2 SAMUEL 3 - Bukuit Ne Tilil

¹ Ki piit pooryeet eng' peetuusyek che chaang' eng' kootap Saulo ak kootap Daudi. Ki kimiit Daudi kotesak, ago kinyalul kimnateetap kootap Saulo kwo let.

Weeriigap Daudi

² Ki kisikyi `Daudi weeriik eng' Hebron; Taaitanyi ko ki Amnon, ne kisiche Ainoam Jesreelyot.

³ Weeriinnyi ne po aeng' ko ki Kileap, ne kisichei Abigail ne ki osotyotap Nabal Karmelindet. Ne po somok ko ki Absalom ne kisichei Maaka cheptap Talmai laitoryatap Gesur.

⁴ Ne po ang'wan ko ki Adonijah weeriitap Haggith ak ne po muut ko ki Shepatiah weeriitap Abital.

⁵ Ne po lo ko ki Itream ne kisichei Eglah osotyotap Daudi. Ki kisikyi chuuto Daudi eng' Hebron.

Kowendi abner komostap Daudi

⁶ Ye kibortos kootap Saulo ak kootap Daudi, ko kitechkei Abner kogimit eng' kootap Saulo.

⁷ Ki tinyei `Saulo chebaigeiyat ne ki kiguure kainennyi Rispa, cheptap Aia. Ki teebee `Ishbosheth Abner koleenji, “Amu nee si obaigei ak chebaigeiyatap abba?”

⁸ Ki nereech anyun miising' `Abner amu ng'aleegap Ishbosheth, ak kowol kole, “Tos Aa metitap seseetap Judah? Ago rani aboorchini myeeindo kootap Saulo kwandang'ung', tupchosyekyik ak choronokyik ak ma andein eutap Daudi, ago kerwokwo rani ile kalel agobo kwonyi.

⁹ Ingoyachi Kamuktaindet ne Toroor ko uu nooto Abner, ak kotes ngot koma yachi anee Daudi ko uu ye ki iyasyechi `Kamuktaindet ne Toroor ineendet.

¹⁰ Autoi laitornatet eng' kootap Saulo ak alumde ng'echereetap Daudi kolaitoran eng' Israel ak Judah kobooch Dan agoi Beer-sheba.”

¹¹ Ki mata komuuch kowolji Abner ng'olyoot age, amu ki iywei ineendet.

¹² Yeityo koyookto piik `Abner koba kap Daudi ne kita wendi ineendet koleenji, “Po ng'oo emet? Ngeyai tuwai arorutyet kiyomegei, mi eunnyu kobooten si amutun Israel tugul kobwa ole imi.”

¹³ Kowol `Daudi kole, “Myee, ayae arorutyet kobooten, ago kiit agenge ne amagenen, ko megeere togeennyu agoi imutu korook Mikal cheptap Saulo ye inyone igeera.”

¹⁴ Yeityo koyookto `Daudi piik koba kap Ishbosheth weeriitap Saulo koleenji, “Koono osotyondennyu Mikal ne ki anyoonune koito irirenik pogol che po Philistiik.”

¹⁵ Ara ki iyookto Ishbosheth piik koba komutune manong'otyondennyi; nooto ko Paltiel weeriitap Lais.

¹⁶ Ki pa ak monong'otyondennyi koriiroti manong'otyondennyi kosubi kwonyooto kot koit Baurim. Eng' yooto po Baurim, koleenji anyun `Abner monong'otyonooto, “Ui, iweektegei.” Ak ki week.

¹⁷ Ki ng'alaal Abner ak poisyegap Israel kole, “Ki ocheeng' koek laitoryandeng'wong' Daudi eng' peetuusyek che ki kosiirto.

¹⁸ Ara anyun oyai, amu ki komwa Kamuktaindet ne Toroor agobo Daudi kole, ‘Asaru piikyuk Israel eng' otwogindennyu Daudi eng' eunegap Philistiik ak eng' eunegap puunikwak tugul.’ ”

¹⁹ Ki ng'alaalji `Abner Benjamin agine kogas. Yeityo kogeny kwo Abner komwachi Daudi kogas eng' Hebron tuguuk tugul che kigeerei Israel ak kootap Benjamin tugul kole nyolu.

²⁰ Kigoit anyun `Abner ole mi Daudi eng' Hebron, kobooto piik tiptem, koyachi igoorto `Daudi Abner kobooto murenjoto ki mi kobooto ineendet.

