2 SAMUEL 15 - Bukuit Ne Tilil

Komachei Absalom korep laitornatet

¹ Kingo pata ni, kochopchigei Absalom chepkichutit kobooto paraisisyek, ak murenik konom che rwae kondoe ineendet.

² Ki ng'eetei Absalom karon miising' ak kotonon eng' ye neegitee ormariichet. Ak kingo tinyei chii age tugul ng'olyoo ne ibei kwo kaplaitoryat kirwookyinechi, koguurei Absalom konyo ye mi ineendet ak koleenji, “Ii po nganaseet ingiro?” Ak kole, “Po otwogindeng'ung' age eng' pororyosyegap Israel.”

³ Yeityo koleenji Absalom ineendet, “Keero, myach ng'aleeguk ak ko lititen, ago ma mi chii ne ki inde laitoryat kogasun.”

⁴ Ki le kogeny Absalom, “Oiye, nda kiga kiyaa aek kirwoogindet eng' emet, ko ngo nyo ole ami chii age tugul ne tinyei ng'olyoo anan kirwooget, ayachini imanda!”

⁵ Kingo riikyi chii age tugul kwo kong'uruuk eng' tainnyi, koyogooito eunnyi, konam ineendet ak kotorooch.

⁶ Ki yachi Absalom ko uu nooto Israel tugul che ki pendi kaplaitoryat agobo kirwooget, ak ki chamak ko uu nooto anyun Absalom mugulelwegap piigap Israel.

⁷ Kingo keskei kenyiisyek ang'wanu, koleenji `Absalom laitoryat, “Kaigai ichamwo awo agoito kaarortaennyu, ne ki aaroorchi Kamuktaindet ne Toroor eng' Hebron.

⁸ Amu ki aaroorte anee otwogindeng'ung' ye kita ami Gesur eng' Syria ale, ‘Ngot koweektaa Kamuktaindet ne Toroor kogeny iman awo Jerusalem, aboisyechini anyun Kamuktaindet ne Toroor.’ ”

⁹ Kingo leenji laitoryat ineendet, “Ui eng' kaalyeet,” kong'eet anyun ak kwo Hebron.

¹⁰ Ago ki iyookto Absalom segeik koba pororyosyek tugul che po Israel, koleenji, “Eng' sait ne kogas iryageet, omwa ole, Laitorani Absalom eng' Hebron.”

¹¹ Ki pa piik pogolwogik aeng'u eng' Jerusalem kobooto Absalom che kiga kiguur ak ki pa eng' perberindanywa komengen kiy.

¹² Ki iyookto Absalom keguur Ahitopel Gilonindet, toretindetap Daudi eng' nganasennyi, Gilo, ye ki igoitoi tiseiywot. Kitesak chaamset, amu kitesaksei piik che namegei ak Absalom.

Komweei Daudi eng' Jerusalem

¹³ Ki nyo chiito kap Daudi ne ki ibu ng'aleek, ak koleenji, “Mi mugulelwegap piigap Israel ak Absalom.”

¹⁴ Ak ki leenji `Daudi otwogikyik tugul che ki mi ak ineendet eng' Jerusalem, “Ong'eetyee, kanyool kemwei, amu ngo ma uu nooto, koma mi chii ne chilili eng' Absalom. Ongechaakte, si ma nyoorwech nguno ak koibwech yaityet ak kobar nganaseet eng' rotwetap chok.”

¹⁵ Kowolji `otwogik laitoryat koleenji, “Ki chobootiin acheek otwogiguk keyai kiit age tugul ne kalewen kiptaiyandennyo laitoryat.”

¹⁶ Ki manda laitoryat ak ki isup ineendet `piik tugul che po koonnyi. Ago ki pagaakta laitoryat chebaigeinik taman koriip kootap laitornatet.

¹⁷ Ki manda laitoryat anyun ak ki isup ineendet `piik tugul, ago ki tebi kitigin eng' koot ne mi tabanuutap nganaseet.

¹⁸ Ki pa otwogikyik tugul kobun ye neegitee ineendet. Ki indoe ineendet Keretik, Peletik tugul ak Gitik che ki murenik pogol lo che ki isubu ineendet kobunu Gath.

¹⁹ Yeityo koleenji laitoryat Itai Gitindet, “Amu nee si inyoo keebe tugul aginye? Weektegei, ui otebi ak Laitoryat Absalom. Ii punootyo inyee ne ki kionun eng' oldang'ung', ara weektegei ui oldang'ung'.

