2 LAITORINIK 19 - Bukuit Ne Tilil

Keteepse maotyot Isaiah

¹ Ak kingo kas Laitoryat Hezekiah, kogereer ngoroikyik, kotugegei kuniok ak kwo kootap Kamuktaindet ne Toroor.

² Ki iyookto Eliakim, ne ki pou koonnyi, ak Sebna siriindet, ak poisyegap tisiik, kotugotegei kuniok, koba ole mi Isaiah maotyot, weeriitap Amos.

³ Ki leenji ineendet, “Kamwa Hezekiah kole: Peetuuni ko peetuutap nyalilda, kereetap kong' ak chubisyet, amu kait kesich lagok, ama mi kimnateet ne kesige.

⁴ Abeere imuuchi kogas Kamuktaindet ne Toroor Kamuktaindeng'ung' ng'aleek tugul che po Rabsake, ne kagoyok `laitoryatap Assyria kiptaiyandennyi, konyo kochot Kamuktaindet ne sabei, ak koger kong' ng'aleek che kagas Kamuktaindet ne Toroor Kamuktaindeng'ung'. Ara anyun saa agobo piik che ng'etunotiin.”

⁵ Kobwa anyun otwogigap Laitoryat Hezekiah ole mi Isaiah.

⁶ Ki leenji `Isaiah icheek, “Omwachini kiptaiyandeng'wong' ko uu ni, oleenjini, Kamwa Kamuktaindet ne Toroor kole: ‘Meiywei ng'aleek che kegas, che kachubena otwogigap laitoryatap Assyria.

⁷ Keero! Andoi ineendet chesawil, si ko kas ng'aleegap piik, koweek kwo emennyi, ak agoite kebar eng' rotwetap chok eng' emennyi.’ ”

Kamuiset age kobun Assyria

⁸ Kingo kas Rabsake kole kikwa laitoryatap Assyria eng' Lakish, kogiweek anyun ak koitita kobaregei laitoryat ak Libna.

⁹ Kingo kas kemwaei agobo Tiraka laitoryatap Kush, keele, nyoonei kobarge ak ineendet, koyookto piik kogeny koba kap Hezekiah, koleenji:

¹⁰ “Omwachini Hezekiah, laitoryatap Judah, oleenjini: Amengoberberin Kamuktaindeng'ung' ne imang'u, koleenjin, ‘Ma kigoitoi Jerusalem kwo eutap laitoryatap Assyria.’

¹¹ Ki igas iman kiit ne ki koyachi laitorinigap Assyria emotinwek tugul, eng' ng'emet ne king'em icheek kogees. Tos kisaruun inyee?

¹² Tos ki sar icheek `kamuktaigap pororyosyek che ki par kwanisyekyuk, Gosan, Haran, Resep, ak lagogap Eden che ki mi Telasar?

¹³ Mi ano laitoryatap Hamath, laitoryatap Arpad, ak laitoryatap nganaseetap Separbaim, anan ne po Hena, ak Iba?”

¹⁴ Ki nam Hezekiah parweet eng' eutap piik che kiga kiyok ak kosoman. Ki togosta Hezekiah kwo kootap Kamuktaindet ne Toroor ak koiito parwaanooto eng' taitap Kamuktaindet ne Toroor.

¹⁵ Ak ki sa Hezekiah eng' taitap Kamuktaindet ne Toroor kole, “Ee Kamuktaindet ne Toroor, Kamuktaindetap Israel, ne tebee kerubisyek, ii Kamuktaindet ne Toroor inyee inyegei, ne po laitornatosyek tugul che po ng'wony. Ki iyai kipsengwet ak ng'wony.

¹⁶ Ee Kamuktaindet ne Toroor, ep iit ak igas, yaat konyeguk ak igeer, kas ng'aleegap Sennacherib, che kaiyogune chiito konyo kochot Kamuktaindet ne Toroor ne sabei.

¹⁷ Iman, Kamuktaindet ne Toroor, ki kobar laitorinigap Assyria pororyosyek ak emotinwekwak kowechawech.

¹⁸ Ki kowiirchi ma kanamonikwak ak king'em anyun tuguuchooto. Ki ma ko kamuktaik, ago ki keetiik ak koik, che poisyetap eunegap piik.

¹⁹ Ara anyun, ee Kamuktaindet ne Toroor, Kamuktaindennyo, asaain ale sarwech eng' eunnyi, si konai laitornatosyek tugul che po ng'wony kole ii Kamuktaindet ne po Toroornatet, inyee inyegei.”

