2 LAITORINIK 4 - Bukuit Ne Tilil

Mwaita ne ki tinyei mosoget

¹ Ki riirchi Elisha kwondo age ne po osotigap weeriigap maotik, koleenji, “Ki kome otwogindeng'ung' manong'otyondennyu, ak ingen ile ki iywei otwogindeng'ung' Kamuktaindet ne Toroor. Kagonyo pesendoindet komachei komut lagokyuk aeng' koba koek otwogik.”

² Ki leenji `Elisha ineendet, “Imache ayaun nee? Mwaiwo, itinye nee eng' ko?” Ki le ineendet, “Ma tinyei kiy age tugul eng' ko otwogindeng'ung' ne chepto, kobatee soteetap mwaita.”

³ Kole anyun Elisha, “Ui soomjigei tereenik eng' piiguk tugul che po kokweng'ung', tereenik che ma mi kiy, amat isoom che ng'ering'.

⁴ Yeityo iwe ko ak igerchigei ko kobooto weeriiguk. Rong'ji mwaata tereenichooto tugul, ak ne kagonyi, iiste kwo taban.”

⁵ Kwo anyun ineendet ak kogerchigei ko kobooto weeriikyik. Ki ipchi `icheek ineendet tereenik ak kiroong'ji.

⁶ Kingo nyi tereenik tugul, koleenji weeriinnyi, “Ibwa tereet age.” Ago ki leenji ineendet, “Ma komi tereet age.” Ki siis anyun mwaita mata korong'kei.

⁷ Konyo anyun komwachi chiitap Kamuktaindet. Ak ki le chiichooto, “Ui alde mwanichooto, si iyaaktae pesendang'ung', ak iboisyee che kang'et ak weeriiguk.”

Elisha ak chepsunamindet

⁸ Ki wo Elisha Sunem peetuut age, ole ki mi kwondo ne tagunoot, ak kibirchi ineendet koamis. Ak peetuut age tugul ye kibunei yooto, ko ki cham kowendi koyooto koamisyei.

⁹ Ki leenji ineendet manong'otyondennyi, “Keero, ageere ale ni ko chiito ne tiliil ne po Kamuktaindet, ne cham kosiirtoi eng' olinyo kotugul.

¹⁰ Asoomin ale, ngechopchi koot ne ming'in kogakta koonnyo, si kindochi itoogut ak meset, ng'echereet ak kiit ne tebee tait. Ye kanyo anyun koonnyo, kotebee yooto.”

¹¹ Eng' peetuut age ye ki nyo yooto, kogiwo koonnyi ne kiga kechopchi eng' parak ak koru.

¹² Ki leenji Elisha Geasi otwogindennyi, “Guur Chepsunamindoni.” Kingo kagoguur konyo kwonyooto kotonon eng' tainnyi.

¹³ Ki leenji otwogindennyi, “Ileenji kwonyi, ‘Keero, kaitoretech miising' eng' toretoni tugul tee ni, imache keyaun nee? Imache kesomun kiy eng' laitoryat anan eng' kiptaiyatap lugeet?’ ” Ak ki wolji koleenji, “Amenye kwenutap piikyuk.”

¹⁴ Ki le anyun Elisha, “Ki yachi nee anyun?” Ak ki wol Geasi kole, “Ma tinyei weeriit iman, ak oos manong'otyondennyi.”

¹⁵ Ak ki le, “Guur ineendet.” Ki kiguur ineendet ak konyo kotonon eng' kurgat.

¹⁶ Ki le Elisha, “Tuun kapkora eng' kenyiit ne nyoonei, itinye weeriit.” Ak ki le, “Achicha, kiptaiyandennyu, inyee chiitap Kamuktaindet, amat imwachi lembech otwogindeng'ung' ne chepto!”

¹⁷ Ago ki manach kwonyooto, ak ki sich weeriit eng' peetuunooto, ko kait kenyiit, ko uu ye ki kamwachi Elisha ineendet.

¹⁸ Ak kingo eet lakwanooto, koba ak kwandanyi peetuut age ole mi piik che kesisyei.

¹⁹ Ki leenji `lakwanooto kwandanyi, “Metinnyu! Metinnyu!” Ki leenji `kwandanyi otwogindennyi, “Imutyi kamet.”

²⁰ Kingo kagonam ineendet ak komutyi kamet, kotiny kamet agoi kotonon asiis, ak kime.

²¹ Ki togosta kwo komogonji ineendet itoogutap chiitap Kamuktaindet, yeityo kogerchi ineendet ko ak komanda.

²² Ki kuur manong'otyondennyi koleenji, “Asoomin ale iyookwo age eng' otwogik koget sigiryet, si alabat ole mi chiitap Kamuktaindet ak aweege.”

²³ Ki le manong'otyondennyi, “Amu nee si iwe ole mi ineendet ra? Ama peetuut ne kaleel arawet anan ko sabato.” Ak ki le, “Ma ya.”

