2 SAMUEL 14 - Bukuit Ne Tilil

Koweeksei Absalom

¹ Ki nai Joab weeriitap Zeruiah kole tokyingei kabwaatutigap muguleldap Laitoryat Absalom.

² Ara anyun ki iyookto `Joab keguur kwondo ne utaat eng' Tekoa yeityo koleenji, “Asaain ale iyaigei ogergeitu ak chiito ne riirei. Ilaach ngoroigap riirek, amat iilegei mwaita, ago ogergeitu ak kwondo ne ki koriir keny agobo chiito ne kime.

³ Yeityo iwe kaplaitoryat ak ing'alaalji ko uu ni.” Ki inde anyun Joab ng'aleek kutitap kwonyooto.

⁴ Ara anyun ki wo kwonyotok po Tekoa kaplaitoryat, ak ye kingo ng'alaaljin laitoryat, kobutyi ng'wony koting'e togeennyi ng'wony, kogutung'ji ak kole, “Toreto, ee laitoryat.”

⁵ Ki teebee `laitoryat ineendet koleenji, “Amin nee?” Ak ki wolji koleenji, “Aa kwony ne ki kosiirtoe manong'otyot iman. Ki kome manong'otyondennyu.

⁶ Ak ki tinyei otwogindeng'ung' weeriik aeng', ak kiboryo tuwai eng' timiin, ama piit chii ne ki ibesyo icheek ak kikwer `age age ak kobar.

⁷ Ki ng'eetyo koot komugul koborye otwogindeng'ung' ak ki le, ‘Koonu ineendet ne kobar ng'eetap kamet si kobiit kebar ineendet agobo saboondap ng'eetap kamennyi nooto kobar, si kebar agine ne kata namei tuguuk, si komis mannyu ne kong'et, ama ituukyi manong'otyondennyu kainet anan ko ne ng'etu eng' ng'wony.’ ”

⁸ Ki leenji `laitoryat kwonyooto, “Ui koong'ung', si ang'at keyaun ng'aleechooto.”

⁹ Ago ki leenji kwonyooto po Tekoa laitoryat, “Kiptaiyandennyu, ee laitoryat, ingotebena tengegi ak kotebee kootap abba, ak ingoek ne ma tinyei ng'oogisto laitoryat ak ng'echerennyi ne po laitornatet.”

¹⁰ Kowol laitoryat kole, “Chii age tugul ne mwaun ng'olyoo imutwaa, si mata kotwain kogeny.”

¹¹ Yeityo komwa kwonyooto kole, “Asoomin ale ingobwaat `laitoryat Kamuktaindet ne Toroor Kamuktaindeng'ung', si mata kobaris ne yaaktoi korotiik, si ma par weeriinnyu.” Ak ki le laitoryat, “Ko uu ye sabei Kamuktaindet ne Toroor, koma ibutyin ng'wony agot sumeiyot agenge ne po weeriing'ung'.”

¹² Kole anyun kwonyooto, “Asoomin ale chamji cheptong'ung' ne otwogindet komwachi ng'olyoot kiptaiyandennyu laitoryat.” Ak ki le, “Mwa.”

¹³ Ki le kwonyooto, “Kilya si ibwaat kiit ne uu no agobo piigap Kamuktaindet? Amu ngo mwa laitoryat ng'olyoot ne uu ni, ko kaigei chii ne tinyei ng'oogisto, amu ma imut laitoryat konyo kaa nenyi ne ki kioon.

¹⁴ Amu nyoljinech kebegu ne matiny ak ki uu peek che kagitumji ng'wony, che ma kimuuchi keram kogeny. Ama istoi `Kamuktaindet saboondo, ago chobei ooreet si mata koigei ne ki kioon ne ki king'eeto.

¹⁵ Nooto anyun kaanyo amwachi ng'olyoondoni kiptaiyandennyu laitoryat, amu ki imua piik. Ki ale anee otwogindeng'ung' ne chepto, ‘Ang'alaaljini laitoryat, abeere imuuchi laitoryat koyachi otwogindennyi soomennyi.’

¹⁶ Amu kasei laitoryat ak kosarwo anee otwogindennyi eng' eutap chiito ne machei kobara ak weeriinnyu koistoenech poroteetap Kamuktaindet.