²⁰ Amu koiitu amut, tos myee amutatin ketogostoi ak kerektoi? Amu awendi ole kamach. Weege anyun ak iweech tupchosyeguk, ak ingotep kobooten rireenet ak imanit.”

²¹ Ago ki wolji `Itai laitoryat koleenji, “Ko uu ye sabei Kamuktaindet ne Toroor ak ko uu ye sabei kiptaiyandennyu laitoryat, ko oldo tugul ole mi kiptaiyandennyu laitoryat, ami olooto agane iman, anee otwogindeng'ung' ngo eng' meet anan eng' sabeet.”

²² Koleenji `Daudi Itai, “Ui lande.” Ki landa anyun Itai Gitindet ak piikyik tugul kobooto lagok tugul che ki mi ak ineendet.

²³ Ki waach emet komugul eng' kutit ne oo yooto ki pendi kolondoi, ak ki landae laitoryat kererutap Kidron ak piik tugul kotokyingei surkwen.

²⁴ Ki mi Zadok agine kobooto Lawiik tugul che ki mi ak ineendet koibei moingetap arorutyetap Kamuktaindet. Ki itu, konde ng'wony moingetap Kamuktaindet, yeityo kogoito Abiathar kagoochinoik agoi komanda piik tugul eng' nganaseet.

²⁵ Yeityo koleenji `laitoryat Zadok, “Oweekte moingetap Kamuktaindet koweek kwo nganaseet. Ngot anyooru chameet eng' taitap Kamuktaindet ne Toroor, ko tuun komutwaa kogeny ineendet ak koboorwo moingonooto ak ole tebee.

²⁶ Ago ngot komwa kole, Ma abaibai eng' inyee, ami yu, ingoyaiywo ko uu ye keerei kole myee.”

²⁷ Ki mwachi anyun laitoryat kogeny Zadok tisiindet koleenji, “Tos ma ii keerindet? Weektegei nganaseet eng' kaalyeet ak weeriiguk tuwai; Ahimaaz weeriing'ung', ak Jonathan weeriitap Abiathar.

²⁸ Atebee ole kilandoe kebendi surkwen, agoi agas ng'olyoo eng' inyee ne imwaiwo.”

²⁹ Ki ip anyun Zadok ak Abiathar moingetap Kamuktaindet kogeny kwo Jerusalem, ak ki pa kotebee olooto.

³⁰ Ki togosta Daudi kobun ooreet ne kitogostoe kebendi tulweetap mseituni koriiroti. Kiga tuchkei met ago ma tinyei kweonik. Kituchkei met chii age tugul eng' piik tugul che ki mi kobooto ineendet ak kotogostoi, koriiryoti.

³¹ Ak ki kimwachi Daudi keleenji, “Mi Ahitopel kobooto njaamigap Absalom.” Ak ki sa Daudi kole, “Ee Kamuktaindet ne Toroor, asoomin ale, wal kirwoogetap Ahitopel koek perberyo.”

³² Kingo it `Daudi tulweet parak ole ki cham kilasune Kamuktaindet, ko ki nyo Hushai Arkindet kotorook ineendet, ko kagogereer ngoryennyi ak komi ng'ung'unyek metinnyi.

³³ Ki leenji `Daudi ineendet, “Ngot inyone keebe tuwai iegu mileet eng' anee.

³⁴ Ago ngot iweege iwe nganaseet ak ileenji Absalom, ‘Aegu otwogindeng'ung', ee laitoryat ko uu ye ki aa otwogindetap kwandang'ung' eng' peetuusyek che ki kosiirto, aegu anyun nguno otwogindeng'ung'.’ Eng' yooto anyun, iterteerwa kirwoogetap Ahitopel.

³⁵ Tos ma mi kobooten tisiik, Zadok ak Abiathar? Ko ye igase ng'olyoo age tugul ne punu kootap laitoryat, imwachi Zadok ak Abiathar, tisiik.

³⁶ Tinyei icheek eng' yooto weeriikwak aeng', Ahimaaz weeriitap Zadok ak Jonathan weeriitap Abiathar. Ara oyogune icheek kiy age tugul ne ogase.”

³⁷ Ki it anyun nganaseet Hushai chorweetap Daudi ye kingo itei Absalom Jerusalem.