2 SAMUEL 19 - Bukuit Ne Tilil

Koriirchin `Daudi Absalom

¹ Ki kimwachi Joab keleenji, “Riirei laitoryat ak kotei agobo Absalom.”

² Kiwalak katerteerisyet eng' peetuunooto koek kateiyet eng' piik tugul, amu ki kas piik kemwaei peetuunooto keele, Arageni laitoryat agobo weeriinnyi.

³ Ki pa piik nganaseet peetuunooto koung'ategei, ko uu ye ung'ootegei piik che ililandos, ye mweitos eng' lugeet.

⁴ Ki tuch `laitoryat togeennyi, ak ki ite laitoryat eng' kutit ne oo kole, “Ooi weeriinnyu Absalom, ooi Absalom, weeriinnyu, weeriinnyu!”

⁵ Ki nyo Joab kochut ko ole kimi laitoryat ak koleenji, “Kegoochi togoochigap otwogiguk tugul eng' peetuuni kolilaanso, che kasar saboondang'ung' rani ak saboonwegap weeriiguk, tiibiiguk, saboonwegap osotiguk ak saboonwegap chebaigeiniguk,

⁶ amu ichame icheek che wechin ak iweche icheek che chamin. Kebaarte rani ile ma kiy eng' inyee pounik ak otwogik, amu kaageer rani ale nda ko kasap Absalom ak kebegu acheek tugul rani, ko kata iboiboin miising'.

⁷ Ng'eet anyun, mande ak ing'alaalji otwogiguk, igaigai. Amu ayostosi eng' Kamuktaindet ne Toroor ale, ngot ko memande ko mang'etun chii kemouni. Yaitu nooto eng' inyee kosiir yaityet tugul ne kigonyonjin kobooch ming'inateng'ung' agoi nguno.”

⁸ Ara king'eet anyun laitoryat ak kotebee ormariichet. Ki kimwachi piik tugul keleenji, “Ogeero, tebyei ng'wony laitoryat eng' ormariich”; ak ki pwa tugul taitap laitoryat. Kiga komwei Israel, kwo chii tugul emainnyi.

Koweeksei `Daudi Jerusalem

⁹ Ki piit suryet eng' piik tugul eng' pororyosyek tugul che po Israel kole, “Kisarwech laitoryat eng' puunikyok, ak kisarwech eng' eunegap Philistiik. Ago nguno ko ki komwei ineendet eng' emet komwee Absalom.

¹⁰ Ak kogome eng' lugeet Absalom ne kiga kiiil koboiywech. Ara anyun amu nee si momwa kiy agobo kimut laitoryat koweek?”

¹¹ Ki iyookto anyun `laitoryat Daudi ng'aleek koba kap Sadok ak Abiathar che ki tisiik keleenji, “Omwachi poisyegap Judah oleenji, ‘Amu nee si oegu che po let eng' kamutunetap laitoryat koweek konyo koonnyi? Kogobwonji laitoryat ng'aleegap Israel tugul keele, kimut ineendet konyo koonnyi.

¹² Oo tupchosyekyuk, oo kawekyuk ak panyeekyuk, amu nee anyun si oegu che po let eng' kamutunetap laitoryat koweek?’

¹³ Oleenji Amasa, ‘Tos ma ii kowekyuk ak panyeekyuk? Ingoyaiywo Kamuktaindet ko uu nooto ak kotes kosiir, ngot ko meegu kiptaiyatap lugeet eng' tainnyu kotugul igeer Joab.’ ”

¹⁴ Kiwelel mugulelwegap piik tugul che po Judah, ko uu ne po chiito agenge, ak ki iyookto kemwachi laitoryat keleenji, “Myee iweigei kobooto otwogiguk tugul.”

¹⁵ Ki week anyun laitoryat, konyo Jordan. Ki nyo `Judah Gilgal, kotorook laitoryat, komut kolong'une Jordan.

Ko nyochin kaat `Daudi Shimei

¹⁶ Kichook Shimei weeriitap Gera, Benjaminindet, ne ki po Baurim kochoorgei kobooto piigap Judah kotorook Laitoryat Daudi.

¹⁷ Ki mi kobooto ineendet piik eliphuut agenge che po Benjamin ak Siba otwogindetap kootap Saulo, weeriikyik taman ak muut ak otwogikyik tiptem ak kolandae Jordan eng' taitap laitoryat.

¹⁸ Ki landa kolandae ole kilondoe si komut piigap kootap laitoryat kolong', ak koyai kiit ne kigeerei kole myee. Ki ibutyi ng'wony Shimei weeriitap Gera eng' taitap laitoryat ko kagolong' eng' Jordan,

¹⁹ ak koleenji laitoryat, “Amat koiitya tengekto kiptaiyandennyu anan ibwaat kii kiga yai otwogindeng'ung' komaasak eng' peetuuni kimandoi kiptaiyandennyu laitoryat eng' Jerusalem. Myee ma nam laitoryat kioto eng' muguleldanyi.

²⁰ Amu ingen otwogindeng'ung' kole ki koyai tengekto. Nooto anyun, kanyo rani andou eng' piik tugul che po kootap Joseph achooruge atorogu kiptaiyandennyu laitoryat.”

²¹ Ago ki wol Abisai weeriitap Zeruiah, kole, “Tos manyalu kebar Shimei agobo kiito, amu ki chup ne iilaat ne po Kamuktaindet ne Toroor?”

²² Ago ki wol `Daudi kole, “Kiting'egei nee ak okweek weeriigap Zeruiah kot oegu puunik eng' anee rani? Tos kibarei chii rani eng' Israel? Tos mangen ale, aa laitoryat rani ne pou Israel?”