²¹ Ki leenji `Abner Daudi, “Ang'eete awendi ak ayumji Israel tugul kiptaiyandennyu laitoryat si kobiit koyai arorutyet kobooten, ak si kobiit ilaitorane che machei muguleldang'ung'.” Eng' let kosaiseret `Daudi Abner, ak ki wo eng' kaalyeet.

Kobarei `Joab Abner

²² Ki pwanei eng' sainooto otwogigap Daudi ak Joab kobunu lugeet ak ki ibu parunenik che chaang'. Ago king'oitu koma mi Abner kobooto Daudi eng' Hebron, amu kiga komwachi `Daudi ineendet kwo eng' kaalyeet.

²³ Kingo it Joab ak lugeet tugul ne ki mi ak ineendet, kemwachi Joab keleenji, “Kanyo Abner weeriitap Ner ole mi laitoryat ak kagoleenji kwo, ak kakwo eng' kaalyeet.”

²⁴ Konyo anyun `Joab ole mi laitoryat ak koleenji, “Nee ne kaiyai? Kanyo Abner oldang'ung' ak amu nee si iunde kwo ak kakwo iman?

²⁵ Ingen inyee Abner weeriitap Ner ile kanyo koberberin si konai mandaeng'ung' ak nyonuneng'ung' ak konai tuguuk tugul che iyae.”

²⁶ Kingo mong' Joab eng' kap Daudi, koyookto piik koosup Abner ak koweech ineendet eng' keriingetap peek ne po Sira, ago ki ma nai Daudi.

²⁷ Kingo kagoweek Abner konyo Hebron, komut Joab ineendet kwo taban agoi kwenutap ormariichet, kwo kong'alaalji mutyo ak kitoor ineendet moet eng' yooto ak kime agobo korotiigap Asahel ng'eetap kamet.

²⁸ Kingo kas `Daudi eng' let, komwa kole, “Ma tinye anee ng'oogisto ak laitornatennyu eng' taitap Kamuktaindet ne Toroor koigeny eng' korotiigap Abner weeriitap Ner.

²⁹ Ingotebee metitap Joab ak kotebee kootap kwandanyi tugul. Amat kobet eng' kootap Joab chii ne tinyei kusereet anan ne tinyei mogondos anan ne tebenoti kirokto anan ne kibarei eng' rotwetap chok anan ko ne ma tinyei amitwogik.”

³⁰ (Ki par anyun `Joab ak Abisai ng'eetap kamet, Abner, amu kiga kobar Abner Asahel weeriit ne tupcho, eng' Gibeon eng' lugeet.)

³¹ Yeityo koleenji `Daudi Joab kobooto piik tugul che ki mi ak ineendet, “Ogereer ngoroikwok ak ogermenegei kuniok yeityo oteiye eng' taitap Abner.” Ak ki isubi Daudi kiit ne ki kisute.

³² Kitupchi Abner Hebron, ak kiwaach laitoryat eng' kutit ne oo ak koriir eng' kereritap Abner. Ki riiryo kora piik tugul.

³³ Ki riir laitoryat agobo Abner kole; Konyolji Abner kome ko uu ye meei chiito ne abusat?

³⁴ Ki ma ko ratotiin euneguk, ak ki ma ki rat keelyeguk eng' mugurek. Ko uu ye ibutyin chiito taitap lagogap yaityet, ko koibut anyun ko uu nooto. Ak ki riiryo piik tugul kogeny agobo ineendet.

³⁵ Yeityo kobwa piik tugul komwachi Daudi koamis ye kita ko peet. Ago ki iyasyo Daudi kole, “Ingoyaiywo Kamuktaindet ko uu nooto ak kotes koosir, ngot achamcham amitwogik anan ko kiy age agoi kororokto asiista.”

³⁶ Ki keer piik tugul kioto, ak ki ibaibai icheek; amu kiit age tugul ne ki yai laitoryat, ko ki ibaibai piik tugul.

³⁷ Ki nai anyun piik tugul ak Israel tugul eng' peetuunooto kole, ki ma kobooto laitoryat pareetap Abner weeriitap Ner.

³⁸ Yeityo koleenji laitoryat otwogikyik, “Mongen ole kaibut rani pounindet ak ko chiito ne oo eng' Israel?

³⁹ Aa nyalulat rani, agot nganda aa laitoryat ne ki kiil, ak temena pichu, weeriigap Zeruiah. Ingoyaakyi Kamuktaindet ne Toroor yaindetap yaityet ko uu yaityennyi.”