2 LAITORINIK 1 - Bukuit Ne Tilil

Elijah ak Laitoryat Ahasia

¹ Kingo kagome Ahab kongelelji `Moab Israel.

² Kirorok Ahasia eng' tirisyetap koonnyi ne po parak ne ki mi Samaria ak kimyan. Ki iyookto piik ak koleenji, “Oba, oteebe Baal-sebub kanamwetap Ekron ngo tos asap eng' myani.”

³ Ago ki leenji malaikaiyatap Kamuktaindet ne Toroor Elijah Tisbindet, “Ng'eet ak iwe otuiye ak piik che kaiyookto laitoryatap Samaria, ak ileenji icheek, ‘Si obe oteepse Baal-sebub kanamwetap Ekron, ko amu ma mi Kamuktaindet Israel?’

⁴ Ara anyun, kamwa Kamuktaindet ne Toroor kole: ‘Mechooruge eng' itogung'ung' ne irue, ago imee iman.’ ” Ak ki wo Elijah.

⁵ Kingo week pichooto koba oldanyi, koteebe icheek koleenji, “Kalya si oweege?”

⁶ Ki leenji ineendet, “Konyo chiito kotuiyenech ak koleenjech, ‘Oba oweege ole mi laitoryat ne kaiyokwok, ak oleenji ineendet, Kamwa Kamuktaindet ne Toroor kole: Si iyookte piik koba koteepse Baal-sebub kanamwetap Ekron, ko amu ma mi Kamuktaindet Israel? Nooto anyun, mechooruge anyun eng' itoogut, ago imee iman.’ ”

⁷ Ki leenji icheek, “Ka chii ne uu nee chiichooto katuiyenok, ak komwaiwok ng'aleechuuto?”

⁸ Ki wolji koleenji, “Ka chiito ne sabul ak karategei pireneet eng' suennyi.” Ki le laitoryat, “Ineendet ko Elijah Tisbindet.”

⁹ Koyooktoochi anyun `laitoryat kiptaiyat kobooto piikyik konom. Ki togosta kwo ole mi ineendet, ak kitebyei ng'wony Elijah eng' tulweet parak. Ak ki mwachi ineendet koleenji, “Ee, chiitap Kamuktaindet, kole laitoryat, ‘Choruge!’ ”

¹⁰ Ki wolji `Elijah kiptaiyatap pichooto konom, koleenji, “Ngot ko aa chiitap Kamuktaindet, kochoorgei maat eng' kipsengwet, ak kobeelin kobooto piiguk konom.” Ki choorgei anyun maat eng' kipsengwet ak kobeel ineendet ak piikyik konom.

¹¹ Ki iyookyi ineendet kogeny kiptaiyat age ak piikyik konom. Ki wolji ineendet koleenji, “Ee, chiitap Kamuktaindet, kamwa laitoryat kole, ‘Chogu chooruge!’ ”

¹² Ak ki wolji `Elijah icheek koleenji, “Ngot ko aa chiitap Kamuktaindet, kochoorgei maat eng' kipsengwet ak kobeelin kobooto piiguk konom.” Ki choorgei anyun maatap Kamuktaindet eng' kipsengwet ak kobeel ineendet ak piikyik konom.

¹³ Ki iyookto kogeny kiptaiyat ne po somok kobooto piikyik konom. Ki togosta kiptaiyatap somok ne pou konom ak konyo kogutuny eng' taitap Elijah, ak kosaisai ineendet, koleenji, “Ee chiitap Kamuktaindet, asaain ale, ingobunji kamanuut ne oo, saboondanyu ak saboonwegap otwogichuguk konom eng' taing'ung'!

¹⁴ Keero, kachoorgei maat eng' kipsengwet ak kobeel kiptainichu kabo tai tuwai kobooto piikwak konom che po age tugul. Ago nguno asoomin ale ingobunji saboondanyu kamanuut ne oo eng' taing'ung'.”

¹⁵ Ki leenji `malaikaiyatap Kamuktaindet ne Toroor Elijah, “Orektee tuwai ak ineendet; amat iywei ineendet.” Ara king'eet korekta tuwai ak ineendet agoi ole mi laitoryat.

¹⁶ Ki leenji ineendet, “Kamwa Kamuktaindet ne Toroor ko uu ni, kole: ‘Ko uu ye keyookte piik koba koteepse Baal-sebub kanamwetap Ekron, ko amu ma mi Kamuktaindet eng' Israel ne iteepse eng' ng'olyoondennyi? Nooto anyun, mechooruge eng' itogung'ung', ago imee iman.’ ”

¹⁷ Ara kime anyun ineendet ko uu ng'olyootap Kamuktaindet ne Toroor ne ki kamwa Elijah. Amu ki ma kotinyei weeriit ko ki toi kolaitoran Jehoram kogeer ineendet eng' kenyiitap aeng' ne po Jehoram weeriitap Jehoshaphat laitoryatap Judah.

¹⁸ Poisyonik che ng'etunotiin che po Ahasia che ki yai, ko tos ma siraatiin eng' kitabuutap ateptap peetuusyek ne po laitorinigap Israel?