2 KORINTOEK 3 - Bukuit Ne Tilil

Kiboitiinik che po arorutyet ne leel

¹ Ara anyun, kagitau kogeny kemwauge acheeget? Anan kimache, ko uu ye machei piik alak, paronok che po mwaitaetapkei che pwonjinok ak che punwok?

² Oo parweennyo ne siraat eng' mugulelwekyok, ne naat ak kosomani piik tugul;

³ oboortoige ole oo parweet ne po Kristo, ne ki kiyai, ne ki kisir ama eng' wino, ago eng' Kabuuset ne po Kamuktaindet ne sabei; ma eng' koik che lebeleen, ago eng' koik che lebeleen che mugulelwek che po poorwek.

⁴ Ak ketinye kamang'unet ne uu nooto eng' Kristo, ne tokyingei Kamuktaindet:

⁵ ma keele ki tinyei kiy acheegei ne yamegei ak kiy, kiit kiy age tugul keele punwech acheeget; ago punu Kamuktaindet che yamech;

⁶ ne kiyaech keegu che yamei, kiboitiinik che po arorutyet ne leel; ma che po ng'atuutyet, ago po Kabuuset ne Tiliil; amu parisyei ng'atuutyet, ago Kabuuset ne Tiliil ne igoitoi saboondo.

⁷ Ago ngo ki pwa kobooto toroornatet poisyetap meet, ne ki kisir, ak kewachi koik parak, kot kogimata komuuch piigap Israel kogeer togeet ne po Musa komyee amu liilindap togeennyi; liilindo ne ki igeesugei:

⁸ tos ma tesat kosiir poisyetap Kabuuset ne Tiliil eng' toroornatet?

⁹ Amu ngo poisyetap kirwooget ko toroornatet, ko siirtoot miising' poisyetap imanda eng' toroornatet.

¹⁰ Amu iman, nooto ne ki kitoroor, ko ki ma kigoochi toroornatet agobo niito, amu toroornatet ne siirtoot.

¹¹ Amu ngo ki mi nooto siirtoi kobooto toroornatet, komiitei anyun eng' toroornatet ne tya, nooto ne ng'etunot.

¹² Nooto anyun, amu ki tinyei kamang'unet ne uu ni, keboisyee anyun nyiganateet ne po keny eng' ng'alaalet,

¹³ ama ki uu Musa, ne kituge togeennyi angeet, si ma keer piigap Israel komyee kagesunet ne po nooto ki igeesugei:

¹⁴ ago kiuegitu kabwaatutikwak: amu agoi peetuuni, eng' somaneetap kayomiset ne po keny, kota komi anganooto po togeet, tomo keisto; nooto ne kigeisto eng' Kristo.

¹⁵ Ago agoi peetuuni, ko eng' peetuut age tugul ye kisomani Musa, kota komiitei anganooto mugulelwekwak.

¹⁶ Ago ye kaweekyinegei Kiptaiyat, keisto anganooto.

¹⁷ Kiptaiyat ko Kabuuset ne Tiliil anyun: ak ole mi Kabuusetap Kiptaiyat komi katyaget.

¹⁸ Ago acheek tugul koboortoi toroornatetap Kiptaiyat ko uu ki oit eng' togoochikyok che ma tugootiin, kewalech eng' itoonooto kobunu toroornatet agoi toroornatet, ko uu ye punu Kiptaiyat ne Kabuuset ne Tiliil.