2 PETERO 3 - Bukuit Ne Tilil

Peetuut ne po nyonunetap Kiptaiyat

¹ Chamanichu, parwaani asirwok nguno ko ne po aeng', ak eng' tuwai ang'eeti kabwaatutikwok che ma tinyei keniisyet ye agoonok obwaat;

² si obwaat ng'aleek che ki mwa maotik che tiliileen eng' tai, ak ng'atuutyetap Kiptaiyat ak ko Yetindet eng' piikwok che kiyooktoi:

³ korook, ongen ole tuun pwoonei chombilik ak chombilisyet eng' peetuusyek che po let, che isubi maguutikwak,

⁴ ak komwaei koleen, Mi ano arorutyetap nyonunennyi? Amu, kobooch ye kingo ruiyo kwanisyekyok, komi tuguuk tugul ko uu kiit ne ki uu kobooch taunetap yaetap ng'wony.

⁵ Amu kwetyin icheegei koutye kole ki mi kipsengwet kobooch keny, ak ng'wony ne ki kiyai eng' peek ak komi kwenutap peek, eng' ng'olyootap Kamuktaindet;

⁶ kimaranee peechooto ng'wonyut ne ki po peetuusyechooto, ak kilus:

⁷ ago kipsengwet ak ng'wonyut che po nguno, ko ki kigonorchi maat eng' ng'olyoondonooto, kogonor agoi peetuutap kirwooget ak ng'emisyetap piik che ma iywei Kamuktaindet.

⁸ Ago amoutye ng'olyoondoni, chamanichu, ole peetuut agenge eng' Kiptaiyat ko kergei ak kenyiisyek eliphuut, ak ko kergei kenyiisyek eliphuut ak peetuut agenge.

⁹ Ma igaegei Kiptaiyat eng' arorutyennyi, ko uu ye iiti alak kagaetapkei; ago muitoi agobo okweek, ma machei kolus chii age tugul, ago machei kobwonji tugul siguunet.

¹⁰ Ago tuun nyoonei peetuutap Kiptaiyat ko uu choriin; ne siirtoe kipsengwet eng' cheet ne oo, ak kochootyo tuguuk tugul che ki kiyae ng'wony ak parak eng' maat ne koroom, ak kolal ng'wonyut ak poisyonik che mi.

¹¹ Amu tuun chotoos tuguuchuuto tugul ko uu niito, ko nyolu oegu piik che uu nee eng' atebeet ne tiliil ak kayweetap Kamuktaindet,

¹² ogeni nyonunetap peetuutap Kamuktaindet, ak ogiili, amu nooto anyun chotoos kipsengwet eng' maat, ak kochootyo tuguuk tugul che ki kiyae parak eng' maat ne koroom?

¹³ Ago, kigeni kipsengwet ne leel ak ng'wonyut ne leel ko uu arorutyennyi, ole menyei imanda.

¹⁴ Nooto anyun, chamanichu, amu ogeni tuguuchooto, ogiilgei si tuun kenyoorwok omi eng' kaalyeet ko motinye tisya amotinye leluut eng' tainnyi.

¹⁵ Ak oiit ole muitaetap Kiptaiyandennyo ko yetunet; ko uu ye kisirwak agine Paulo, tupchennyo ne kechame, ko uu utaatyet ne ki kigoochi;

¹⁶ ko uu eng' paronokyik tugul ak icheek, kong'alaal agobo tuguuchuuto eng' paronochooto; ole mi tuguuk alak che uueen kiguiyo, che igunuuri che ma ingen kiy, ak che ma tononiotiin, ko uu ye itoi siruutik chuun alak, kot koit ng'emisyennywa.

¹⁷ Ko okweek anyun, chamanichu, amu kaosip onai tuguuchuuto, oriipkei, si ma ichuutok kachiliiletap pistoik, ak obutye eng' tononeng'wong'.

¹⁸ Ago oneryee eng' myeeindo ak naet ne po Kiptaiyandennyo ak ko Yetindennyo Jeso Kristo. Nenyi toroornatet nguno agoi koigeny. Amen.