2 SAMUEL 17 - Bukuit Ne Tilil

Kiterteeri Ahitopel

¹ Ki leenji `Ahitopel Absalom kogeny, “Chamwo alewen murenik eliphuusyek taman ak aeng', ak ang'eet asup Daudi kemouni.

² Si ache kota ko ng'etat koma imuuchi koyai kiy, ak amuu, ak komwei piik tugul che mi kobooto ineendet. Si abar laitoryat ineegei,

³ ak amutun piik tugul. Uu meetap chiichooto icheeng'e, ye keeweech piik tugul, ak kotebi piik tugul eng' kaalyeet.”

⁴ Ki ibaibai Absalom ng'olyoondonooto, kobooto poisyek tugul che po Israel.

⁵ Yeityo komwa `Absalom kole, “Oguur Hushai Arkindet agine konyo si kegas kiit ne mwaei agine.”

⁶ Kingo it Hushai ole mi Absalom, komwachi Absalom ineendet koleenji, “Kamwa ko uu ni Ahitopel. Ara ki yai ko uu ye kamwa? Ngo ma uu nooto, imwa inyee ng'olyoong'ung'.”

⁷ Ki leenji `Hushai Absalom, “Ma myee ng'olyoot ne kamwa Ahitopel ra.”

⁸ Ki le kogeny Hushai, “Ingen kwandang'ung' ak piikyik ile piik che nyigoonen ak tinyei ng'wanindo eng' kabwaatutikwak ko uu magalaluut ne kagirebe aarekyik eng' timiin. Ne siirei ko kwandang'ung' ko chiitap lugeet; ma koi ruiyo ak piik.

⁹ Agot nguno ko kogiuny eng' keriinget, anan ko eng' komosta age. Si ye kagobek alak eng' icheek korook, ko age tugul ne kagas komwa kole, ‘Mi parisyet eng' kwenutap piik che isubi Absalom.’

¹⁰ Agot ineendet ne nyigan, ne uu muguleldanyi muguleldap ng'etundo, kochootei kogesugei, amu ingen Israel tugul kole chiito ne nyigan kwandang'ung' ak icheek che mi ak ineendet ko piik che nyigoonen.

¹¹ Ago arwoochi aleen, ingoyumjingei Israel tugul, kobooch Dan agoi Beer-sheba, kotenit ng'aniek che miitei ngeguutap araraita eng' chaang'indo, si iwe lugeet inyeendet.

¹² Si keche ineendet eng' komosta ne kaginyoorchi ak kibutyi ineendet ko uu ye ibutyin rewoot ng'wony. Ma kituuchi agot agenge eng' ineendet ak piik tugul che mi kobooto ineendet.

¹³ Ak kogeny, ngwo nganaseet, koibu Israel anyun rogoosyek kobwa nganasanooto, yeityo kong'us kwo aineet kot koma ng'et koita agenge ne ming'in eng' olooto.”

¹⁴ Kole anyun Absalom ak piik tugul che po Israel, Karaaran kirwoogetap Hushai Arkindet kosiir kirwoogetap Ahitopel. Amu kiga til Kamuktaindet ne Toroor koterteer kirwooget ne myee ne po Ahitopel, si kobiit koipchi Kamuktaindet ne Toroor yaityet Absalom.

Kitechin Daudi

¹⁵ Ki leenji anyun `Hushai Zadok ak Abiathar tisiik, Kamwachi Ahitopel ko uu ni ak ko uu ni Absalom ak poisyegap Israel, ago kamwa ko uu ni ak ko uu ni.

¹⁶ Ara anyun oyookte ng'olyoot ochokyi ak omwachi Daudi oleenji, “Amat irue kemouni eng' ole kilandoe kebendi surkwen, ago myee olande ui tugul, si ma kigees laitoryat ak piik tugul che mi ak ineendet.”

¹⁷ Ki tebi Jonathan ak Ahimaaz eng' ole neegitee En-rogelo. Ki cham kowendi chepto ne otwogindet komwachin icheek ng'aleek, ak ki pendi komwachin Laitoryat Daudi, amu ki ma komachei kogeer chii icheek kobendi nganaseet.

¹⁸ Ago ki keer icheek ng'etet age, ak kwo komwachi Absalom. Ki pa tuwai kochaakta ak kiit kootap chiito age eng' Baurim. Ki tinyei chiichooto keriingetap peek eng' kurgennyi, ak ki pa kochoortagei keringonooto oriit.

¹⁹ Ki nam osotyonnyi kerwet ak kogeree kutitap keriingonooto ak komae nganuuk che kagibor paragunnyi, ak ma ki nai.

²⁰ Ki pwa otwogigap Absalom ole mi kwonyooto eng' koyooto ak kingo teebee koleenji, “Mi ano Ahimaaz ak Jonathan?” Koleenji kwonyooto icheek, “Kagoba kolandae kereruut ne mi peek.” Kingo kagocheeng', amaimuuchi konyoor icheek, koweek koba Jerusalem.

²¹ Kingo kagoba icheek, komong' eng' keriingonooto po peek ak koba komwachi Laitoryat Daudi koleenji, “Ong'eetyee ak olande eng' peek, ochaakte, amu kagotil ko uu ni ak ko uu ni Ahitopel agobo okweek.”

²² Ki ng'eet anyun Daudi ak piik tugul che ki mi ak ineendet ak kolandae Jordan. Kingo choru asiista, ko ki ma kota komi agot agenge eng' icheek ne ki tomo kolanda eng' Jordan.

²³ Kingo keer Ahitopel kole mata koosup chii kirwoogennyi, koiito sigiryennyi ak kong'eet kwo kaa, kot koit nganasennyi. Kirarchi keet piigap koonnyi yeityo kwo kogeetkei, ak kime. Ara ki kitupchi poortanyi kereritap kwandanyi.

²⁴ Ki it `Daudi Mahanaim, ak ki landa Absalom eng' Jordan ineendet ak murenik tugul che po Israel kobooto ineendet.

²⁵ Kiga kolewen `Absalom Amasa koboi lugeet kogeer Joab. Amasa ko ki weeriitap chiito ne kainennyi ko ki Itra Yahudyot, ne ki koipkei ak Abigail cheptap Nahas, chepkametap Zeruiah kametap Joab.

²⁶ Ki teech Israel ak Absalom emetap Gilead.

²⁷ Kingo it `Daudi Mahanaim, koip Sobi weeriitap Nahas ne po Rabbah ne po lagogap Ammon, Makir weeriitap Amiel ne po Lo-debar, Barsilai Gileadindet ne po Rogelim,

²⁸ itogusyek, taabook, tereenik, nganuuk, ak baale, peek ak peek che ng'ootin, magandek, sogoryek, igobek

²⁹ kobooto kumyat, mwaitap cheego ak keechiirek ak mugunigap cheego, koipchi Daudi ak piik che ki mi kobooto ineendet, koam. Amu ki le, “Amei rubeet piik, ng'etyotiin ak koamei melelda eng' surkwen.”