2 SAMUEL 1 - Bukuit Ne Tilil

Meetap Saulo

¹ Kingo pata meetap Saulo, ko kagoweek Daudi kobunu pareetap Amelegik, kobeni Daudi peetuusyek aeng' eng' Ziklag.

² Eng' peetuutap somok, konyo chiito kobun nganaseet ne ki mi Saulo, ko kereerotiin ngoroikyik ak komi ng'ung'unyek metinnyi. Ye kingo it ole mi Daudi, kobutyi ng'wony ak kogutuny koganyit laitoryat.

³ Ki teebee `Daudi ineendet koleenji, “Ibunu ano?” Ak ki wol kole, “Koachilili eng' kambitap Israel.”

⁴ koteebee `Daudi ineendet koleenji, “Kitepto ano ng'aleek? Kanyool iman imwaiwo.” Ki wol kole, “Kimweiso piik eng' lugeet ak kogeny ko ki ibutyot piik che chaang' ak kobek. Ki kome agine Saulo ak Jonathan weeriinnyi.”

⁵ koteebee `Daudi murenonooto kimwachin ineendet koleenji, “Inae nee ile ki kome Saulo ak Jonathan weeriinnyi?”

⁶ Koleenji murenenooto Daudi, “Ye kita ami tulweetap Gilboa, ko ki mi Saulo ko katiegei ng'otinnyi. Ki oonei ineendet miising' `kariisyek ak piik che ketei paraisisyek.

⁷ Ye kingo welelgei, kogeero ak kotwekwo ak ki awolji aleenji, ‘Ami yu.’

⁸ koteebeena koleenjo, ‘Ii ng'oo?’ Ak ki awolji aleenji, ‘Aa Amelegin.’

⁹ Ak ki leenjo, ‘Asoomin ale itononeno eng' yu ami ak ibara amu kagotirityo nga ta asabe.’

¹⁰ Ki atonone anyun ineendet eng' yooto ki miitei ak abar, amu ki anai eng' iman ale ma komuuchi kosap ko kagobut. Ki anemu kuutweetap laitornatet ne ki mi metinnyi ak karnet ne ki mi eunnyi, ak kaaibu kobwa yu aipchi kiptaiyandennyu.”

¹¹ Ki nam anyun `Daudi ngoroikyik kogereer. Ki yai ko uu nooto piik tugul che ki mi ak ineendet yooto.

¹² Ki iteiyo ak koriiryo ak korugutkei agoi koskoleny agobo Saulo, Jonathan weeriinnyi, agobo piigap Kamuktaindet ne Toroor ak kootap Israel che ki pek eng' rotoogap chok.

¹³ Ki teebee `Daudi murenonooto ki mwachin ineendet ng'aleechooto koleenji, “Ii po kap ng'oo?” Ak ki wol kole, “Aa weeriitap punootyot, Amelegindet.”

¹⁴ koteebee anyun `Daudi ineendet koleenji, “Kolya si meiywei ichuul eung'ung' ibar ne iilaat ne po Kamuktaindet ne Toroor?”

¹⁵ Kingo pata, koguur `Daudi age eng' murenik ak koleenji, “Riikte, ibar ineendet.” Ak ki ep ineendet koobut ak kome.

¹⁶ Yeityo koleenji `Daudi ineendet, “Ingotebee korotiguk meting'ung' amu kagobaoryan kuting'ung' korwogun kole, ‘Ki abar ne iilaat ne po Kamuktaindet ne Toroor.’ ”

Riiregap Daudi agobo Jonathan ak Saulo

¹⁷ Ki riirchi `Daudi Saulo ak Jonathan weeriinnyi eng' riirechu,

¹⁸ ak ki mwachi icheek koneet piigap Judah tyendap kwanget, (ki kisirchi bukuitap Jasar):

¹⁹ Ee Israel, ki kibar toroornateng'ung' eng' komosweguk che torooreen! Ki ibututa ano che kiimeen!

²⁰ Mat omwaite eng' Gath, mat obarte eng' ortinwegap Askelon; si ma poiboitu tiibiigap Philistiik, si ma iloskei tiibiigap che ma kimuratan.

²¹ Okweek tuloonoogap Gilboa, Mat kobiitunenak rewoot anan ropta anan mbareenik che mbareenigap kagoochinoik: Amu ki kiwiirta eng' teweernateet long'eetap ineendet ne kiim eng' olooto, Long'eetap Saulo, ne ma koilaat eng' mwaita.

²² Eng' korotiigap che ki kibar, eng' mwanigap che kiimeen, koma week let kwangetap Jonathan, ama week puch rotwetap chok ne po Saulo.

²³ Ki korooron Saulo ak Jonathan, ak ki chamaatiin eng' saboonwekwak, Ak ma pesyo eng' sabeennywa anan eng' meennywa; Ki chepcheben kosiir kipsichinik, Ki kiimeen kosiir ng'etuunyik.

²⁴ Okweek tiibiigap Israel, oriirye agobo Saulo, ineendet ne ki ilaakwok ngoroik che piriireen che po poiboiyet, ne ki inde lelestap thahabu ngoroikwok.

²⁵ Ki ibututa ano che kiimeen eng' kwenutap pooryeet! Ki kibar Jonathan eng' komosweguk che torooreen.

²⁶ Aarageni amu inyee, tupchennyu Jonathan: Ki igoono abaibait miising': Ki po kwong'eet chamyeng'ung' ne ki ichama, ki siirei chamyetap kwonyiik.

²⁷ Ki ibututa ano che kiimeen, ki petyo kariigap lugeet!