2 KORINTOEK 8 - Bukuit Ne Tilil

Kecheerei kayanik koek che aiyeeben

¹ Kiboorwok anyun, che kitupche, myeeindap Kamuktaindet ne ki kigoochi kanisosyegap Makedonia;

² ale ye ki ngetyem icheek eng' nyalilda ne oo, ko kitesak poiboindanywa ne siirtoot ak panandanywa ne oo kot kotesyi icheek mogornateetap aiyebindonywa.

³ Amu abaoryani ale ki igoito eng' chamyennywa ko uu kamugennywa, ak ne siirei kamugennywa,

⁴ kosoomech eng' kagaigaet ne oo agobo myeini ak yamdaet eng' poisyet ne kiboisyechin che tiliileen:

⁵ ak ma ko uu ye ki kimang'u, ago kisip kogoochigei icheeget Kiptaiyat, ak ki konechkei eng' mageetap Kamuktaindet;

⁶ agoi ki kiil Tito, keele ko uu ye kisip kotoi, komachei kosulda eng' okweek myeiniito agine.

⁷ Ago ko uu ye otinye aiyebindo eng' kiy age tugul, eng' kayaneet, ak tweguunet, ak naet, ak eng' kagiiletapkei tugul, ak eng' chamyeng'wong' ne oting'enech, ingonyiiak anyun myeiniito agine.

⁸ Ma ng'alaali eng' ng'atuutyet, ago atyeme eng' kagiiletapkei ne po alak, ngo po iman chamyeng'wong'.

⁹ Amu ongen myeeindap Kiptaiyandennyo Jeso Kristo ole, agot nganda ki mogoryo, ko ki ek kibanania agobo okweek, si kobiit oegu mogoreek eng' panandanyi.

¹⁰ Ak eng' niito aboorwok kabwaatutikyuk: amu nyolu niito eng' okweek, che ki kosip otau eng' kenyiit agenge ne kogosiirto, ma kityo oyai, ago ochame agine.

¹¹ Ago ogesu anyun nguno poisyet; amu ko uu ye kio chobootiin ochame oyai ko uu nooto, komiitei ko uu nooto kasuldaet ne po kamugeng'wong'.

¹² Amu ngo choboot kabwaatetap chii, ko taachaksei ko uu ye tinyei chii, ma ko uu ye ma tinyei.

¹³ Amu ma ale si kinyamnyumji alak, kinyalilaak okweek;

¹⁴ ago koaechin; toreti nguno anyun chaang'indang'wong' terterindanywa, si kotoret chaang'indonywa terterindang'wong'; si kobiit kogergeit:

¹⁵ ko uu ye ki kisir keele, Ineendet ne ki iyum che chaang' koma siirto kiy; ak ineendet ne ki iyum che ng'ering' ko mararchi kiy.

¹⁶ Ago kongoi eng' Kamuktaindet, ne indoi muguleldap Tito ko uu nooto kagiiletapkei agobo okweek.

¹⁷ Amu kitaach iman kagiilennyo, ago amu igiilegei kot, kogonyo anyun ole omi eng' chamyennyi.

¹⁸ Ak kogiyookte tupchet age kobooto ineendet ne tagunoot kalasunennyi agobo logoiywek che myach eng' kanisosyek tugul;

¹⁹ ak ma nooto kityo, ago ki lewen kanisosyek ineendet kebendatee tugul agobo myeini, ne kiyae acheek keyachini toroornatetap Kiptaiyat, ak kibooru chobennyo pogei ne kitinye.

²⁰ Kimachei keistoegei ng'olyoondoniito keele, si kobiit ma mwaitaenech chii age tugul kiy ne ya agobo aiyebini kiyaati,

²¹ amu kibwaati tuguuk che po teegisto, ma eng' taitap Kiptaiyat kityo, ago eng' taitap piik ak icheek.

²² Ak kogiyookte kobooto icheek tupchennyo, ne kogegeer konyil che chaang' keele igiilegei eng' tuguuk che chaang', ago nguno ko ki ilegei miising' kosiir, amu kamang'unet ne ting'enok miising'.

²³ Ngo teebenak chii agobo Tito, ineendet ko kiboityot ne ki mi tuwai, ak kiboisyei tuwai agobo okweek; anan agobo tupchosyekyok, icheeget ko che kiyooktoi che po kanisosyek, chooto ko toroornatetap Kristo.

²⁴ Nooto anyun oboorchi icheeget eng' taitap kanisosyek kiit ne ibooru chamyeng'wong', ak kalasunennyo pogei agobo okweek.