¹⁷ Amwa anyun anee otwogindeng'ung' ale, ‘Asoomin ale, ingomyeeit ng'olyootap kiptaiyandennyu laitoryat. Iguitos kiptaiyandennyu laitoryat kiit ne myee ak ne ya ko uu malaikaiyatap Kamuktaindet ne Toroor, ak ingotep Kamuktaindet ne Toroor Kamuktaindeng'ung' kobooten.’ ”

¹⁸ Ki wolji anyun laitoryat kwonyooto koleenji, “Asoomin ale, ameung'ena kiy age tugul ne ateebenen.” Ak ki wol kwonyooto kole, “Ingong'alaal kiptaiyandennyu laitoryat nguno.”

¹⁹ Koteebee laitoryat koleenji, “Tos omi ak Joab eng' ng'aleechu tugul?” Kowol kwonyooto kole, “Ko uu ye sabei saboondang'ung', kiptaiyandennyu laitoryat, ma mi chii ne imuuchi komasta kwo eutap tai anan kwo murot kaataam eng' kiy age tugul ne kagomwa kiptaiyandennyu laitoryat. Amu kong'ata otwogindeng'ung' Joab, ak komwaiwo anee otwogindeng'ung' ng'aleechuuto tugul.

²⁰ Ki yai otwogindeng'ung' Joab kiito, si kobiit kewal kiit ne uu ng'olyoondoniito. Tinyei kiptaiyandennyu utaatyet ne uu utaatyetap malaikaiyatap Kamuktaindet, konai tuguuk tugul che mi ng'wony.”

²¹ Ki leenji anyun `laitoryat Joab, “Keer anyuno, ayae kioto. Ui anyun, imutu nerananooto Absalom.”

²² Ki ibutyi ng'wony Joab, kong'uruuk ak koberuur laitoryat. Ki le Joab, “Kagonai otwogindeng'ung' rani kole kaanyooru myeeindo eng' taing'ung', kiptaiyandennyu, ee laitoryat, amu kagoyachi laitoryat otwogindennyi soomennyi.”

²³ Ki ng'eet anyun Joab kwo Gesur, kwo komut Absalom konyo Jerusalem.

²⁴ Ago ki le laitoryat, “Amat konyo kogeero togoch, ago ingowo koonnyi.” Kwo anyun Absalom koonnyi, ama keer laitoryat togoch.

Kotuitos Absalom ak laitoryat

²⁵ Ki ma komi eng' Israel tugul chiito ne ki kilasu eng' korooronindo ko uu Absalom. Ki ma kotinyei perutyet kong'etee keldebesyet agoi metinnyi parak.

²⁶ Kingo nem metinnyi, amu ki inemu suumeekyik eng' kagesunetap kenyiit age tugul, amu kinyigiisen eng' ineendet, ko ki ngebiman suumeekyik ko ki egu keruutik pogol aeng' ak kiy, eng' ratilitap laitoryat.

²⁷ Ki kisikyi Absalom weeriik somok ak chepto agenge, ne ki kiguure kainennyi Tamar, ak ki chepto ne karaaran kot.

²⁸ Ki tebee Absalom kenyiisyek aeng' Jerusalem koma keerei laitoryat togoch.

²⁹ Ki iyookto anyun Absalom keguur Joab, si kobiit koyookto kwo kaplaitoryat, ago ma cham konyo ole mi ineendet. Ki iyookto kogeny ne po aeng', ago ma cham konyo.

³⁰ Ki leenji anyun Absalom otwogikyik, “Ogeero, neegitee mbareetap Joab mbareennyu, ak tinyei baale eng' mbaranooto. Oba obeel.” Ak ki peel otwogigap Absalom mbaranooto.

³¹ Kong'eet anyun `Joab ak konyo ole mi Absalom eng' koonnyi, ak koteebe ineendet koleenji, “Amu nee si kobeel otwogiguk mbareennyu?”

³² Ak ki wolji `Absalom Joab koleenji, “Koaguurin ale, nyoo yu si kobiit ayookten iwe kaplaitoryat, ileenji, Amu nee si anyo eng' Gesur? Kita myee atebee olooto agoi. Chamwo anyun nguno ageer togeetap laitoryat. Nguno anyun, ngot atinye tengekto, kobara.”

³³ Ki nyo anyun `Joab kaplaitoryat ak komwachi; ak kingo kageguur Absalom, konyo anyun kaplaitoryat ak kong'uruuk kot kotiiny togeennyi ng'wony eng' taitap laitoryat. Ki ng'utut `Laitoryat Absalom.