pooryeet, ago koek ne tala eng' tugul, ne chepchep koneetis, ago muitoi,

²⁵ ne kere kong' eng' mutyonet icheek che kirindoi; tamangap kogoochi Kamuktaindet icheek siguunet ne po naetap imanit,

²⁶ ak kosargei icheek komang'une mesteetap chesawilyet, ko kagoluul icheek si koyai magennyi.