2 SAMUEL 2 - Bukuit Ne Tilil

Koegu Daudi laitoryatap Judah

¹ Kingo pata tuguuchuuto koteebe `Daudi Kamuktaindet ne Toroor kole, “Atogoste awe age eng' nganasoogap Judah?” Ak ki wolji `Kamuktaindet ne Toroor ineendet koleenji, “Togoste.” koteebee `Daudi koleenji, “Atogoste awe ano?” Ak ki leenji, “Ui Hebron.”

² Kotogosta anyun `Daudi olooto kobooto osotikyik aeng', Ainoam Jesreelyot ak Abigail ne ki osotyotap Nabal Karmelindet.

³ Ki imut `Daudi piikyik che ki mi kobooto ineendet kotogosta, ak ki wo chii tugul ak piigap koonnyi, ak komeny nganasoogap Hebron.

⁴ Ki pwa piigap Judah kobwa koiil Daudi eng' olooto koek laitoryatap kootap Judah. Ki ngemwachi Daudi keleenji ki piigap Jabes-gilead che ki tubei Saulo,

⁵ koyookto `Daudi piik koba oldap piigap Jabes-gilead koleenji icheek, “Ingoberuurok Kamuktaindet ne Toroor, amu ki oboorchi myeini kiptaiyandeng'wong', nooto ko Saulo otup ineendet.

⁶ Ingoboorwok Kamuktaindet ne Toroor ak kogoonok myeeindo ak imanit, ak ayaakwok agane myeiniito amu ki oyai kiito.

⁷ Ingogimegitu anyun eunekwok ak oegu che nyigoonen, amu kogome Saulo kiptaiyandeng'wong', ak kogoiila kootap Judah aek laitoryat eng' icheek.”

Kondai `Abner Ishbosheth koek Laitoryatap Israel

⁸ Kiga komut Abner weeriitap Ner, ne ki kiptaiyatap lugeetap Saulo, Ishbosheth weeriitap Saulo kolanda Mahanaim.

⁹ Ki inde ineendet koek laitoryat koboi Gilead, Ashurik, Jezreel, Ephraim, Benjamin ak koboi Israel tugul.

¹⁰ (Ki po Ishbosheth weeriitap Saulo kenyiisyek artam ye ki tau kolaitorani, ak ki laitoran kenyiisyek aeng'.) Ago ki isup `kootap Judah Daudi.

¹¹ Ak peetuusyek che ki laitoran Daudi eng' Hebron eng' kootap Judah ko ki kenyiisyek tisap ak arawek lo.

Kobaregei piigap Israel ak che po Judah

¹² Ki pa Abner weeriitap Ner ak otwogigap Ishbosheth weeriitap Saulo kong'etee Mahanaim koba Gibeon.

¹³ Ki pa ak icheek Joab weeriitap Zeruiah ak otwogigap Daudi ak kituiyechi ak Abner tamboiyotap Gibeon. Ki ibuure alak tamboiyot komosi, kobuure alak tamboiyot komosin.

¹⁴ Ki leenji `Abner Joab, “Asoomin ale ingong'eetyo murenik kourerenso eng' tainnyo.” Kowol Joab kole, “Ingong'eetyo.”

¹⁵ Ki ng'eetyo anyun koba ak ki kiit; ki taman ak aeng' che po Benjamin ak che po Ishbosheth weeriitap Saulo, ak ki taman ak aeng' che po otwogigap Daudi.

¹⁶ Ki nam age tugul metitap age ak kotoorgei karasaik eng' rotoogap chok, ak ki ibutyo tuwai. Ki kiguure yooto anyun Helkat-hasurim ne miitei Gibeon.

¹⁷ Kiga koromit pooryeet miising' eng' peetuunooto ak ki kiterteer Abner kobooto piigap Israel eng' taitap otwogigap Daudi.

¹⁸ Ki mi yooto weeriik somogu che po Zeruiah: Joab, Abisai ak Asahel. Ki chepchep Asahel ko uu cheptirgichet.

¹⁹ Ki oon `Asahel Abner. Ma masta kwo eutap tai anan ko murot kaataam ye ki oonei Abner.

²⁰ Kiguskong' Abner ak koteebe koleenji, “Tos inyee ni Asahel?” Kowol kole, “Anee.”

²¹ Ak ki leenji `Abner ineendet, “Ui taban, eutap tai anan ko ne po kaataam ak inam age eng' murenjo yeityo irebe kariikyik.” Ago ma cham Asahel komasta kobagaakta ineendet.

²² Ak ki leenji `Abner Asahel kogeny, “Ui taban, mata isubwo, amu nee si imach atoorin kosorenen? Si kota amukta ano anyun ageer togeetap Joab ng'eetap kamenng'ung'?”

²³ Ago kingo eesyo komasta, kotoor anyun `Abner ineendet moet eng' chileiywotap ng'otit kosore. Ki ibut eng' yooto ak komechi yooto. Kitononso anyun tugul che ki it yooto kigebutyi Asahel ak kome.

²⁴ Ago ki oon `Joab ak Abisai Abner. Ye kingo roroktoi asiista, koit tulweetap Ama, ne mi taitap Gia eng' ooreet ne wendi surkwen ne po Gibeon.

²⁵ Ki iyumgei lagogap Benjamin konamgei ak Abner koek lugeet agenge yeityo kotononso eng' tulweet parak.

²⁶ Ki kuur `Abner Joab koleenji, “Tos parisyei rotweet agoi? Mengen ile egu ng'wanindo eng' let? Tyanitu si imwachi piik koweek ko mata koosup che tupcho?”

²⁷ Kowol kole Joab, “Ko uu ye sabei Kamuktaindet, ko nda kama ing'alaal ta kagoba piik iman atkai karon, ta kama kosubi chii tugul tupchennyi.”

²⁸ Ki kuut anyun Joab iryageet ak kitononso piik tugul, mata koon Israel kogeny anan kota koboryo kogeny.

²⁹ Ki pa Abner ak piikyik kemounooto tugul kobun Arabah ak kilandae Jordan kobun tugul Pitron ak ki it Mahanaim.

³⁰ Ki week anyun Joab ma ta koosup Abner. Kingo kagoyum piik tugul, ko ki petyotiin eng' otwogigap Daudi piik tamanu ak sogool kobooto Asahel.

³¹ Ago kiga kobar otwogigap Daudi che po Benjamin ak murenigap Abner kot kobek piik pogolwogik somogu ak tamanwogik lo.

³² Kila `icheek Asahel ak kotupchi kereritap kwandanyi ne ki miitei Bethlehem. Yeityo koba Joab ak piikyik kemout tugul ak kieekyi eng' Hebron.