2 KORINTOEK 9 - Bukuit Ne Tilil

Kayumanik agobo kayanik eng' Jerusalem

¹ Ago eng' ng'aleegap poisyet ne kiboisyechin che tiliileen koma tilei kiy kota asirwak.

² Amu angen chobeng'wong' pogei ne alasunegei agobo okweek eng' icheek che po Makedonia, ale Ki kochopkei Akaia kobooch kenyiit agenge ne kogosiirto; ak kigong'eet kagiileng'wong' pogei che chaang' miising' eng' icheek.

³ Ago koayogu che kitupche, si ma ek puch kalasunennyo pogei agobo okweek eng' ng'olyoondoniito; si kobiit ochopkei, ko uu ye ki amwa:

⁴ si ngot kebwa ak age ne po Makedonia, ak kenyoorwok kotom ochoboge, kiteweerech eng' kamang'unoni (si ma ki mwa keele okweek).

⁵ Ki abwaat anyun ale kanyool agaigai che kitupche, si kobiit kondoi kobwa olo omi, si kosip kochop tuguuk che po aiyebindong'wong' che ki kosip oaror, si kobiit kochobok tuguuchooto, koek tuguuk che po aiyebindo, ama po torchinet.

⁶ Ago amwae ni anyun ale, Ineendet ne koolei che ng'ering' kogesei agine che ng'ering'; ak ineendet ne koolei eng' aiyebindo kogesei agine che po aiyebindo.

⁷ Ingogoito chii age tugul ko uu ye Ki kochop eng' muguleldanyi; ma eng' ng'ooknateet, anan torchinet: amu chamei Kamuktaindet ne igoitoi eng' poiboiyet.

⁸ Ak komuuchi Kamuktaindet kogoonok myeeindo tugul kotesak miising'; si otinye okweek kotugul tuguuk tugul che yamok eng' kiit age tugul, si otunen eng' poisyet age tugul ne myee:

⁹ ko uu ye ki kisir keele, Kigoserser, Ki kogoochi kibananook; Tebyei imandanyi koigeny.

¹⁰ Ak ineendet ne igoochin kesweek kolindet ak amitwogik che amei, kogoonok ak kotesei kesweekwok che ogoole, ak kotes logoegap imandang'wong':

¹¹ ki koonok mogornateet eng' kiy age tugul eng' aiyebindo tugul, ne igoochin Kamuktaindet kongoi eng' acheek.

¹² Amu yaetap poisyoni koma inyiityin kityo piik che tiliileen tuguuk che tee che kobononi, ago tesoksei agine eng' kaweekyinoik che chaang' che po kongoi che kiweekyin Kamuktaindet;

¹³ amu tyemet ne po poisyoni kotoroori icheek Kamuktaindet amu kasetap iit ne po ng'ang'eng'wong' eng' logoiywek che myach che po Kristo, ak aiyebindap kagoitoeng'wong' eng' icheek, ak eng' tugul;

¹⁴ ak eng' saaennywa agobo okweek, koting'enok emosto amu myeeindap Kamuktaindet ne tesat miising' eng' okweek.

¹⁵ Kongoi eng' Kamuktaindet amu konunennyi ne ma mwaoksei.