2 PETERO 1 - Bukuit Ne Tilil

Kagateet

¹ Simion Petero, otwogindet ak ko ne kiyooktoi ne po Jeso Kristo, asirchini icheek che ki kenyooru tugul kayaneet ne karaaran miising' eng' imandap Kamuktaindet nenyo ak ko Yetindennyo Jeso Kristo:

² Ingotesak myeeindo ak kaalyeet eng' okweek eng' naet ne ongen Kamuktaindet ak Jeso Kiptaiyandennyo.

Kuursetap Kamuktaindet

³ Amu ki koonech `kamuktaetap Kamuktaindet tuguuk tugul che nyoljin saboondo ak kayweet ne kiywei Kamuktaindet, eng' naet ne kinae ineendet ne ki kuurech eng' toroornatennyi ak myeeindonyi.

⁴ Ki kogoonech eng' chooto arorutik che myachen miising' ak ko eecheen inne; si kobiit oegu eng' chuuto yamdoigap atebeetap Kamuktaindet, ko kaochililye ng'emisyet ne mi ng'wony amu mageet ne ya.

⁵ Ee, amu ng'olyoondoniito ye kaotes kagiiletapkei tugul eng' komostang'wong', otesyi `myeeindo kayaneng'wong'; ak otesyi `naet myeeindo;

⁶ ak otesyi `riibetapkei naet; ak otesyi `muitaet riibetapkei; ak otesyi `kayweetap Kamuktaindet muitaet;

⁷ ak otesyi `chametap tupchosyek kayweetap Kamuktaindet; ak otesyi `chamyet chametap tupchosyek.

⁸ Amu ngot ko miitei eng' okweek tuguuchuuto ak ko tesatin, koyaak si mochorirense anan ko che ma iyei logoek eng' naetap Kiptaiyandennyo Jeso Kristo.

⁹ Amu ineendet ne ma tinyei tuguuchuuto, ko kipkoraatyat ak kogeerei kiit ne mi ole neegit kityo ak koutye katiliilet eng' tengekwogikyik che po keny.

¹⁰ Eng' nooto anyun che kitupche, ogiilgei miising' inne, oyai kuurseng'wong' ak leweneng'wong' kogiimit, amu ngot oyai tuguuchuuto koma koi obutye matiny.

¹¹ Amu ki koonok ko uu nooto eng' chaang'indo ochut laitornatetap koigeny ne po Kiptaiyandennyo ak ko Yetindet Jeso Kristo.

¹² Nooto anyun achobegei kotugul abwaatwok tuguuchuuto, agot ngo ngen chooto, ak oo lumdootin eng' imanit ne otinye.

¹³ Ak abwaati ale myee kota ami eng' poori, ang'eetak eng' kabwaatet ne abwaatwok;

¹⁴ angen ale nyoonei kochogu metoetap poortanyu, ko uu ye kiga mwaiwo Kiptaiyandennyo Jeso Kristo.

¹⁵ Ee, agiiligei si ye tuun kaamei, omuuch obwaat tuguuchu tugul eng' poroindo age tugul.

Paornateet ne po toroornatetap Kristo

¹⁶ Ma kisup atindonik che ki kichobei eng' ng'omnateet ye ki ngemwaiwok kimnateet ak nyonunetap Kiptaiyandennyo Jeso Kristo, ago ki kibaorinigap etunatennyi ne ki kigeer,

¹⁷ amu kitaach teegisto ak toroornatet eng' Kamuktaindet Kwanda, ye ki nyoonji ineendet kutit ne ki punu liilindo ne po etunateet kole, Ni ko Weeriinnyu chamanennyu, ineendet ne agasegei miising':

¹⁸ ak ki kigas kutiniito kobunu kipsengwet, ye ki kimi kobooto ineendet eng' tulweet ne tiliil.

¹⁹ Ak ki tinyei ng'olyootap maonateet ne po iman inne; ne oyae ne myee ye oriip, ko uu tait ne ikweng'sei eng' ole imen, kot koeech, ak kochorchi mugulelwekwok taboiyatap karon:

²⁰ ye kaonai ni korook, ole ma mi maonateetap siruutik ne ibooru chiito ineegei kaguiyennyi.

²¹ Amu ma mi maonateet ne ki kobiit eng' mageetap chii: ago ki ng'alaaldos piik eng' Kamuktaindet, kondochin Kabuuset ne Tiliil.