2 SAMUEL 7 - Bukuit Ne Tilil

Komaotenjin `Nathan Daudi

¹ Ye kingo meny laitoryat koonnyi ak kogoochi `Kamuktaindet ne Toroor ineendet kamuung'et eng' puunikyik tugul che ki mi eng' komoswek tugul,

² koleenji `laitoryat Nathan maotyot, “Keero, amenye kootap taragonik, ago menyei moingetap Kamuktaindet emait oriit.”

³ Koleenji `Nathan laitoryat, “Ui, ak iyai tugul che mi muguleldang'ung', amu mi Kamuktaindet ne Toroor kobooten.”

⁴ Ak ki ityi Nathan ng'olyootap Kamuktaindet ne Toroor kemounooto, koleenji,

⁵ “Ui imwachi otwogindennyu Daudi ileenji, ‘Kamwa Kamuktaindet ne Toroor kole: Tos inyee ne teekwo koot ne amenye?

⁶ Amu tomo amenye ko kobooch peetuut ne ki amutu piigap Israel eng' Misiri agoi peetuuni, ago ki ameng'ootee emait ak kootap moinget.

⁷ Eng' komoswek tugul ole ki awendotee ak lagok tugul che po Israel, ko tos ki ateebee kandoigap ortinwegap Israel che ki ang'at koriip piikyuk Israel aleenji, Amu nee si ma oteekwo koot ne po taragonik?

⁸ Ara anyun, imwachini otwogindennyu Daudi ileenjini, kamwa Kamuktaindet ne Toroor ne po lugoosyek kole, Ki amutun eng' piutap keechiirek, eng' kayagetap keechiirek, si kobiit iegu pounindet eng' piikyuk ibou Israel.

⁹ Ki atebi kobooten eng' oldo tugul ole ki iwe ak ki aiste puuniguk tugul eng' taing'ung'. Aeeti kaineng'ung', ko uu kainetap piik che eecheen eng' ng'wony.

¹⁰ Alewenjini yeto piikyuk Israel ak amiine icheek, si kobiit komeny yetanywa. Ma kiutoi kogeny anan konyaliil icheek `lagogap yaityet kogeny ko uu eng' tai,

¹¹ kobooch peetuut ne ki ang'at kirwoogik koboi piikyuk Israel, agoonin imuuny eng' puuniguk tugul. Ak mwaun Kamuktaindet ne Toroor kogeny kole teegun koot Kamuktaindet ne Toroor.

¹² Ye igeskei peetuusyeguk ak oruiye ak kwanisyeguk, ang'eet iyoteng'ung' ne piitu let ne punu poortang'ung', ak agimiit laitornatennyi.

¹³ Tuun teekyin koot ineendet kainennyu ak agimiit ng'echereetap laitornatennyi koigeny.

¹⁴ Aegu kwandanyi ak koek weeriinnyu. Ngot koyai inee tengek, atigoone kirokto ne po piik ak pirutigap lagogap piik.

¹⁵ Ago ma istoegei ineendet rireenennyu ko uu ye ki arebee Saulo, ineendet ne ki aiste eng' taing'ung'.

¹⁶ Ki kimiiti koong'ung' ak laitornateng'ung' koigeny eng' taing'ung'. Ki kimiiti ng'echereetap laitornateng'ung' agoi koigeny.’ ”

¹⁷ Ki ng'alaalji `Nathan Daudi ko uu ole teptoi ng'aleechooto tugul ak ko uu ng'ang'utyoni tugul.

Kosaae ak komwae kongoi Daudi

¹⁸ Kingo pata, kwo ko laitoryat, kwo kotebi ng'wony eng' taitap Kamuktaindet ne Toroor yeityo kole, “Aa ng'oo, ee Kiptaiyat Kamuktaindet ne Toroor, ak nee koonnyu kot imutwaa agoi ra?

¹⁹ Ko uu yo kiy niito ne ming'in eng' taing'ung' ee Kiptaiyat Kamuktaindet ne Toroor, ko kaing'alaal kogeny agobo kootap otwogindeng'ung' eng' peetuusyek che chaang' che pwoonei. Uu ni piteetap kimugulmet, ee Kiptaiyat Kamuktaindet ne Toroor!

²⁰ Nee age neta komuuchi Daudi komwaun? Amu ingen inyee otwogindeng'ung', ee Kiptaiyat Kamuktaindet ne Toroor.

²¹ Amu kaiyai etunatoni tugul agobo ng'olyoondeng'ung' ak ko uu muguleldang'ung' inyegei, si kobiit igoochi otwogindeng'ung' konai.

²² Ii oo amu nooto, ee Kamuktaindet ne po Toroornatet, amu ma mi ne ogerge, ama mi Kamuktaindet age kobatenen, ko uu eng' tugul che kigegas eng' itiikyok.

²³ Ngoro pororyet ne kergei ak piiguk Israel ne ki wo Kamuktaindet kotyakyigei koek piikyik ak koyachigei kainet? Ngoro pororyet ne ki yachi tuguuk che eecheen agobo okweek ak tuguuk che po kamuiset agobo emeng'ung' eng' taitap piiguk? Icheek che ki ityaach eng' Misiri koek cheguuk, ak eng' pororyosyek ak kamuktaikwak?

²⁴ Ki igimityigei piiguk Israel koek piiguk koigeny; ak ki iegu inyee Kamuktaindet ne Toroor Kamuktaindennywa.

²⁵ Ara anyun, ee Kamuktaindet ne po Toroornatet, igimit koigeny ng'olyoot ne kaimwa agobo otwogindeng'ung', ak agobo koonnyi ak iyai ko uu ye kemwa.

²⁶ Ingitoroor kaineng'ung' koigeny keele, ‘Kamuktaindet ne Toroor ne po lugoosyek ko Kamuktaindet ne pou Israel.’ Ak ki kimiti koigeny kootap otwogindeng'ung' Daudi eng' taing'ung'.

²⁷ Amu ki ing'aang'ji inyee otwogindeng'ung', ee Kamuktaindet ne Toroor ne po lugoosyek, Kamuktaindetap Israel, ileenji ‘Ateegun koot.’ Kanyiganit anyun otwogindeng'ung' eng' muguleldanyi kosaain saaoni.

²⁸ Ara anyun, ee Kiptaiyat Kamuktaindet ne Toroor, ii Kamuktaindet, iman ng'aleeguk ak kaiyomisyi otwogindeng'ung' kii myee.

²⁹ Ingobaibain iberuur kootap otwogindeng'ung' si kobiit kotep koigeny eng' taing'ung'. Amu kaimwa inyee, ee Kiptaiyat Kamuktaindet ne Toroor ak ingoek ne iberuurot koigeny kootap otwogindeng'ung' eng' kaberureng'ung'.”