²³ Ara ki leenji `laitoryat Shimei, “Memee.” Ak ki iyasyechi laitoryat ineendet.

Ko nyochin kaat `Daudi Mephibosheth

²⁴ Ki choorgei Mephibosheth weeriitap Saulo agine kotorook laitoryat. Ki mata kotil siyoogap keelyekyik anan kocher tamnennyi, anan komwet ngoroikyik kobooch peetuut ne kigawo laitoryat agoi peetuut ne ki weeksei kaa eng' kaalyeet.

²⁵ Kingo nyo Jerusalem kogat laitoryat, koleenji `laitoryat ineendet, “Amu nee o, Mephibosheth si mecham keebe tuwai?”

²⁶ Ak ki wol kole, “Kiptaiyandennyu, ee laitoryat, amu ang'wali anee otwogindeng'ung', ko ki aleenji otwogindennyu Siba, ‘Iitoiwo sigiryet si kobiit alaany keebe ak laitoryat,’ ago ki iberbera ineendet.

²⁷ Ki komwaitaena lembech anee otwogindeng'ung' eng' kiptaiyandennyu laitoryat. Ago uu `kiptaiyandennyu laitoryat malaikaiyatap Kamuktaindet, yai anyun kiit ne igeere ile myee.

²⁸ Amu ki uu koot tugul ne po kwandanyu piik che ki kobek eng' taitap kiptaiyandennyu laitoryat, ago ki inde otwogindeng'ung' kwenutap icheeget che amisye meseng'ung'. Ara anyun tos atinye imanda nee anyun kot kota ariirchi laitoryat?”

²⁹ Koleenji `laitoryat ineendet, “Amu nee si kota ing'alaale tuguuguk? Kang'at ale, opchei kooret ak Siba.”

³⁰ Ak ki leenji Mephibosheth laitoryat, “Ingoip ineendet tugul amu ki koweek kiptaiyandennyu laitoryat eng' kaalyeet konyo koonnyi.”

Koyachin `Daudi ne myee Barsilai

³¹ Ki choortagei `Barsilai Gileadindet eng' Rogelim; kwo Jordan kobooto laitoryat, si komut ineendet kolandae Jordan.

³² Kiga koosit miising' Barsilai, ki po kenyiisyek tamanwogik sisiit. Kichopchin laitoryat amitwogik ye kimi Mahanaim, amu ki chiito ne tagunoot.

³³ Ki leenji `laitoryat Barsilai, “Ngelande keebe keamisye tuwai eng' Jerusalem.”

³⁴ Ago ki wolji `Barsilai laitoryat koleenji, “Ata peetuusyek che po kenyiisyegap saboondanyu kot ketogoste ak laitoryat keebe Jerusalem?

³⁵ Aa po rani kenyiisyek tamanwogik sisiit. Tos ta amuuchi abesyo ne myee ak ne ya? Ta komuuchi otwogindeng'ung' kogas kiit ne chamu tuguuk che aame anan ko che aee? Ta amuuchi agas cheetap murenik che tyendos ak kwonyiik che tyendos? Amu nee anyun si kota koek mileet otwogindeng'ung' kogeny, eng' kiptaiyandennyu laitoryat?

³⁶ Landoi otwogindeng'ung' eng' Jordan kityo, kobooto laitoryat, ago amu nee si koyookwo laitoryat melekto ne uu nooto?”

³⁷ Asoomin ale, ngaweek anee otwogindeng'ung' kogeny awo amechi nganasennyu, ye neegitee kereritap kwandanyu ak kamennyu. Ago oroni otwogindeng'ung' Kimham, ingolanda kobooto kiptaiyandennyu laitoryat ak iyachi ineendet kiit ne igeere ile myee eng' inyee.

³⁸ Ki wol `laitoryat kole, “Kilandoi ak Kimham ak ayachi ineendet kiit ne ageere ale myee eng' inyee, ak kiit age tugul ne imageno, ayaun kioto.”

³⁹ Kilandae piik tugul Jordan, ak ki landa laitoryat. Ki ng'utut Laitoryat Barsilai ak koberuur, ak kiweektagei kwo oldanyi.

Kotiyechin piigap Judah ak piigap Israel laitoryat

⁴⁰ Kingo landa anyun laitoryat kwo Gilgal, kolanda Kimham agine ak ineendet. Ki imut `piik tugul che po Judah laitoryat kolong' ak kebebertap piigap Israel.

⁴¹ Yeityo kobwonji laitoryat `piik tugul che po Israel, ak koleenji ineendet, “Amu nee si kochoorin tupchosyekyok piigap Judah ak komutin kobooto koong'ung' ilong'une Jordan kobooto piik tugul che po Daudi?”

⁴² Yeityo kowolji piik tugul che po Judah piigap Israel koleenji, “Ki kiyai niito amu chiitap ooreet ne neegit laitoryat eng' acheek. Amu nee anyun si onereech agobo ng'olyoondonooto? Tos ki kiam tuguugap laitoryat? Anan ki koonech konunet age tugul?”

⁴³ Kowolji `piigap Israel piigap Judah koleenji, “Ki tinyei kebeberwek taman eng' laitoryat, ne siirei ketinye kebeberta ne oo eng' Daudi kosiirok. Ara anyun amu nee anyun si osasech, si moteebenech kotom omutu laitoryandennyo?” Ago ki koromitu waluunetap piigap Judah kosiir ng'aleegap piigap Israel.