²⁴ Ki iito anyun sigiryet ak koleenji otwogindennyi, “Kweri, keebe; mat iwe mutyo, kobatee ye kamwaun.”

²⁵ Ki wo anyun, ak ki it ole mi chiitap Kamuktaindet eng' tulweetap Karmel. Ak kingo keer chiitap Kamuktaindet ineendet eng' ole loo, koleenji Geasi otwogindennyi, “Keero! Niin ko Chepsunamindet!

²⁶ Labat torookte, ak ileenji, ‘Ichamegei? Chamegei manong'otyondeng'ung'? Chamegei lakweet?’ ” Ak ki wol kole, “Chamegei.”

²⁷ Kingo it ole miitei chiitap Kamuktaindet eng' tulweet, konam keelyekyik. Ki nyo Geasi koriik konyo koleen kotoorta ineendet, ago ki le chiitap Kamuktaindet, “Mete! Amu tinyei ng'wanindo eng' muguleldanyi, ak kagoung'ena `Kamuktaindet ne Toroor ma mwaiwo.”

²⁸ Yeityo komwa kole, “Tos kigamage weeriit kiptaiyandennyu? Ki ma amwa ale: Matigeno?”

²⁹ Koleenji anyun `Elisha Geasi, “Kermenge, nam kiroktonyu eng' eung'ung' ak iwe. Ngot ituiye chii, ko mat igat, ak ngot kogatin chii, ko mat iwolji. Ui igonoor kiroktonyu togeetap lakweet.”

³⁰ Ki le kametap lakweet, “Ko uu ye sabei Kamuktaindet ne Toroor, ak ko uu ye sabei saboondang'ung', koma pagaaktoin.” Ki ng'eet anyun Elisha, koosup ineendet.

³¹ Ki wo Geasi kondoe icheek ak kogonoor kirokto togeetap lakweet, ago ma piit tweguuno, anan kaseet. Koweek anyun kotorookta ineendet ak koleenji, “Tom kong'eet lakweet.”

³² Kingo nyo ko Elisha, kogeer ko kagome lakweet ak kaginde itogunnyi.

³³ Kwo ko anyun, ak kogerchigei ko icheek aeng'u, ak kosa Kamuktaindet ne Toroor.

³⁴ Ki togosta ak korue lakweet, kotiing'e kutinnyi kutitap lakweet, kotiing'e konyekyik konyegap lakweet, ak kotiing'e eunekyik chechiget. Ye ki iitoegei paragutap lakweet, ki toi kolalang'it poortap lakweet.

³⁵ Koweek anyun Elisha, ak kowendot eng' ko, ak kotogosta, ak koiitoegei ineendet kogeny. Ki iryon lakweet konyil tisap ak kogos.

³⁶ Ki kuur anyun Geasi koleenji, “Guur Chepsunamindet.” Koguur anyun ineendet. Kingo nyo ko ole mi Elisha, koleenji Elisha, “Kanap weeriing'ung'.”

³⁷ Kwo ko anyun, ak kobutyi keelyekyik ak kong'uruuk kot koit ng'wony. Ki kanap weeriinnyi ak kwo komanda.

Kwang'utik aeng' che ki yai Elisha

³⁸ Ki week `Elisha Gilgal ak k imi rubeet olooto; ki tebyei weeriigap maotik eng' tainnyi. Ki leenji otwogindennyi, “Kotkot tereet ne oo ak iyachi weeriigap maotik sogoryek.”

³⁹ Ki wo age mbar kwo kobut ingweek ak kinyoor keetitap motondoronik. Kibut motondoronigap keetoto, kot konyiit ngoryeet, ak konyo komurmurchi tereet ne mi sogoryek, ago ki ma nai kole nee chooto.

⁴⁰ Ki kirong' anyun kobwa ng'wony si koam piik. Ak ye ki amei sogoryechooto, kowaakyo icheek kole, “Ee chiitap Kamuktaindet, mi meet tereet oriit!” Ak mata komuuch koam tuguuchooto.

⁴¹ Ago ki le ineendet, “Oibu peek che ng'ootiin.” Kiroong'ji tereet ak ki mwa kole, “Orong'u si koam piik.” Ak ki mata kobiit kiy ne ya eng' tereet.

⁴² Ki nyo chiito age eng' Baal-salisa, koipchi chiitap Kamuktaindet magatinigap tongoanik, magatiinik tiptem che po baale kobooto mesiisegap peek eng' lolennyi. Ak ki le, “Igoochi piik koam.”

⁴³ Ki le otwogindennyi, “He! Andoi amitwogichu taitap piik pogol?” Ago ki le, “Igoochi piik koam. Amu kamwa Kamuktaindet ne Toroor kole, ‘Amei kot kotuuch.’ ”

⁴⁴ Konde anyun tainnywa, ak ki amis kot kotuuch, ko uu ng'olyootap Kamuktaindet ne Toroor.