2 LAITORINIK 6 - Bukuit Ne Tilil

Kotogosu aiywet eng' peek

¹ Ki leenji `weeriigap maotik Elisha, “Yu ki menye eng' taing'ung' ko mariich miising' eng' acheek.

² Kisoome keele chamwech keebe Jordan, ak koep chii age tugul keetit, keteekyigei olooto ole ki menye.” Ak ki wol kole, “Oba.”

³ Ki le chiito age, “Asoomin ale, iyan oba ak otwogiguk.” Ak ki wol kole, “Kibendi.”

⁴ Koba anyun kobooto icheek. Ak kingo it Jordan, koep keetiik.

⁵ Ago ye kingo ta koluuli age keetit, korarach aiywet kobutyi peek. Kiwaach kole, “Ee, Kiptaiyandennyu! Amu kogisoomei.”

⁶ Ki le chiitap Kamuktaindet, “Karorokyi ano?” Ak ki iboorchi ye karorokyi. Ki ep ineendet keetit ak kowiirchi yooto ak ki igoochi keetoto aiywet kotogos.

⁷ Ak ki leenji, “Inemu.” Koyogooito anyun eunnyi ak konem.

Kiterteeri lugeetap Syria

⁸ Kibargei laitoryatap Syria ak Israel. Kingo pata ko ki irwooch ak otwogikyik kole, “Egu nganasennyu yegile ak yugile.”

⁹ Ki iyookto chiitap Kamuktaindet chiito kwo kaplaitoryatap Israel, koleenji, “Riipkei, mebun korono, amu pwoonei yooto piigap Syria.”

¹⁰ Ki iyookto laitoryatap Israel piik koba ole ki kamwachi ineendet chiitap Kamuktaindet ak koteechi agobo yooto. Ki sargei anyun, ma wo yooto, ma agenge kityo ak ko konyil aeng'.

¹¹ Kiiimak miising' muguleldap laitoryatap Syria agobo kioto. Ki kuur otwogikyik ak koleenji, “Ochame omwaiwo chiito eng' acheek ne chamdos ak laitoryatap Israel?”

¹² Ki le age eng' otwogikyik, “Achicha, kiptaiyandennyu, ee laitoryat. Mwachin Elisha maotyot ne mi Israel laitoryatap Israel ng'aleek che imwae eng' koong'ung' oriit ne irue.”

¹³ Ak ki le, “Oba ogeer ole mi ineendet, si ayookto chiito komut ineendet.” Ak ki kimwachi ineendet keleenji, “Mi ineendet Dothan.”

¹⁴ Koyookto anyun ineendet paraisisyek ak kariisyek kobooto lugeet ne oo koba olooto. Ki it kemoi ak koyiem nganaseet.

¹⁵ Kingo ng'eet otwogindetap chiitap Kamuktaindet karon inne, kole komanda, kogeer komi lugeet ne pooto paraisisyek ak kariisyek ko kiga yiem nganaseet. Ki leenji otwogindennyi ineendet, “Ee, Kiptaiyandennyu! Kiyae nee?”

¹⁶ Ak ki wol kole, “Meiywei, amu chaang' che mi kobootech kosiir che mi ak icheeget.”

¹⁷ Ak ki sa Elisha kole, “Kamuktaindet ne Toroor, asaain ale, yaat konyekyik, si kobiit kogeer.” Ki yaat Kamuktaindet ne Toroor konyegap nerananooto; ak ki keer: ki nyiitaat tulweet paraisisyek ak kariisyek che po maat che kiga yiem Elisha.

¹⁸ Kingo choorgei piigap Syria ole mi ineendet, kosa Elisha Kamuktaindet ne Toroor kole, “Asaain ale pire pichu korateet.” Ara kibiree icheek korateet ko uu ng'olyootap Elisha.

¹⁹ Ki leenji `Elisha icheek, “Ma ooreet ni, ama nganasanooto. Osubwo, si amutak ole mi chiito ne ocheeng'e.” Ak ki imut icheek koba Samaria.

²⁰ Kingo it Samaria, kole Elisha, “Kamuktaindet ne Toroor, yaat konyegap pichu si kobiit kogeer.” Ak ki yaat Kamuktaindet ne Toroor konyekwak, ak ki keer kole kimi kwenutap Samaria.

²¹ Kingo keer laitoryatap Israel koleenji Elisha, “Abba, abar icheek? Abar icheek?”

²² Ki wol kole, “Mat ibar icheek. Tos ibare che kailuul eng' rotweng'ung' ne po chok ak kwangeng'ung'? Igoochi amitwogik ak peek, si koamis ak koeeiso, yeityo koba ye mi kiptaiyannywa.”

²³ Kichopchi icheek anyun amitwogik che chaang'; ak ye kingo kagoamis ak koeeiso, kochunda koba, ak ki pa ye mi kiptaiyannywa. Ak matagai kobwa kobookyi lugosyegap Syria kogeny emetap Israel.

Koyiemei `puunik Samaria

²⁴ Kingo pata chooto, koyum Ben-Hadad laitoryatap Syria lugeennyi tugul, ak kotogosta koyiem Samaria.

²⁵ Ki piit rubeet ne oo eng' Samaria; ak kiyiem nganasanooto kot kealdae metitap sigiryet keruutyet agenge che po fedha, ak kealdae kebeberta agenge eng' ang'wan ne po kibabet ne po soroegap cheptugenik, fedhaisyek muut.

²⁶ Ye kisiirtoi laitoryatap Israel eng' inaatut parak, koriikyi ineendet kwondo age koleenji, “Toreto, kiptaiyandennyu, ee laitoryat!”

²⁷ Ki le laitoryat, “Ngot ko matoretin Kamuktaindet ne Toroor, atoretitoin ano? Eng' ole kiboorsee, anan ole kitue sabibuk?”

²⁸ Ki leenji laitoryat ineendet, “Amin nee?” Ak ki wol kole, “Koleenjo kwonyi, ‘Koonu weeriing'ung' keam ra, si keam weeriinnyu mutai.’

²⁹ Ki iyo anyun, ak keam ineendet. Ki aleenji ineendet eng' peetuutap aeng', Koonu weeriing'ung', keam, ago kiga kouny weeriinnyi.”

³⁰ Ak kingo kas laitoryat ng'aleegap kwonyooto, kogereer ngoroikyik. Ye kiwendote irimeet parak, kogigeer piik, ak ki ilaagoti kuniok.

³¹ Yeityo komwa kole, “Ingoyaiywo Kamuktaindet ko uu nooto ak kotes koosir, ngot kotebi metitap Elisha weeriitap Sapat rani!”

³² Ago kitebyei Elisha eng' koonnyi kobooto poisyek. Ki iyookto laitoryat chiito kwo, ago kingo tomo koit chiito ne kagiyok, ole mi ineendet, koleenji poisyek, “Ogeere ole kagoyok weeri po rumiindet chiito konyo kotil metinnyu? Ye iit chiito ne kagiyok, oger kurgeet, ak onam kereiywot kouiit. Tos mongen ole isubu kiptaiyandennyi ineendet?”

³³ Ye kita kong'alaali ak icheeget, koit ole mi ineendet chiito ne kagiyok. Ki mwa kole, “Keero, po yaityoni Kamuktaindet ne Toroor; kota agen Kamuktaindet ne Toroor kolya?”