2 PETERO 2 - Bukuit Ne Tilil

Maotigap lembech ak kirwoogennywa

¹ Ago ki piit maotik che po lembech ak icheek eng' kwenutap piik, ko uu ye ta kobiitu agine eng' kwenung'wong' kaneetigap lembech, che ibu eng' ung'oot pcheutigap ng'emisyet, koesyoi agot Kiptaiyat ne ki al icheek, kochokyin koipchingei ng'emisyet.

² Ak isubi piik che chaang' maguutikwak che yaacheen; kimwaitoe ne ya ooreetap imanit agobo icheek.

³ Ak kocheeng'jingei poroteet eng' okweek eng' ng'aleegap ng'aalseet amu kasennywa ne po myat: che ma igaegei kirwoogennywa kobooch keny, ama ruei ng'emisyennywa.

⁴ Amu ngot ko ki ma riiree `Kamuktaindet malaikaisyek ye kingo yai tengekto, ago ki toorchi ole kanyee kirwooget, ak konde keriingonik che po mesundeito keriip kot koit kirwooget;

⁵ ak ngot ko ki ma riiree `inee ng'wonyut ne po keny, ago nganda ki riip Noah, amdoindet ne po imanda, ak piik alak tisap ye kingo ipchi maraneet ng'wonyutap piik che ma iywei Kamuktaindet;

⁶ ak ngot ko kigabui ak kowal nganasoogap Sodom ak Gomorah koek oreek si koek kaboorunet eng' icheek che ta kotebyei koma iywei Kamuktaindet;

⁷ ak ngot ko ki sar Lot, chiitap imanda, ne kinyaliili miising' amu atebosyek che yaacheen che po kiptengeginik,

⁸ (amu ye ki menyei chiichooto po imanda kwenunnywa, kogeerei ak kogasei, kous muguleldanyi ne po imanda peetuut age tugul poisyosyegap ngelelnateet),

⁹ ko ingen anyun Kiptaiyat kosar eng' yoomseet che iywei Kamuktaindet ak koriip che ma po imanda kot koit peetuutap kirwooget, si tuun kirwookyi.

¹⁰ Ago eng' mageetap murwoonindo ak kosasei pounateet. Che koroomen, che isubi maguutikwak che ma potandos ye chubei che torooreen.

¹¹ Agot nganda siirtoot malaikaisyek, che siirei miising' eng' kimnateet ak kamuktaet, koma ipchin icheek kirwoogetap chubisyet konyo taitap Kiptaiyat.

¹² Ago pichuuto ma tinyei ng'omnateet, che ki kisich kityo ko uu tyong'ik si kenamei ak kebarei, che chubisyei eng' ng'aleek che ma ingen, ko tuun king'emei iman eng' ng'emisyennywa,

¹³ che nyooru nyalilda, nooto ko melektap yaityet; che iiti kole poiboiyet ye pogitos peet, perutik ak tisonok, che iboiboigei eng' igoorwekwak che po chamyet, ye oamisye tugul;

¹⁴ piik che tinyei koonyek che nyiitootiin ibeetapkei, amaimuuchi kometo tengekto; che ichuuti saboonwek che ma tononiotiin; che tinyei mugulelwek che ki konetkei kasetap myat; lagogap chubeet;

¹⁵ kingo pagaakta ooreetap iman, koba komasta, koosup ooreetap Balaam ne po kap Beor ne ki cham melektap yaityet;

¹⁶ ago ki kigergong' amu pistoennyi; ki ng'alaal sigiryet ne namaat kuut eng' kutitap chii ak koraany iywegap maotyondonooto.

¹⁷ Chuuto kondametusyek che ma tinyei peek, ak ko poolik che ibooti usoonet; che ki kigonorchi tuindap mesundeito.

¹⁸ Amu, ye mwaei ng'aleek che koroomen che po lasetapkei, kochuutu eng' magutigap poorto, ak eng' mageet ne ya, piik che katoi kochililyo eng' icheek che mi eng' keniisyet:

¹⁹ koarorchin icheek katyaget, ago icheeget ko otwogigap ng'emisyet; amu ineendet ne iterteeri chiito age, koyaei chiichooto koek otwogindet.

²⁰ Amu ye kagochiliilye murwoonindap ng'wony eng' naet ne naei Kiptaiyat ak ko Yetindet Jeso Kristo, ko ngot kota koratkei kogeny ak tuguuchooto ak kiterteer, koyaitu atebeennywa ne po let kosiir ne po tai.

²¹ Amu kita kaigai eng' icheek koma nai ooreetap imanda, kosiir, ye kingo nai, koweektagei let eng' ng'atuutyet ne tiliil ne kiga kigoochi.

²² Ki koyaak eng' icheeget ko uu ye mwaei kalewenetap iman, kole, Weekyingei seset kang'undaikyik, ak kwo komildaegei ng'atateek kogeny toret ne kagagiun.