2 LAITORINIK 22 - Bukuit Ne Tilil

Josiah, laitoryatap Judah

¹ Ki po kenyiisyek sisiit Josiah ye ki tau kolaitorani, ak ki laitoran kenyiisyek sosom ak agenge eng' Jerusalem. Ki kiguure kamennyi Jedida cheptap Adaiah ne po Boskat.

² Ki yai ne myee eng' taitap Kamuktaindet ne Toroor ak kowendote ortinwek tugul che po Daudi kwandanyi, ama masta kwo tai anan ko kaataam.

Kenyooru kitabuutap ng'atuutik

³ Ak eng' kenyiitap taman ak sisiit ne po laitornatennyi, kogiyookto Laitoryat Josiah siriindet, Sapan weeriitap Asalia, weeriitap Mesulam, kwo kootap Kamuktaindet ne Toroor, koleenji,

⁴ “Togoste kap Hilkiah tisiindet ne oo, ileenji koiit fedhaisyek che kigeip kobwa kootap Kamuktaindet ne Toroor che ki koyum eng' piik riibiigap kurgeet.

⁵ Ingogoochi kiboitiinikyik che poisyei eng' kootap Kamuktaindet ne Toroor. Ak ingogoochi kiboitiinik che mi kootap Kamuktaindet ne Toroor, chooto teechei ole ki kobutok eng' koot;

⁶ che icheeget ko musogik che po pagoinik, teegik ak piik che waei koik si koalee pagoinik ak koik che waatin ak koteege koot ole ki kobutok.

⁷ Ago ma kiit fedhaisyek che kiga kigoochi pichooto; amu kiboisyei eng' imanda.”

⁸ Ki leenji `Hilkiah tisiindet ne oo Sapan siriindet, “Koanyooru bukuitap Ng'atuutik eng' kootap Kamuktaindet ne Toroor.” Ak ki igoochi Hilkiah Sapan bukuinooto, ak kisooman.

⁹ Ki nyo Sapan siriindet kaplaitoryat ak koipchi laitoryat ng'olyoot kogeny, ak kole, “Kogogesta otwogiguk fedhaisyek che ki mi koot ak kogoochi kiboitiinik che riibei kootap Kamuktaindet ne Toroor.”

¹⁰ Ki mwachi Sapan siriindet laitoryat, koleenji, “Kagoono Hilkiah tisiindet bukuit.” Ak kisooman Sapan eng' taitap laitoryat.

¹¹ Kingo kas laitoryat ng'aleegap bukuitap Ng'atuutik, kogereer ngoroikyik.

¹² Ki ng'at `laitoryat Hilkiah tisiindet, Aikam weeriitap Sapan, Akbor weeriitap Mikaia, kobooto Sapan siriindet ak Asaiah otwogindetap laitoryat koleenji,

¹³ “Oba, oteebwa eng' Kamuktaindet ne Toroor, ak agobo piik, kobooto Judah komugul, agobo ng'aleegap kitabuuni kaginyoor. Eechen nereegegap Kamuktaindet ne Toroor che laldos agobo acheek amu ma kas iit kwanisyekyok ng'aleegap bukuini, koyai ko uu tugul che ki kisir agobo acheek.”

¹⁴ Ki pa anyun Hilkiah tisiindet ak Aikam, Akbor, Sapan ak Asaiah, ole ki mi maotyot Hulda ne ki osotyotap Shallum weeriitap Tikba, weeriitap Haras, ne ki riibindetap ngoroik. Ki menyei kwonyooto Jerusalem kebebertap aeng', ak ki ng'alaal `icheek kobooto ineendet.

¹⁵ Ki mwachi icheek koleenji, “Kamwa Kamuktaindet ne Toroor, Kamuktaindetap Israel, kole: ‘Oleenji chiichoo kaiyokwok obwa oldanywa,

¹⁶ Kamwa Kamuktaindet ne Toroor kole: Aibu yaityet konyonji koroni kobooto piikyik, ko uu ng'aleek tugul che po bukuinooto kasomani laitoryatap Judah.

¹⁷ Amu kimetaa icheek ak kobeelji nyamdutik kamuktaik ak kotacha anereech eng' poisyonikwak tugul che po eunekwak, eng' nooto anyun, kolaldos nereegekyuk agobo koroni, ama kimisi.’

¹⁸ Ago omwachini laitoryatap Judah, ne kaiyokwok obwa oteepse Kamuktaindet ne Toroor, oleenjini, ‘Kale Kamuktaindet ne Toroor, Kamuktaindetap Israel, agobo ng'aleecho kegas,

¹⁹ amu kang'arng'arit muguleldang'ung', ak iming'ingei eng' taitap Kamuktaindet ne Toroor, ye kangi kas kiit ne ki amwa agobo olito ak piik che menyei olito, ale egu karaatya ak chubeet, ak amu kegereer ngoroiguk ak iriir eng' tainnyu, kaagasin agane, mwaei Kamuktaindet ne Toroor.

²⁰ Ara anyun ayumin iwe ole mi kwanisyeguk, ak kiyumin iwe kerering'ung' eng' kaalyeet, ama keerei konyeguk yaityonooto tugul aipchini olito.’ ” Ak ki ipchi ng'olyoot laitoryat kogeny.