Biblia Todo Logo
Bìoball air-loidhne

- Sanasan -

2 SAMUEL 6 - Bukuit Ne Tilil


Koibu `Daudi Moingetap Arorutyet konyo Jerusalem
(1A.Pet 13:1-14; 15:25-16:6,43)

1 Ki iyum `Daudi kogeny murenik eliphuusyek sosom che po Israel che ki kilewen.

2 Ki ng'eet Daudi ak kwo kobooto piik tugul che ki mi ak ineendet eng' Baale Judah koba koip moingetap Kamuktaindet ne ki kimwaitae kainet, kainetap Kamuktaindet ne Toroor ne po lugoosyek ne tebee kerubisyek.

3 Ki inde icheek moingetap Kamuktaindet chepkichutit ne leel ak koip konyo eng' kootap Abinadab ne ki mi tulweet. Ki kweri weeriigap Abinadab Uzzah ak Ahio, chepkichutinooto leel.

4 Ki ip konyo eng' kootap Abinadab ne ki mi tulweet, kobooto moingetap Kamuktaindet. Ki indoe Ahio moingonooto.

5 Kiboiboitu Daudi ak koot tugul ne po Israel eng' taitap Kamuktaindet ne Toroor kobutei kibugandisyek tugul, kobooto ketubosyek, kibugandinik che ki kiyae keetiigap piribiryet, sugutisyek che mengeechen, ndurerusyek ak eng' sanisyek che cheeitos.

6 Kingo it icheek rwanyut ne kiboorsee ne po Nakon, koyogooito Uzzah eunnyi kotokyi moingetap Kamuktaindet ak konam amu kiterteryot eiik.

7 Eng' yooto, konereech miising' Kamuktaindet ne Toroor agobo Uzzah, ak kibir `Kamuktaindet ne Toroor ineendet eng' yooto amu lelutyennyi. Kimechi yooto kimi moingetap Kamuktaindet.

8 Ki ma cham Daudi, amu ki par Kamuktaindet ne Toroor Uzzah. Ara kiguure yooto Peres-usa agoi ra.

9 Ki iywei `Daudi Kamuktaindet ne Toroor peetuunooto, ak ki mwa kole, “Imuktoi ano moingetap Kamuktaindet ne Toroor konyo ole ami?”

10 Ara ma cham Daudi anyun koip moingetap Kamuktaindet ne Toroor konyo ole mi ineendet eng' nganaseetap Daudi. Ago ki ip `ineendet kwo taban, kwo kootap Obed-edom Getindet.

11 Ki tebee moingetap Kamuktaindet ne Toroor kootap Obed-edom Getindet arawek somok, ak ki iberuur `Kamuktaindet ne Toroor Obed-edom, ak koonnyi tugul.

12 Ki kimwachi Daudi keleenji, “Kigoberuur Kamuktaindet ne Toroor kootap Obed-edom, ak tuguukyik tugul, amu moingetap Kamuktaindet.” Ara ki wo `Daudi koip moingetap Kamuktaindet eng' poiboiyet eng' kootap Obed-edom kotogos konyo nganaseetap Daudi.

13 Kingo kagoba mitainik lo icheeget che ki ibei moingetap Kamuktaindet ne Toroor, koeny eito ne pungus ak age ne akwai.

14 Kogagermenegei `Daudi ephod ne po katanit, koureren eng' taitap Kamuktaindet ne Toroor eng' kimnateennyi tugul.

15 Ki ibu anyun `Daudi ak koot tugul ne po Israel moingetap Kamuktaindet ne Toroor kotyenonu ak koguutonu iryagook.

16 Kingo it moingetap Kamuktaindet ne Toroor nganaseetap Daudi, koiit eng' tirisia Mikal cheptap Saulo. Kingo keer `ineendet Laitoryat Daudi kotwoltwoli ak kourereni eng' taitap Kamuktaindet ne Toroor, kosas ineendet eng' muguleldanyi.

17 Ki ip moingetap Kamuktaindet ne Toroor konyo ko, ak konde oldanyi eng' kwenutap emait ne kiga koteekyi Daudi. Yeityo kogoito `Daudi kagoochinoik che kibeelei ak kagoochinoigap kaalyeet eng' taitap Kamuktaindet ne Toroor.

18 Kingo kagogees Daudi kagoitoetap kagoochinet ne kibeelei ak kagoochinoigap kaalyeet, koberuur piik eng' kainetap Kamuktaindet ne Toroor ne po lugoosyek.

19 Kipchechi magatyat, pendo ak magatyatap sabibuk che yamyotiin piik tugul eng' tuiyet tugul ne po Israel, murenik ak kwonyiik. Ki igoochi chii age tugul yeityo kwo chii tugul koonnyi.

20 Ye kingo week Daudi koberuur piigap koonnyi, konyo saang' Mikal cheptap Saulo kotorook Daudi ak koleenji, “Ka itoroorot ne tya laitoryatap Israel rani, ne kang'aanygei eng' taitap otwogikyik che tiibiik, ko uu kiptangoiya ne ng'aanyegei ama ililani!”

21 Koleenji `Daudi Mikal, “Kagaureren eng' taitap Kamuktaindet ne Toroor ne ki lewena asiir kwandang'ung' ak asiir koonnyi tugul, kondea aek pounindet eng' piigap Kamuktaindet ne Toroor, aboi Israel. Nooto anyun, aurereni eng' taitap Kamuktaindet ne Toroor.

22 Iman, ak ta kesasa kosiir niito, ak ageeregei aegu ne ming'in. Ko agobo tiibiicho otwogik che kemwa, koteecha icheeget.”

23 Ak ma sich Mikal cheptap Saulo lakwa agoi peetuutap meennyi.

©Bible Society of Kenya, 2019

Bible Society of Kenya
Lean sinn:



Sanasan