2 SAMUEL 22 - Bukuit Ne Tilil

Tyendap Kalasunet

¹ Kityenji `Daudi Kamuktaindet ne Toroor ng'aleegap tyeni eng' peetuut ne kigasar `Kamuktaindet ne Toroor ineendet eng' eunegap puunikyik tugul ak eng' eutap Saulo.

² Kityen kole, “Kamuktaindet ne Toroor rwandennyu, irimennyu ak saruunindennyu.

³ Kamuktaindet ko rwandennyu, ne amang'u. Long'ennyu ak kuinetap yetunennyu, teeksennyu ne kooi ak ole amwechini, yetindennyu ne sarwo eng' koroomnateet.

⁴ Aguure Kamuktaindet ne Toroor, ne nyoljin kilas, si kesarwo eng' puunikyuk.

⁵ Ki yiema peek che mildogei che po meet, ki koono maranosyegap yaityet aiyweis.

⁶ Ki yiema poroonigap Olemi Che ki kobek; kichea mestonogap meet.

⁷ Ki aguur Kamuktaindet ne Toroor eng' pichiindanyu, ee, ki aguur Kamuktaindennyu; Ki kas kutinnyu eng' hekalunnyi, ak ki it riirekyuk itiikyik.

⁸ Ki kirgiren ng'wony anyun ak ki potan, ki twagei lumeiywegap kipsengwet, ak kotumdumgei amu kinereech.

⁹ Ki togosta iyeto ne ki mang'une seruunekyik; ki peelso maat ne ki mang'une kutinnyi. Kilalyo nesek eng' maata.

¹⁰ Ki im kipsengwet ak kochoorgei ineendet. Ki mi mesundeito ne oo kurereetap keelyekyik.

¹¹ Ki laany kerubindet ak kotiriren; ee, ki took eng' kebebaigap usoonet.

¹² Ki yai mesundeito koek emaisyekyik che mi komoswekyik tugul, kayumetapkei ne po peek, poolik che tuuen che po parak.

¹³ Kilalyo nesek eng' kaluunet ne ki mi tainnyi.

¹⁴ Kitul Kamuktaindet ne Toroor eng' kipsengwet, ak kitwek Ineendet Ne Toroor Miising'.

¹⁵ Kimwokto kipchabonik ak koiyesta puunik; kigon kalyeleet ak koiyesta icheek.

¹⁶ Ki took anyun kereruusyegap nyanjet, king'ang'agis lumeiywegap ng'wony, eng' kereetap kong' ne po Kamuktaindet ne Toroor, ak eng' cheetap kabuusetap seruunekyik.

¹⁷ Ki iyogoigei eng' parak ak koganaba; ki ichuutwa among' eng' peek che chaang'.

¹⁸ Kisarwo eng' punyondennyu ne kiim, eng' icheeget che kiwecha, amu ki kiimeen kosiiro.

¹⁹ Kichea eng' peetuutap nyalildanyu, ago ki ek Kamuktaindet ne Toroor ne atiegei.

²⁰ Ki imuta amanda awo ole paraa; kisarwo amu ki paibait eng' anee.

²¹ Ki koono Kamuktaindet ne Toroor ko uu imandanyu; ki koono ko uu tiliilindap eunekyuk.

²² Amu ki ariip ortinwegap Kamuktaindet ne Toroor, ma abagaakte Kamuktaindennyu asup oor ne ya.

²³ Mi tainnyu kirwoogutikyik tugul, ak ma aistoegei kaneetisyosyekyik.

²⁴ Ki aititaat agane eng' tainnyi, ak ki ariipkei si ma nama tengekto.

²⁵ Ki koono anyun Kamuktaindet ne Toroor ko uu imandanyu; ko uu tiliilindanyu eng' tainnyi.

²⁶ Eng' che tinyei rireenetapkei ii po rireenetapkei; ak eng' chiito ne igeesunotke iboortoigei ile ii igeesunotke.

²⁷ Eng' che tiliileen iboortoigei ile ii tiliil, ak eng' che mastoi, obortosi.

²⁸ Isaru che nyerootiin, ago igeere che mendos si kobiit iming'in.

²⁹ Ii tainnyu Kamuktaindet ne Toroor; ak ikwenyi Kamuktaindet ne Toroor mesundeitonyu.

³⁰ Eng' amuuchi aiyestoi lugeet eng' inyee, eng' Kamuktaindennyu atorombeni asiire irimeet.

³¹ Ititaat ooreetap Kamuktaindet ne Toroor; ki konaak ng'olyootap Kamuktaindet ne Toroor, Ineendet long'eetap icheeget tugul che imang'u ineendet.

³² Amu tos ng'oo Kamuktaindet, kobatee Kamuktaindet ne Toroor? Ak tos ng'oo rwandet, kobatee Kamuktaindennyo?

³³ Kamuktaindet ne koono kimnateet, irimennyu ne kiim ak ko ne yao aek ne igeesunotke eng' ooreennyu.

³⁴ Yaei ineendet keelyekyuk koigei che po kenyeleet, nama atonon eng' komoswekyuk che torooreen.

³⁵ Ineeti eunekyuk koyai lugeet; si kong'i eunekyuk kwanget ne po sugunwet.

³⁶ Ki igoono long'eetap yetuneng'ung' agine; ak ki koeeta talasyeng'ung'.

³⁷ Ki ibaraiywa kakwautikyuk, ama ichabaita keelyekyuk.

³⁸ Ki asup puunikyuk ak abar; ak ma aweigei agoi kogeskei.

³⁹ Ki awong'u icheek, ak atui kot koma komuuchi kong'eetyo. Ee, kagobutyi icheek keelyekyuk keel.

⁴⁰ Ki iratwa kimnateet ne po lugeet; ki iterteerwa aboi che king'eetya.

⁴¹ Ki iwelel puunikyuk kotuktocha patai, si kobiit agees icheek che wecho.

⁴² Ki riiryo, ago ki ma piit ne ki sar icheek; ki riirchi Kamuktaindet ne Toroor, ago ki ma wolji.

⁴³ Ki atonaton anyun icheek komengegitu koigei temburyegap ng'wony, ki atyech ko uu ng'atateek che mi ortinwek ak aiyeste.

⁴⁴ Ki isarwo aginye eng' pooryosyegap piikyuk; ki iriibo aek metitap pororyosyek, tuun ota piik che tomo anai.

⁴⁵ Tuun kasa iit weeriigap punootyot, ye kas agobo anee, eng' yooto kogasa iit.

⁴⁶ Pegunoti toek kowandogei, ak komong' eng' ole ung'egei kobotandos.

⁴⁷ Sabei Kamuktaindet ne Toroor, ak ilasunoot rwandennyu, ak ingotororit Kiptaiyat Kamuktaindetap rwandetap yetunennyu,

⁴⁸ Kamuktaindet ne yaaktoiywo mugetuut, ineendet ne iming'ini piik kogasa iit,

⁴⁹ ineendet ne imutwaa amang'une puunikyuk. Ee, itoroora asiir icheek che ng'eetyina; isarwo eng' chiito ne koroom.

⁵⁰ Aweegun kongoi anyun, ee Kamuktaindet ne Toroor, eng' kwenutap pororyosyek, ak atyenji kaineng'ung' kalasunoik.

⁵¹ Igoochin laitoryandennyi saruunet ne oo; ak koboorchin nenyi ne iilaat chamyennyi ne tala, Daudi ak iyotennyi agoi koigeny.”