2 SAMUEL 21 - Bukuit Ne Tilil

Kong'eeti Sheba pooryeet

¹ Ki piit rubeet eng' peetuusyegap Daudi, eng' kenyiisyek somok che ki isubegei. Kingo cheeng' `Daudi togetap Kamuktaindet ne Toroor kole Kamuktaindet ne Toroor “Po Saulo ak koonnyi ne po korotiik ng'olyoondoni, amu ki par Gibeonik.”

² Ki kuur `laitoryat Gibeonik ak koleenji; (ki ma ko po Gibeonik piigap Israel, ago ki po piik che ki ng'etune Amorik. Nga kiga koyasyechi icheek `piigap Israel kole maborei, ko kiga kotyem Saulo kobar icheek kogiiljingei piigap Israel ak Judah.)

³ Ki leenji `Daudi anyun Gibeonik, “Ayaiywok nee? Ak ayai kagaigao nee si kobiit oberuur poroteetap Kamuktaindet ne Toroor?”

⁴ Koleenji `Gibeonik ineendet, “Ma ng'olyootap fedha anan ko thahabu eng' kwenunnyo acheek ak Saulo, anan ko koonnyi. Ak ma potech kebar chii age tugul eng' Israel.” Ago ki le Daudi, “Kiit ne omwae ayaiywok kioto.”

⁵ Koleenji `icheek laitoryat, “Chiichi ki igeswech ak ne kichobei kegirindech kole kebarech kot koma king'etu eng' kiwoteet age tugul ne po Israel;

⁶ ingegoonech weeriikyik tisap si kigartatyi Kamuktaindet ne Toroor eng' Gibea ne po Saulo, ne ki lewen Kamuktaindet ne Toroor.” Ak ki le laitoryat, “Agoonu icheek.”

⁷ Ago ki riiree laitoryat Mephibosheth weeriitap Jonathan, weeriitap Saulo, amu kayosyetap Kamuktaindet ne Toroor ne ki mi kwenunnywa; kwenutap Daudi ak Jonathan weeriitap Saulo.

⁸ Ago ki nam laitoryat weeriik tuwai che po Rispa cheptap Aia, che kiga sikyi Saulo, Armoni ak Mephibosheth ak weeriik muut che po Mikal cheptap Saulo, che kiga sikyi Adriel weeriitap Barsilai Meolatindet,

⁹ ak konde eunegap Gibeonik ak ki igartaat icheek eng' tulweet eng' taitap Kamuktaindet ne Toroor. Ki pek tugul ko tisap kibagenge. Ki kibar icheek eng' peetuusyegap kesisyet, eng' peetuusyek che po tai eng' taunetap kesisyetap baale.

¹⁰ Ki inem Rispa cheptap Aia kuniok ak kotochigei eng' rwandet, kobooch taunetap kesisyet agoi korobonji ropta ne punu kipsengwet. Ma chamji toriitik kobutyi muuswekwak peet anan kobwa tyong'igap timiin kemoi.

¹¹ ki ngemwachi Daudi kiit ne koyai Rispa cheptap Aia, chebaigeiyatap Saulo,

¹² kwo koip kawegap Saulo ak kawegap Jonathan weeriinnyi eng' piigap Jabes-gilead, che kiga choor eng' ooreetap Beth-san, ole kiga igartate Philistiik eng' peetuut ne kibarei `Philistiik Saulo eng' Gilboa.

¹³ Ki ip kawegap Saulo ak kawegap Jonathan weeriinnyi kotogos ak koyum kawegap icheeget che kiga kigartaat.

¹⁴ Kitup anyun kawegap Saulo ak che po Jonathan weeriinnyi eng' emetap Benjamin eng' Shelah, eng' kereritap Kish kwandanyi, ak ki yai tuguuk tugul che ki ng'at laitoryat. Kingo pata chooto kogasyi Kamuktaindet icheek riirek agobo emet.

Pooryet ak Philistiik

¹⁵ Ki piit lugeet kogeny eng' Philistiik ak Israel, ak king'eet kichoortagei Daudi ak otwogikyik, koba kobargei ak Philistiik.

¹⁶ Kileen Isbi-benok ne ki po weeriigap piik chemosinik ak ko ne kinyigiisindap ng'otinnyi ko ki keruutik somok ak kebeber che po sugunwet, ak kiga rat rotwetap chok ne leel kole kobar Daudi.

¹⁷ Ago kitoret Daudi Abisai weeriitap Zeruiah. Kikwer Philistindet kobar, yeityo koyasyechi `piigap Daudi ineendet koleenji, “Ma kebendi tugul kogeny lugeet ak inyee, si memis taitap Israel.”

¹⁸ Kingo pata niito, kobiit lugeet kogeny ak Philistiik eng' Gob. Ki par eng' yooto `Sibeikai Husatindet Shaaph, ne ki po weeriigap piik chemosinik.

¹⁹ Ki piit kogeny lugeet ak Philistiik eng' Gob, ak ki par Elanan weeriitap Jaareoregim Bethlehemindet Goliat Gitindet, ne ki kergei irumetap ndirinnyi ak keetit ne taachin usiisyek chiito ne nabisyei.

²⁰ Ki piit lugeet kogeny eng' Gath, ole ki mi chiito ne kooi kot, ne ki tinyei morik lo eng' euut age tugul, ak ki tinyei morik lo eng' keeldo age tugul, ki tiptem ak ang'wan tugul. Ki isichei chiichooto agine chiito chemosit.

²¹ Ye kingo reeny Israel, kobar ineendet Jonathan weeriitap Shimei ng'eetap kametap Daudi.

²² Ki kisikyi pichooto ang'wan chiito chemosit eng' Gath, ak ki par Daudi ak otwogikyik pichooto.