Maonatetap Isaiah agobo ng'emisyet ne ityin Sennacherib

²⁰ Ki iyookto anyun Isaiah weeriitap Amos chiito kwo kap Hezekiah, koleenji, “Kamwa Kamuktaindet ne Toroor, Kamuktaindetap Israel, kole, ‘Ko uu ye kaisaa agobo Sennacherib laitoryatap Assyria, ko kaagasin.’

²¹ Ni ng'olyoot ne kagomwa Kamuktaindet ne Toroor agobo ineendet: Kasasin pergeiyat cheptap Zion, kororechin ak kochotin. Kagolelech metinnyi cheptap Jerusalem eng' inyee.

²² Ng'oo ne ki ichot ak ichup? Ng'oo ne ki ibolji? Ak ng'oo ne injururi? Nooto ko Ineendet ne Tiliil ne po Israel!

²³ Koichot Kiptaiyat eng' piiguk che koiyoogu, koile: Anyoone kot aitu paragutap tuloonook kobooto chaang'indap kariisyekyuk, kot aitu oriit eng' Lebanon. Aluuli taragonikyik che kooen, ak piribirinikyik che korooron. Achute komosta ne ki menyei oriit inne, timdap mbareennyi ne rurei.

²⁴ Ki abal che ki ma angen, ak aee peek eng' olooto, eng' keldebesaigap keelyekyuk, ateeny anyun ainoosyek tugul che po Misiri.

²⁵ ‘Tom igas ole ki ayaite eng' keny? Ki ayai eng' peetuusyek che po keny nooto kaasulde nguno, si kobiit ibut nganasook che ng'ootaatiin koek karurugutik che ki king'em.’

²⁶ Ki ek anyun piikwak, che tinyei kimnateet ne ming'in, ki meiyo mugulelwekwak ak kokwong'yo. Ki igei susweegap keeweet, ak koigei sogeek che ng'orng'or, ki igei susweek che mi kooriik parak, ak ko uu peek che kilalyo kotom koeegitu.

²⁷ Ago angen kabuureng'ung', mandaeng'ung' ak nyonuneng'ung' ne inyone ko, ak nereegeguk che koroomen agobo anee.

²⁸ Amu nereegeguk che koroomen agobo anee, ak amu kogoit itiikyuk loseng'ung' pogei, andoi anyun kombet serung'ung', ak ande karnennyu kuting'ung'. Aweechin anyun ibun ooreet ne ki ibunu.”

²⁹ Yeityo komwachi `Isaiah laitoryat Hezekiah “Egu ni kaboorunet ne kiboorun: oame eng' kenyini che piitos icheegei, ak oam eng' kenyiitap aeng' che syegune chooto. Eng' kenyiitap somok, ogol ak oges ak omin keetiigap sabibuk, ak oam logoekwak.

³⁰ Ak iywoktogei kobendi ng'wony tigitigap che ng'etu eng' kootap Judah ak koiyo logoek eng' parak.

³¹ Amu mandoi eng' Jerusalem che kang'et, ak chilildos eng' tulweetap Zion. Yaei niito kagiiletapkei ne po Kamuktaindet ne Toroor.

³² “Mwaei anyun Kamuktaindet ne Toroor agobo laitoryatap Assyria, kole, ‘Ma itu ineendet nganasani, ama mwogei yooto eng' kipchabet, ama nyoonei tainnyi kotinyei long'eet, ama wasyin ng'ung'unyek.

³³ Weegegei ooreet ne ki punu, ama itu nganasani,’ mwaei Kamuktaindet ne Toroor.

³⁴ ‘Amu ariibe nganasani, asaru, agobo anee ak agobo Daudi otwogindennyu.’ ”

³⁵ Ki manda malaikaiyatap Kamuktaindet ne Toroor kemounooto ak kobar piik eliphuusyek pogol ak tamanwogik sisiit ak muut eng' nganaseetap piigap Assyria. Kingo ng'eetyo piik karon, ko ki muuswek tugul, che kogobek.

³⁶ Kwo anyun Sennacherib laitoryatap Assyria, koweek ak kwo komeny Nineveh.

³⁷ Ak ye kita kosaaei eng' kootap Nisrok kanamwennyi, kobar ineendet Adramelek ak Sareser eng' rotwetap chok, ak ki mwei koba emetap Ararat. Ak ki laitoran Esarhaddon weeriinnyi kogeer ineendet.